শেহতীয়া বিধানসভা নিৰ্বাচনত ক্ষমতাৰ পৰা উৎখাত হোৱাৰ পিছত পশ্চিমবংগৰ তৃণমূল কংগ্ৰেছৰ ২০ জন সাংসদে এন চি পি আইত যোগদান কৰে। মমতা বেনাৰ্জীৰ তৃণমূল প্ৰায় শক্তিহীন হৈ পৰিছে। দল হাৰিলে শাসক শিবিৰত যোগদানৰ ভিৰ ক্ৰমান্বয়ে বাঢ়িছে।দল বাগৰাৰ বিৰুদ্ধে আইন আছে যদিও কাৰ্যক্ষেত্ৰত ইয়াৰ প্ৰয়োগ অতি বিভ্ৰান্তিকৰ।
পশ্চিমবংগৰ শেহতীয়া এই ছবিখন সমগ্ৰ দেশতে চৰ্চাৰ বিষয় হৈ পৰিছে যদিও বাতৰি অনুসৰি এই প্ৰহসনৰ ৰাজনীতিত উত্তৰ-পূবৰ নাগালেণ্ড ৰাজ্যই পশ্চিমবংগ আৰু দেশৰ বাকী অংশক অতিক্ৰম কৰি গৈছে।
তথ্য অনুসৰি ২০২২ চনৰ পৰা ২০২৬ চনলৈ এই ৪ বছৰত দেশত নিৰ্বাচনত জয়ী হোৱাৰ পিছত ১১১ জন সাংসদ আৰু বিধায়কে দল সলনি কৰিছিল। যাৰ ভিতৰত নাগালেণ্ড দেশৰ ভিতৰতে শীৰ্ষত আছে।
এছ’চিয়েশ্যন ফৰ ডেম’ক্ৰেটিক ৰিফৰ্মছ (এডিআৰ) আৰু নেশ্যনেল ইলেকচন ৱাচৰ এক প্ৰতিবেদন অনুসৰি ২০২২ চনৰ পৰা ২০২৬ চনৰ ভিতৰত সংসদীয় বা ৰাজ্যিক বিধানসভাৰ নিৰ্বাচনত জয়ী হোৱাৰ পিছত মুঠ ১১১ জন সাংসদ আৰু বিধায়কে দল সলনি কৰিছিল। এই অধ্যয়নত উপ-নিৰ্বাচনো অন্তৰ্ভুক্ত কৰা হৈছিল।
দেখা গৈছে যে যোৱা চাৰি বছৰত ২৬ জন লোকসভা সাংসদ, ৭ গৰাকী ৰাজ্যসভাৰ সাংসদ আৰু ৭৮ গৰাকী বিধায়কে দল সলনি কৰিছে।
ৰাজ্যভিত্তিকভাৱে চালে এই তালিকাৰ শীৰ্ষত আছে নাগালেণ্ড। এই সময়ছোৱাত ৩২ গৰাকী বিধায়কে দল এৰিলে। ২৫ জনে তাতেই শাসকীয় দল ‘এন ডি পি পি’ এৰি ‘নগা পিপলছ ফ্ৰণ্ট’ (এন পি এফ)ত যোগদান কৰে। আৰু আন দলৰ পৰা ইয়াত মুঠ ৩২ জনে যোগদান কৰিছে।
এই তালিকাত দ্বিতীয় স্থানত আছে পশ্চিম বংগ। এ আৰ ডিৰ তথ্য অনুসৰি তৃণমূলৰ টিকটত নিৰ্বাচনত জয়লাভ কৰি ২০ জন সাংসদে একেলগে এন চি পি আইত যোগদান কৰে। ইমানবোৰ সাংসদে একেলগে দল সলনি কৰাৰ গোচৰ এতিয়া লোকসভাৰ অধ্যক্ষ ওম বিৰলাৰ সন্মুখত বিচাৰাধীন হৈ আছে।
এই তালিকাত তৃতীয় স্থানত আছে তেলেংগানা। ইয়াত ৯ জন বিধায়কে বি আৰ এছ এৰি কংগ্ৰেছত যোগদান কৰিছে। ইয়াত ২০২৩ চনৰ বিধানসভা নিৰ্বাচনত বি আৰ এছক পৰাস্ত কৰি কংগ্ৰেছে জয়লাভ কৰিছিল।
চতুৰ্থ স্থানত আছে গোৱা। ইয়াত ৮ জন কংগ্ৰেছৰ সদস্যই বিজেপিত যোগদান কৰে। পঞ্জাৱত ৰাজ্যসভাৰ ৬ জন সাংসদ আৰু ২ জন বিধায়ক অৰ্থাৎ মুঠ ৮ জনে দল সলনি কৰিছে। মহাৰাষ্ট্ৰত উদ্ধৱৰ শিৱসেনা এৰি ৬জনে শিণ্ডেৰ শিৱসেনাত যোগদান কৰিছে।
এটা দলৰ পৰা আন এটা দললৈ সৰ্বাধিক দলত যোগদান কৰাৰ ক্ষেত্ৰত এনডিপিপি শীৰ্ষত আছে। ইয়াৰ পৰা ২৫ জন বিধায়কে দল এৰিছে। দ্বিতীয় স্থানত (২০ জন) আছে তৃণমূল কংগ্ৰেছ। তৃতীয় স্থানত আছে (১৯ জন) কংগ্ৰেছ।
প্ৰতিবেদন অনুসৰি এই ৩টা দলৰ পৰা ৬৪ জন লোকে দল ত্যাগ কৰিছে। অৰ্থাৎ শতাংশত ৫৮ শতাংশ। এন পি এফত সৰ্বাধিক সংখ্যকে দল সলনি কৰিছে। ইয়াত মুঠ ৩২ জন জনপ্ৰতিনিধিয়ে যোগদান কৰিছে। দ্বিতীয় স্থানত বিজেপি (২৯ সদস্য), তৃতীয় স্থানত এনচিপিআই (২০ সদস্য)। এই তিনিটা দলত ৮১ জন জনপ্ৰতিনিধিয়ে যোগদান কৰিছে। শতাংশ হিচাপত ৭৩ শতাংশ।
