যোৱা ৩১জানুৱাৰীত বৰপেটা জিলাৰ বাঘবৰ ৰাজহ চক্ৰৰ ১ন নং বৰদলনি গাঁৱৰ৪১৩ নং দাগত থকা শ্ৰীশ্ৰী বৰপেটা সত্ৰৰ ৪০ বিঘা ভূমি বে-দখল কৰি বসবাস কৰি থকা বঙ্গীয় মূলৰ মুছলমান লোকক চৰকাৰী নীতি-নিয়ম অনুসৰি জাননী জাৰি কৰি বেদখল উচ্ছেদ প্ৰক্ৰিয়া আৰম্ভ কৰি চাৰিওফালে সীমা নিৰ্ধাৰণ কৰি খুটি পুতি দিছিল।
ইপিনে, দখলকাৰীসকলেও চৰকাৰৰ নিৰ্দেশনা মানিলৈ দখল এৰি দিবলৈ সাজু হয় আৰু অধিক সংখ্যকে দখল এৰি দিছে।
বাকীসকলে দখল এৰাৰ ব্যৱস্থা কৰাৰ আগতে বাঘবৰ সমষ্টিৰ বিধায়ক শ্বেৰমান আলি আহমেদে উক্ত ভূমি খণ্ডত উপস্থিত হৈ অভৱ্য আচৰণ কৰে আৰু অসম চৰকাৰে নিৰ্ধাৰণ কৰি দিয়া চাৰিসীমাৰ খুটি উভালি পেলায়।
বিধায়ক আহমেদে অসম চৰকাৰৰ লগতে এই উচ্ছেদ কাৰ্য্যত জৰিত থকা লোককো ভাবুকি দিয়ে।
অসম সত্ৰ মহাসভাই এক বিবৃতিত কয় যে এজন জনপ্ৰতিনিধি তথা আইন প্ৰণয়ন কৰা সকলে যেতিয়া আইন ভঙ্গ কৰিবলৈ আহ্বান জনায় অসমীয়া সমাজৰ বাবে ইয়াতকৈ দুৰ্ভাগ্যৰ কথা কি হব পাৰে।
মিঞা মিউজিয়ামৰ দৰে বিতৰ্কত সাঙোৰ খাই পৰা এনেকুৱা দুস্কৃতিকাৰী বিধায়ক হিচাপে থকাটো বিপদজনক আৰু অসম বিধান সভাৰ পবিত্ৰতা বিনষ্ট কৰিব বুলি উল্লেখ কৰি অসম সত্ৰ মহাসভাই শ্বেৰমান আলি আহমেদক বিধায়কৰ পদৰ পৰা অব্যাহতি দিবলৈ অসমৰ মহামান্য ৰাজ্যপাল মহোদয়ৰ ওচৰত আবেদন জনায়।
মহাসভাই প্ৰশাসন তথা অসম চৰকাৰক শ্বেৰমান আলি আহমেদৰ ওপৰত বিহিত আইনী ব্যৱস্থা গ্ৰহন কৰিবলৈকো দাবী জনায়।
