বুধবাৰে কংগ্ৰেছৰ প্ৰতিবাদৰ সময়ত আৰক্ষীয়ে প্ৰয়োগ কৰা কন্দুৱা গেছত আক্ৰান্ত হৈ প্ৰতিবাদত অংশগ্ৰহণ কৰা মৃদুল ইছলামৰ মৰ্মান্তিক ঘটনাত উদ্বেগ প্ৰকাশ কৰিছে অসম নাগিৰক সমাজে।
অসম নাগৰিক সমাজৰ সভাপতি অজিত কুমাৰ ভূঞা আৰু সাধাৰণ সম্পাদক পৰেশ মালাকাৰ প্ৰেৰণ কৰা এক প্ৰেছ বিবৃতিত পুলিচী বৰ্বৰতাৰ বিৰুদ্ধে সকলোকে প্ৰতিবাদ কৰিবলৈ আহ্বান জনাইছে।
বিবৃতিটোত কোৱা হৈছে, ‘’কালি কংগ্ৰেছৰ প্ৰতিবাদত অংশগ্ৰহণ কৰা মৃদুল ইছলামৰ মৃত্যুত আমি স্তম্ভিত হৈছোঁ। সাংবাদিক সকলকো কেনেকৈ ঘাইল কৰা হ’ল! আহক, আমি সকলোৱে ইয়াক একমুখে গৰিহণা দিওঁ!’’
তেওঁলোকে কয়, ‘’ঘটনাটোৱে আমাৰ মনত বহুকেইটা প্ৰশ্নৰ উদ্ৰেক কৰে। প্ৰতিবাদী জনতাক নিয়ন্ত্ৰণ কৰিবলৈ আৰক্ষীয়ে সচৰাচৰ অবলম্বন কৰা পদ্ধতি লৈছিলনে? ইয়াৰ আগতে কন্দুৱা গেছে মানুহ মৰা আমি শুনা নাই। তেনেহ’লে কালি এই ঘটনাটো কেনেকৈ ঘটিল? নিশ্চয়কৈ ইয়াৰ উপযুক্ত তদন্ত হ’ব লাগিব আৰু দোষীয়ে শাস্তি পাব লাগিব।’’
তেওঁলোকে প্ৰশ্ন কৰে, ‘’আচলতে এইবোৰ হৈছে কি? আমি এখন সভ্য সমাজত আছোঁ নে এক নিষ্ঠুৰ পুলিচী নৈৰাজ্যৰ মাজত আছোঁ? সংবিধানৰ অনুচ্ছেদ ১৯(খ)ই আমাক প্ৰদান কৰা প্ৰতিবাদৰ অধিকাৰ নোহোৱা হৈ গ’ল নেকি?’’
বিবৃতিটোত লগতে কোৱা হৈছে, ‘’পৰিস্থিতি ইমানেই বেয়া যে তাক প্ৰকাশ কৰিবলৈ আমাৰ ভাষা নোহোৱাৰ দৰে হৈছে! এই কথাবোৰ আমি গভীৰভাবে চিন্তা কৰাৰ প্ৰয়োজন আহি পৰিছে।’’
