নাবালিকা এগৰাকীক “যৌন নিৰ্য্যাতন” কৰাৰ অভিযোগত চাকৰিৰ পৰা বাধ্যতামূলক অৱসৰ দিয়া হৈছে অৰুণাচল প্ৰদেশৰ এজন শীৰ্ষ বিষয়াক।
ৰাজ্যপাল লেফটেনেণ্ট জেনেৰেল (অৱসৰপ্ৰাপ্ত) বি দি মিশ্ৰাই ৰাজ্যখনৰ যুটীয়া আয়ুক্ত (কৰ আৰু শুল্ক) তানি জংকিক শেহতীয়াকৈ এই শাস্তি বিহিছে।
১১ বছৰীয়া ছোৱালী এজনীক “যৌন নিৰ্য্যাতন”ৰ অভিযোগত জংকিৰ বিৰুদ্ধে ২০১৭ চনৰ জুলাইত এক গোচৰ ৰুজু কৰা হৈছিল।
ভাৰতীয় দণ্ড বিধিৰ ধাৰা ৩৪১/৩৫৪ আৰু পক্স’ (Protection of Children from Sexual Offences Act 2012) আইনৰ ধাৰা ৮ত তেওঁৰ বিৰুদ্ধে গোচৰ ৰুজু হৈছিল।
গোচৰটোৰ পিছতে জংকিক তাৎক্ষণিকভাৱে চাকৰিৰ পৰা তিনিমাহৰ বাবে নিলম্বন কৰা হৈছিল। নিলম্বন উঠাই লোৱাৰ বাবে তেওঁ উচ্চ ন্যায়ালয়ত আবেদন কৰিছিল।
কিন্তু, তদন্তকাৰী বিষয়াই অভিযুক্ত বিষয়াজনক “কঠোৰ আৰু দৃষ্টান্তমূলক শাস্তি” বিহাৰ পোষকতা কৰিছিল।
“১১ বছৰীয়া নাবালিকাগৰাকীৰ সৈতে বেয়া আচৰণ কৰাত অভিযুক্ত বিষয়াজন জৰিত থকা পোৱা বুলি তদন্তকাৰী বিষয়াই তেওঁৰ প্ৰতিবেদনত উল্লেখ কৰিছিল,” ৰাজ্য চৰকাৰৰ বিবৃতিত প্ৰকাশ।
তদন্ত প্ৰতিবেদনৰ পিছত অভিযুক্ত বিষয়াজনক লিখিত বক্তব্য দাখিলৰ বাবে নিৰ্দেশ দিয়া হৈছিল।
কিন্তু আত্মপক্ষ সমৰ্থনত তেওঁ কোনো “নতুন আৰু বিশ্বাসযোগ্য সাক্ষ্য” দাখিল কৰিব নোৱাৰাত তেওঁৰ বিৰুদ্ধে অভিযোগ সন্দেহৰ ঊৰ্ধ্বত বুলি বিবেচনা কৰা হয়।
নৰ্থইষ্ট নাও-এ বিষয়াজনৰ মন্তব্য জনাৰ চেষ্টা কৰিছিল কিন্তু কোনো উত্তৰ পোৱা নগ’ল। চ’চিয়েল মিডিয়াযোগে তেওঁৰ সৈতে যোগাযোগৰ চেষ্টা কৰা হৈছিল।