ভাৰত-ম্যানমাৰৰ সীমান্তত নগা বিদ্ৰোহী সংগঠনেৰে হোৱা এক সংঘৰ্ষত আছাম ৰাইফলছৰ এগৰাকী জোৱান ছহিদ হোৱাৰ লগতে অন্য দুগৰাকী জোৱান আহত হৈছে।
নিৰাপত্তা সংস্থাসমূহৰ সূত্ৰই প্ৰকাশ কৰা অনুসৰি ভাৰত-ম্যানমাৰ সীমান্তৰ পৰা প্ৰায় ৫ কিলোমিটাৰ নিলগৰ আৰু অৰুণাচল প্ৰদেশৰ নামপং ৰাজহ চক্ৰৰ লংভি গাঁৱৰ পৰা ৮-৯ কিলোমিটাৰ দূৰত্বত অৱস্থিত ১৭২ নং সীমান্তৰ চকীৰ অন্তৰ্গত এলেকাত এনএচচিএন(খাপলাং- য়ুং আং) গোটে অভিযানকাৰী আছাম ৰাইফলছৰ এটা দলৰ ওপৰত অতৰ্কিতে গুলীবৰ্ষণ কৰাৰ ফলতে এই সংঘৰ্ষৰ সূত্ৰপাত হয়।
বিদ্ৰোহী গোটৰ অতৰ্কিত গুলীবৰ্ষণত আছাম ৰাইফলছৰ ৰাইফলমেন অৱতাৰ চাকমা ছহিদ হোৱাৰ লগতে ৰাইফলমেন বাবলু আৰু ৰাইফলমেন বলদেৱ আহত হৈছে।
ইতিমধ্যে আহত দুই জোৱানক হেলিকপ্টাৰেৰে উদ্ধাৰ কৰি সামৰিক চিকিৎসালয়ত ভৰ্তি কৰোৱা হৈছে। আহত দুয়োজন ৰাইফলমেনৰ অৱস্থা সংকটমুক্ত বুলি প্ৰকাশ কৰিছে সূত্ৰটোৱে।
নিৰাপত্তা সংস্থাসমূহৰ সূত্ৰই প্ৰকাশ কৰা অনুসৰি বিদ্ৰোহী সংগঠন এনএচচিএন(খাপলাং-য়ুং আং)ৰ কামাণ্ডাৰ এচএচ মেজৰ মাকাম হাচেঙৰ নেতৃত্বত এটা দলে আছাম ৰাইফলছৰ অভিযানকাৰী দলটোৰ ওপৰত এম্বুশ চলায়।
ইফালে সংঘৰ্ষস্থলীৰ পৰা অভিযানকাৰী দলটোৱে প্ৰায় ১০ লাখৰ টকাৰ বৃহৎ পৰিমাণৰ হিৰ’ইন উদ্ধাৰ কৰিবলৈ সক্ষম হৈছে।
চাংলাং জিলাৰ আৰক্ষী অধীক্ষক মিহিন গাম্ব’ৱে গোটেই দিনটো বিদ্ৰোহী গোটটোৰ বিৰুদ্ধে অভিযান অব্যাহত ৰখা হৈছে বুলি মন্তব্য কৰি অভিযানৰ সবিশেষ তথ্য সদৰী কৰাৰ পৰা বিৰত থাকে।
উল্লেখ্য যে যোৱা অক্টোবৰতো ভাৰত-ম্যানমাৰ সীমান্তৰ অৰুণাচল প্ৰদেশৰ চাংলাং জিলাৰ মানমাও পথৰ চেনমৌ গাঁৱত নগা বিদ্ৰোহী গোটৰ সৈতে হোৱা এক সংঘৰ্ষত ১৯ আছাম ৰাইফলছৰ দুগৰাকী জোৱান ছহিদ হোৱাৰ লগতে কেবাজনো জোৱান আহত হৈছিল।
