২০২৪ চনৰ নিৰ্বাচনত ভাৰতকে ধৰি অধিকাংশ দেশৰ শাসকীয় চৰকাৰে পৰাস্ত হৈছে। ফেচবুকৰ প্ৰতিষ্ঠাপক তথা মেটাৰ চিইঅ’ মাৰ্ক জুকাৰবাৰ্গে যোৱা শুকুৰবাৰে জো ৰ’গানৰ জনপ্ৰিয় প’ডকাষ্ট চেনেলত দিয়া এক সাক্ষাৎকাৰত এই দাবী কৰে। ইয়াৰ বাবে তেওঁ ক’ৰ’না কালত ৰাজহুৱা সেৱা আৰু সামগ্ৰীৰ মূল্যবৃদ্ধিকে দায়ী কৰিছিল।
ইয়াকে লৈ ভাৰতীয় ৰাজনীতিত তোলপাৰ লাগে। অৱশেষত এই সন্দৰ্ভত মুখ খোলে কেন্দ্ৰীয় মন্ত্ৰী ৰে’ল মন্ত্ৰী অশ্বিনী বৈষ্ণৱে। এক্স হেণ্ডেলত দিয়া এটা পোষ্টত মন্ত্ৰীগৰাকীয়ে দাবী কৰে যে জুকাৰবাৰ্গৰ মন্তব্য “প্ৰকৃতে ভুল আৰু হতাশাজনক”।
মাৰ্ক জুকাৰবাৰ্গে দৰাচলতে কি কৈছিল? প’ডকাষ্টৰ এক সাক্ষাৎকাৰত মেটাৰ মুৰব্বীগৰাকীয়ে কয়, “২০২৪ সমগ্ৰ বিশ্বতে নিৰ্বাচনী বছৰ আছিল আৰু আন বহু ডাঙৰ দেশৰ লগতে ভাৰততো নিৰ্বাচন হৈছিল। ইয়াত বৰ্তমানৰ ক্ষমতাসীনসকলে মূলতঃ প্রতিটো নির্বাচনতে পৰাস্ত হৈছে। আচলতে কোভিড কালত অৰ্থনৈতিক নীতিৰ বাবেই হওক বা কোভিড মোকাবিলা কৰাৰ ক্ষেত্ৰত চৰকাৰৰ পদ্ধতিৰ বাবেই হওক – বিশ্বজুৰি ইয়াৰ নেতিবাচক প্ৰভাৱ পৰিছে।”
জুকাৰবাৰ্গৰ এই বিস্ফোৰক মন্তব্যৰ বিৰুদ্ধে সৰৱ হৈছে ৰে’ল মন্ত্ৰী অশ্বিনী বৈষ্ণৱ। তেওঁ ফেচবুকৰ প্ৰতিষ্ঠাপকজনৰ এই মন্তব্যক “বাস্তৱিকতে ভুল” বুলি অভিহিত কৰে। এক্স-হেণ্ডেলৰ পোষ্টটোত তেওঁ লিখিছে, “বিশ্বৰ সৰ্ববৃহৎ গণতন্ত্ৰ হিচাপে ভাৰতত ৬৪ কোটিৰো অধিক ভোটাৰক লৈ ২০২৪ চনৰ নিৰ্বাচন অনুষ্ঠিত হৈছে। ভাৰতৰ জনসাধাৰণে প্ৰধানমন্ত্ৰী নৰেন্দ্ৰ মোডীৰ নেতৃত্বত এন ডি এৰ ওপৰত তেওঁলোকৰ আস্থা ৰাখিছে। আচলতে ৮০ কোটি ডলাৰৰ বিনামূলীয়া খাদ্য, ২.২ বিলিয়ন ডলাৰৰ বিনামূলীয়া ভেকচিন আৰু সমগ্ৰ বিশ্বৰ দেশসমূহক সাহায্য প্ৰদান কৰি ভাৰতক দ্ৰুতগতিত বৃহৎ অৰ্থনীতি হিচাপে গঢ়ি তোলাৰ বাবে তৃতীয়বাৰৰ বাবে প্ৰধানমন্ত্ৰীৰ জয় সুশাসন আৰু জনসাধাৰণৰ আস্থাৰ প্ৰমান। জুকাৰবাৰ্গৰ এনে ভুল তথ্য হতাশাজনক। আহক আমি তথ্য আৰু বিশ্বাসযোগ্যতা বজাই ৰাখোঁ।”
অনুমান কৰা হৈছে যে জুকাৰবাৰ্গে হয়তো আমেৰিকাৰ ভৱিষ্যত ৰাষ্ট্ৰপতি ড’নাল্ড ট্ৰাম্পক সন্তুষ্ট কৰিবলৈ এনে মন্তব্য কৰিছে। ইতিমধ্যে আমেৰিকাৰ ৰাষ্ট্ৰপতি জো বাইডেনে মেটা নেতাগৰাকীৰ এই পদক্ষেপক সঁচাকৈয়ে লজ্জাজনক বুলি অভিহিত কৰিছে। তেওঁৰ সতৰ্কবাণী: যদি টেক জায়ান্টসকলে নিজৰ নীতি আন দেশৰ ওপৰত জোৰকৈ প্ৰয়োগ কৰিবলৈ চেষ্টা কৰে তেন্তে ইয়াৰ বিধ্বংসী পৰিণতি হ’ব।
