বৃহস্পতিবাৰে এআইএমআইএমৰ সদস্য আসাদুদ্দিন ওৱেইচিৰ ওপৰত হোৱা আক্ৰমণৰ পিছত চৰকাৰে আগবঢ়োৱা ‘Z’ নিৰাপত্তা আৱৰণ প্ৰত্যাখ্যান কৰিছে ওৱেইচিয়ে।
লোকসভাত ভাষণ প্ৰদান কৰি ওৱেইচিয়ে চৰকাৰক বেআইনী কাৰ্যকলাপ প্ৰতিৰোধ আইন (UAPA) ৰ কঠোৰ ব্যৱস্থাৰে আক্ৰমণকাৰী সকলক অভিযুক্ত কৰিবলৈ আহ্বান জনায় আৰু দেশত উগ্ৰবাদ বন্ধ কৰিবলৈ আহ্বান জনায়।
“মই Z শ্ৰেণীৰ সুৰক্ষা নিবিচাৰো। মই আপোনালোক সকলোৰে সমপৰ্য্যায়ৰ প্ৰথম শ্ৰেণীৰ নাগৰিক হ’ব বিচাৰো। যিসকলে মোৰ ওপৰত গুলী চালনা কৰিছিল তেওঁলোকৰ বিৰুদ্ধে UAPA কিয় আৰোপ কৰা হোৱা নাই?”- ওৱেইচিয়ে কয়।
তেওঁ লগতে কয়, “মই জীয়াই থাকিব বিচাৰো, ক’ব বিচাৰো। দৰিদ্ৰসকল সুৰক্ষিত থাকিলে মোৰ জীৱন সুৰক্ষিত হ’ব। যিসকলে মোৰ গাড়ীত গুলী চালনা কৰিছিল তেওঁলোকক মই ভয় নকৰোঁ।”
উল্লেখ্য যে বৃহস্পতিবাৰে পশ্চিম উত্তৰ প্ৰদেশৰ হাপুৰত বিধানসভা নিৰ্বাচনৰ বাবে প্ৰচাৰ চলাই দিল্লীলৈ উভতি অহাৰ সময়তে ওৱেইচিৰ বাহনত গুলীচালনা কৰা হৈছিল।
লোকসভাত ওৱেইচিৰ বক্তব্যৰ পিছতে কেন্দ্ৰীয় বাণিজ্য মন্ত্ৰী পীয়ুষ গোৱেলে কয় যে ৰাজ্য চৰকাৰে অপৰাধীসকলক গ্ৰেপ্তাৰ কৰিছে আৰু আক্ৰমণত ব্যৱহৃত অস্ত্ৰ আৰু বাহনো জব্দ কৰিছে।
তেওঁ লগতে অহা সোমবাৰে গৃহ মন্ত্ৰী অমিত শ্বাহে লোকসভাত এই সন্দৰ্ভত বক্তব্য ৰাখিব বুলিও জানিবলৈ দিয়ে।
