অসম সংখ্যালঘু সংগ্ৰাম পৰিষদৰ কেন্দ্ৰীয় সম্পাদক আবু বক্কৰ ছিদ্দিকৰ সহযোগত পৰিষদৰ বিশ্বনাথ জিলা সমিতিয়ে চৌকত আলীৰ বুজলৈ বিশ্বনাথ চাৰিআলি মোক্তাৱ মাদ্ৰাছা প্ৰাঙ্গনত দেওবাৰে এখন সংবাদ-মেলৰ আয়োজন কৰে। উক্ত সংবাদ মেলৰ জৰিয়তে পৰিষদে বিশ্বনাথৰ বৰ্বৰ কাণ্ডক তীব্ৰ ভাষাৰে গৰিহণা দিয়াৰ লগতে ৰাজ্যখনৰ সকলো ধৰ্মাৱলম্বী লোকক ৰঙালী বিহুৰ শুভেচ্ছা জনায়।
সংবাদ-মাধ্যমৰ জৰিয়তে পৰিষদৰ বিষয়ববীয়াসকলে অসম চৰকাৰক দাবী উত্থাপন কৰি কয় যে বিশ্বনাথত সংঘটিত হোৱা অমানৱীয় কাণ্ডৰ লগত জড়িত প্ৰতিজন অভিযুক্তক অতিশীঘ্ৰে কৰায়ত্ব কৰি জেল হাজোতত ৰাখি ফাৰ্ষ্ট ট্ৰেক আদালতৰ জৰিয়তে কঠোৰতম শাস্তি প্ৰদান কৰিব লাগে।
উক্ত ঘটনাটোৰ আঁৰত জড়িত মূল ষড়যন্ত্ৰকাৰীসকলক আৰক্ষীয়ে চিনাক্ত কৰি আইনমতে শাস্তি দিয়াৰ বাবে দেশৰ উচ্চ পৰ্যায়ৰ ন্যায়ধীশৰ জৰিয়তে নিৰপেক্ষ ন্যায়িক তদন্ত কৰিব লাগে বুলি দাবী কৰি পৰিষদে লগতে ভুক্তভোগী ব্যৱসায়ী চৌকত আলীক অমানৱীয় অত্যাচাৰ কৰাৰ ফলত তেওঁৰ ব্যৱসায় বন্ধ হৈ পৰাৰ বাবে পৰিয়ালক পোহপাল দিবলৈ আৰু তেওঁৰ উন্নত চিকিৎসাৰ বাবে এককালীন আৰ্থিক সাহায্য প্ৰদান কৰাৰ দাবী জনায়।
তদুপৰি, চৌকত আলীৰ পৰিয়ালৰ উপযুক্ত কোনো সদস্যক এটি চৰকাৰী চাকৰি প্ৰদান কৰিব লাগে বুলিও পৰিষদে দাবী কৰে।
আনহাতে, উক্ত ঘটনাৰ আলম লৈ যাতে কোনো অপশক্তিয়ে সাম্প্ৰদায়িক বিবাদ সৃষ্টি কৰিব নোৱাৰে তাৰ প্ৰতি প্ৰশাসনে তীক্ষ্ণ দৃষ্টি ৰখাৰ লগতে তেনে অপশক্তিক কঠোৰ হাতেৰে দমন কৰাৰ বাবে সংগ্ৰাম পৰিষদে দাবী জনায়।
ইপিনে,পৰিষদৰ জিলা সভাপতি আব্দুল হাকিম চিকদাৰ আৰু সাধাৰণ সম্পাদক নাজিৰ আহমেদে জিলা প্ৰশাসনক ধন্যবাদ জনাই ৰাইজক আইনৰ ওপৰত আস্থা আৰু বিশ্বাস ৰাখি কোনোধৰনৰ অপ্ৰীতিকৰ পৰিস্থিতি সংঘটিত নকৰিবলৈ আহ্বান জনায়।
উক্ত সংবাদ মেলত পৰিষদৰ উপ সভাপতি আ: মোনাফ চৌধুৰী, জিলা সমিতিৰ কাৰ্যকৰী সভাপতি দিলোৱাৰ হুছেইন, উপ সভাপতি ৰবিউল হাছান, সা: সম্পাদক বাহাজুদ্দিন জাকাৰীয়াকে ধৰি পৰিষদৰ জিলা তথা আঞ্চলিক পৰ্যায়ৰ নেতাসকল উপস্থিত থাকে ।
