বিশিষ্ট শিল্পী, সাহিত্যিক, শিক্ষাবিদ ভৱেন বৰাক মুখ্য মন্ত্ৰী সৰ্বানন্দ সোণোৱালে শুকুৰবাৰে ২০১৯ বৰ্ষৰ শোণিতকোঁৱৰ গজেন বৰুৱা বঁটা প্ৰদান কৰে।
জামুগুৰিহাটৰ পৰিদৰ্শন ভৱন প্ৰাংগনত ৰাজ্য চৰকাৰৰ সাংস্কৃতিক সঞ্চালকালয়ৰ উদ্যোগত আয়োজিত এক অনুষ্ঠানত বিশিষ্ট শিল্পী, সাহিত্যিক, শিক্ষাবিদগৰাকীলৈ এই বঁটা আগবঢ়োৱা হয়।
বঁটা প্ৰদান অনু্ষ্ঠানত অংশগ্ৰহণ কৰি মুখ্য মন্ত্ৰী সৰ্বানন্দ সোণোৱালে শোণিত কোঁৱৰ গজেন বৰুৱাই অসমীয়া কৃষ্টিৰ বিকাশৰ বাবে আগবঢ়োৱা অৱদানৰ বিষয়ে শ্ৰদ্ধাৰে সোৱৰণ কৰে।
জামুগুৰিহাটৰ ঐতিহ্যমণ্ডিত বাৰেচহৰীয়া ভাওনাৰ উত্তৰণৰ দিশত আৰু দেশী-বিদেশী পৰ্যটকক এই ভাওনা উপভোগ কৰাৰ প্ৰতি আগ্ৰহী কৰি তোলাৰ ক্ষেত্ৰত শোণিত কোৱৰ গজেন বৰুৱাৰ বলিষ্ঠ ভূমিকাৰ বিষয়েও উল্লেখ কৰে সোণোৱালে।
আনহাতে, ২০১৯ বৰ্ষৰ শোণিত কোঁৱৰ গজেন বৰুৱা বঁটা প্ৰাপক ভৱেন বৰাৰ অসমীয়া সাহিত্য, সংস্কৃতি আৰু শিক্ষা জগতলৈ আগবঢ়োৱা অৱদানৰো শলাগ লয় মুখ্য মন্ত্ৰীয়ে।
অনুষ্ঠাত বঁটা গ্ৰহণ কৰি ভৱেন বৰাই অসম চৰকাৰে তেওঁলৈ আগবঢ়োৱ সন্মানৰ বাবে ধন্যবাদ জ্ঞাপন কৰাৰ লগতে অসমীয়া জাতিৰ উন্নতিৰ হকে কাম কৰিবলৈ সুবিধা লাভ কৰাৰ বাবে ভগৱানক কৃতজ্ঞতা জ্ঞাপন কৰে।
উল্লেখযোগ্য যে, বঁটাত ২ লাখ টকাৰ লগতে, এখন প্ৰশস্তিপত্ৰ, এখন শৰাই আৰু অংগবস্ত্ৰ আগবঢ়োৱা হয়।
অনুষ্ঠানত মুখ্য মন্ত্ৰীৰ লগতে সাংসদ পল্লৱ লোচন দাস, বিধায়ক পদ্ম হাজৰিকা, মন্ত্ৰী নৱ কুমাৰ দলেও উপস্থিত থাকে।
