বংগৰ নিৰ্বাচনক কেন্দ্ৰ কৰি ক্ৰমাৎ উত্তপ্ত হৈছে মোদী আৰু মমতাৰ বাকযুদ্ধ।
দেওবাৰে কলকাতাৰ বিগ্ৰেড পেৰেড গ্ৰাউণ্ডত অনুষ্ঠিত মেগা ৰেলীত প্ৰধানমন্ত্ৰী মোদীয়ে অজস্ৰ বিজেপি সমৰ্থকক সম্বোধন কৰি কয় যে মমতা বেনাৰ্জীয়ে বংগৰ জনতাক বিশ্বাসঘাটকতা কৰিছে।
ক্ষমতালৈ আহিলে বিজেপিয়ে ৰাজ্যখনত ‘আচল পৰিবৰ্তন’ আনিব বুলিও মোদীয়ে কয়।
প্ৰধানমন্ত্ৰীজনে বংগত গণতন্ত্ৰক শক্তিশালী কৰিবৰ বাবেও বিজেপিক জয়যুক্ত কৰিবলৈ আহ্বান কৰে।
”বংগৰ জনতাই উন্নয়ন. শান্তি, সোণাৰ বাংলা বিচাৰে। আমি ‘আচল পৰিবৰ্তন’ আনিম”। প্ৰধানমন্ত্ৰীয়ে ঘোষণা কৰে।
তদুপৰি অহা ২৫ বছৰটো বংগৰ উন্নয়নৰ বাবে অতি প্ৰয়োজনীয় বুলিও মোদীয়ে কয়।
”২০৪৭ত, ভাৰতে যেতিয়া স্বাধিনতাৰ শতবৰ্ষ উদযাপন কৰিব, বংগই দেশখনক পুনৰ নেতৃত্ব প্ৰদান কৰিব।” মোদীয়ে কয়- ”অহা পাঁচ বছৰত ইয়াত হ’বলগা উন্নয়নে অহা ২৫ বছৰলৈ ৰাজ্যখনৰ উন্নয়নৰ বুনিয়াদ গঠন কৰিব।”
ৰাজ্যখনৰ মুখ্যমন্ত্ৰী মমতা বেনাৰ্জীক ‘দিদি’ সম্বোধনেৰে কটাক্ষ কৰি মোদীয়ে কয় যে দিদিৰ নিজৰ ওপৰতে নিয়ন্ত্ৰণ নাই, তেওঁ ৰিমোট কণ্ট্ৰলত চলে।
”মই দিদিক বহু বছৰৰ পৰা জানো। এই দিদিজনী একে নহয়, যি বাওঁপন্থী শাসনৰ বিৰুদ্ধে যুঁজিছিল।” মোদীয়ে কয়।
Thank you Kolkata!
Thank you West Bengal.
BJP is the state’s preferred choice. pic.twitter.com/5C9Fzvv5CF
— Narendra Modi (@narendramodi) March 7, 2021
তদুপৰি ভাৰতীয় জন সংঘৰ প্ৰতিষ্ঠাপক শ্যামা প্ৰসাদ মুখাৰ্জীক সোঁৱৰণ কৰি মোদীয়ে কয় যে বিজেপিত বংগৰ ডিএনএ আছে।
”বিজেপিয়ে বংগৰ ধাৰ কেতিয়াও শোধ কৰিব নোৱাৰে কিন্তু ইয়াক এটা অনন্য মাত্ৰালৈ লৈ যাব বিচৰা হৈছে।” মোদীয়ে কয়।
ইয়াৰ পাছতে বংগৰ মুখ্যমন্ত্ৰী মমতা বেনাৰ্জীয়ে প্ৰধানমন্ত্ৰী মোদীক মুখামুখি বিতৰ্কৰ বাবে আহ্বান জনায়।
মোদী কলকাতালৈ অহাৰ সময়ত মমতা ব্যস্ত আছিল উত্তৰ বংগৰ শিলিগুৰিৰ নিৰ্বাচনী সভাত।
”খেলা হ’বে”- এইদৰে স্বাভাৱিক উদ্দান্ত কণ্ঠেৰে মমতাই কয়- ”আপুনি তাৰিখ আৰু সময় ঠিক কৰক। মোদী, মই আপোনাক মুখামুখী খেলাৰ বাবে প্ৰত্যাহ্বান জনাইছো। খেলা হ’বে! কওক আপুনি কেতিয়া খেলিব বিচাৰে।”
”আমি যুঁজিম, আমি কৰিম, আমি জিকিম। ভাৰতৰ পৰা মোদীক আঁতৰাম, বিজেপিক আঁতৰাম।” মমতাই কয়- ”যি আমাৰ স’তে খেলি-মেলি কৰে, চূড়মাৰ হৈ যায়।”
তদুপৰি তেওঁ কয় যে মোদীয়ে বংগত সপোন বিক্ৰী কৰিবলৈ আহিছে, যি সময়ত দেশত ইন্ধনৰ মূল্য বাঢ়ি গৈ আছে আৰু বেংকবিলাক বিক্ৰী হৈ গৈছে।
বিগ্ৰেড পেৰেডত মোদীৰ ভাষণক কটাক্ষ কৰি তেওঁ কয় যে মোদীয়ে সদায় লিখিত স্ক্ৰীপ্টমতে ভাষণ দিয়ে।
”তেওঁ বেংগলী ভাষা কৈ বংগৰ জনতাৰ স’তে যোগ হ’ব বিচৰা নাই, কিন্তু লিখিত স্ক্ৰীপ্টৰ দ্বাৰা হ’ব বিচাৰিছে। মই বহুত সহ্য কৰিলো, কিন্তু এই প্ৰধানমন্ত্ৰীজনে বহু বেছি ফাঁকি মাৰে।” তেওঁ কয়।
”তেওঁ সোণাৰ বাংলাৰ কথা কৈছে। কিন্তু সোণৰ ভাৰতৰ কি হৈছে?” মমতাই প্ৰশ্ন কৰে- ”এলপিজিৰ দাম বাঢ়ি গৈ আছে, মোদীৰ তলাবাজীও বাঢ়ি গৈ আছে। তেওঁ দিল্লীখন বেচিলে। এয়াৰ ইণ্ডিয়াৰ পৰা বিএছএনএললৈকে, তেওঁ ৰাজহুৱা সম্পত্তিও বিক্ৰী কৰি গৈ আছে।”
ক’ভিড-১৯ ভেকচিনেচন চাৰ্টিফিকেটত মোদীৰ ফটোগ্ৰাফ সম্বলিত হোৱাক লৈও মমতা বেনাৰ্জী সোচ্চাৰ হয়।
”কভিডৰ সময়ত, তেওঁ নাহিল। মই ৰাস্তাত উলাই গৈছিলো।” তেওঁ কয়- ”আজি, তেওঁৰ মুখখন ক’ভিড ভেকচিন চাৰ্টিফিকেটত লগোৱা হৈছে। এয়া আমাৰ বিজ্ঞানীসকল, যিসকলে কঠোৰ পৰিশ্ৰম কৰিছে।”
দেওবাৰে তৃণমূলৰ প্ৰধান নেতৃগৰাকীয়ে শিলিগুৰিত এটা পদযাত্ৰাৰ নেতৃত্ব লয়।
এলপিজি চিলিণ্ডাৰৰ মূল্য বৃদ্ধিৰ প্ৰতিবাদত কৰা পদযাত্ৰাটোৰ ফটোৱে ইতিমধ্যে ৰাজনৈতিক মহলত ব্যাপক চৰ্চাৰ সৃষ্টি হৈছে।
মমতাৰ উপৰিও সতীৰ্থ মন্ত্ৰী চন্দ্ৰিমা ভট্টাচাৰ্য, সাংসদ মিমি চক্ৰৱৰ্তী আৰু নছৰৎ জাহানো প্ৰতিবাদী যাত্ৰাটোত উপস্থিত থাকে।
