অসম চৰকাৰৰ পূবলৈ চোৱা নীতি অনুসৰি ‘পূবলৈ চোৱা নীতি পৰিক্ৰমা বিভাগে’ বাংলাদেশৰ ঢাকাত অনুষ্ঠিত হোৱা নৱম বাংলাদেশ ভ্ৰমণ আৰু পৰ্যটন সমাৰোহ-২০১৯ত অংশগ্ৰহণ কৰে।
অসমৰ স্বাস্থ্য আৰু উচ্চ শিক্ষাৰ ক্ষেত্ৰখনত বাংলাদেশৰ ছাত্ৰ-ছাত্ৰী আৰু ৰোগী সকলৰ সম্ভাৱনীয়তাৰ ওপৰত সমাৰোহখনত মুকলিকৈ আলাপ কৰা হয়।
দুয়োটা দিশৰ সম্ভাৱনীয়তাৰ ওপৰত লক্ষ্যৰাখি পূবলৈ চোৱা নীতি পৰিক্ৰমা বিভাগৰ সহযোগিতাত ৰাজ্যখনৰ ভালেমান ব্যক্তিগত খণ্ডৰ শিক্ষানুষ্ঠান আৰু স্বাস্থ্য সেৱা প্ৰতিষ্ঠানে সমাৰোহখনত অংশগ্ৰহণ কৰে।
অসম চৰকাৰৰ ফালৰ পৰা পূবলৈ চোৱা নীতি বিভাগৰ উপ-সম্পাদক চাজাদ আলম আৰু নিলাক্ষী হাজৰিকাকে ধৰি অসম পৰ্যটন বিভাগৰ চাৰিজন বিষয়াই সমোৰোহত অংশ লয়।
তিনিদিন ধৰি বিভিন্ন দেশক প্ৰতিনিধিত্ব কৰা প্ৰদৰ্শনী, আলোচনা চক্ৰ আৰু সভাত ভালেসংখ্যক ব্যক্তিগতখণ্ডৰ আগ্ৰহী অংশীদ্বাৰী দলে অংশগ্ৰহণ কৰে।
বংগবন্ধু আন্তঃৰাষ্ট্ৰীয় সমাৰোহ কেন্দ্ৰত থকা মিডিয়া বাজাৰ আলোচনা চক্ৰ গৃহত অসমl চিকিৎসা পৰ্যটনৰ সম্ভাৱনীয়তা (Prospect of Medical Tourism in Assam) শীৰ্ষক এখন আলোচনা চক্ৰ অনুষ্ঠিত হয়।
আনহাতে, সমাৰোহখনৰ শেষৰফালে ধাকাত থকা ভাৰতীয় উচ্চায়ুক্তই উচ্চ শিক্ষাৰ ক্ষেত্ৰখন সন্দৰ্ভত ব্যক্তিগত শিক্ষানুষ্ঠান সমূহৰ লগত দেফ’দিল ইণ্টাৰনেশ্যনেল য়ুনিভাৰ্চিটি, আমেৰিকান ইণ্টাৰনেশ্যনেল য়ুনিভাৰ্চিটি আৰু ব্ৰাক (BRAK) য়ুনিভাৰ্চিটিৰ সৈতে শৈক্ষিক আৰু প্ৰযুক্তিগত সহযোগিতাৰ ক্ষেত্ৰত এখন আলোচনা চক্ৰ অনুষ্ঠিত কৰে।
