ৰাজ্যত ক্ৰমান্বয়ে বৃদ্ধি পাইছে সাংবাদিকক আক্ৰমণ কৰাৰ ঘটনা।
এইবাৰ একাংশ জুৱাৰীয়ে সাংবাদিকক প্ৰহাৰ কৰাৰ গুৰুতৰ অভিযোগ উত্থাপিত হৈছে।
অসমীয়া প্ৰতিদিন কাকতৰ দক্ষিণ কামৰূপৰ মিৰ্জাৰ সংবাদদাতা মিলন মহন্তক বিদ্যুতৰ খুঁটাত বান্ধি প্ৰহাৰ কৰাৰ ঘটনা সংঘটিত হৈছে।
জানিব পৰা মতে মিৰ্জা অঞ্চলত জুৱাৰ ৰমৰমীয়া বেহাৰ বিৰুদ্ধে মিলনে দীৰ্ঘদিনে বাতৰি পৰিৱেশন কৰি আহিছিল।
আৰক্ষীৰ এক সুত্ৰই জনোৱা অনুসৰি অভিযুক্ত সঞ্জয় ঠাকুৰীয়া আৰু অন্যান্য আক্ৰমণকাৰীৰ বিৰুদ্ধে পলাশবাৰী থানাত গোচৰ ৰুজু কৰিছে ভুক্তভোগী সাংবাদিকজনে।
আৰক্ষীয়ে গোচৰ ৰুজু কৰি ইতিমধ্যে তদন্ত প্ৰক্ৰিয়া আৰম্ভ কৰিছে। বৰ্তমানলৈকে জানিব পৰা নাই গোচৰ নম্বৰ।
ঘটনা সন্দৰ্ভত ভুক্তভোগী সাংবাদিকজনে সংবাদ মাধ্যমৰ আগত কয় ‘আমি এই অঞ্চলত চলি অহা অবৈধ জুৱাৰ বিৰুদ্ধে বাতৰি প্ৰকাশ কৰি আহিছিলো। তেনে ক্ষেত্ৰত সঞ্জয় ঠাকুৰীয়া নামৰ মাফিয়াগৰাকীয়ে লগত চাৰি-পাঁচগৰাকী লোকক লৈ তিনিআলি চ’কত বজাৰ কৰি থকা অৱস্থাত প্ৰহাৰ কৰাৰ লগতে বিদ্যুতৰ খুঁটাত বান্ধি প্ৰহাৰ কৰিছে। কিয় জুৱাৰ বিৰুদ্ধে বাতৰি কৰিছো আৰু কিয় তেওঁক ভু-মাফিয়া বুলি লিখো এনেকৈ গালি পাৰি মোক প্ৰহাৰ কৰিছে।‘
তেওঁ লগতে কয় ‘জুৱাৰীজনে মোক তেওঁৰ পৰা ১০০০০ টকা ফোন কৰি দাবী কৰা আৰু ভাবুকি দিয়া বুলি প্ৰহাৰ কৰিছে। মোৰ মোবাইলটো কাঢ়ি নি ভাঙিব বিচাৰিছিল। মোক প্ৰহাৰ কৰাৰ সময়ত ভিডিঅ’ও কৰিছিল সিহঁতে।‘
ইপিনে, স্থানীয় লোকে এই ঘটনা প্ৰত্যক্ষ কৰি সাংবাদিকজনক উদ্ধাৰ কৰি হাতৰ বান্ধ খুলি দিয়ে। তেনে সময়তে পলাশবাৰী আৰক্ষীক খবৰ দিয়াত আৰক্ষী উপস্থিত হোৱাত অভিযুক্ত লোককেইজনে পলায়ন কৰে বুলি সাংবাদিকজনে উল্লেখ কৰে।
তদুপৰি, সঞ্জয় ঠাকুৰীয়াই অসমীয়া প্ৰতিদিন কাকতৰ সাংবাদিকজনক হত্যাৰ ভাবুকি দিয়া বুলি অভিযোগ তোলে।
সাংবাদিক মিলন মহন্তক প্ৰহাৰ কৰা ঘটনাক গৰিহণা দিয়ে মানৱ অধিকাৰ কৰ্মী তথা সমাজ কৰ্মী ডঃ দিব্যজ্যোতি শইকীয়াই।
নৰ্থ ইষ্ট নাওৰ সাংবাদিকৰ আগত প্ৰতিক্ৰিয়া প্ৰকাশ কৰি ডঃ শইকীয়াই কয় ‘তিনিচুকীয়াত সন্দেহজনকভাৱে সাংবাদিকৰ মৃত্যু আৰু আজি নিৰ্ভীক সাংবাদিক মিলন মহন্তক প্ৰহাৰ সঁচাকৈয়ে গৰিহণাযোগ্য। জুৱা খেলৰ বিৰুদ্ধে মাত মাতিবলৈ যাওঁতে বা সমাজ সচেতনমূলক বাতৰি কৰিবলৈ যাওঁতে বিদ্যুতৰ খুঁটাত বান্ধি ৰাখিছে। এই ঘটনাসমূহে প্ৰশাসন আৰু অদূৰ ভৱিষ্যতৰ বাবে নৱ প্ৰজন্মৰ সামাজিক ব্যাধিলৈ ৰূপান্তৰিত হ’ব। দুষ্কৃতিকাৰীৰ ইমানেই সাহস হৈ যাব যে কাকোৱেই নমনা হৈ যাব।‘
‘চৰকাৰ তথা আৰক্ষী প্ৰশাসনে এইবোৰ ঘটনা নিয়ন্ত্ৰণ কৰাৰ লগতে এই ঘটনাৰ সৈতে জড়িতসকলক দৃষ্টান্তমূলক শাস্তি প্ৰদান কৰিব লাগে। তিনিচুকীয়াৰ সাংবাদিকৰ সন্দেহজনক মৃত্যুৰো এক উচিত তদন্ত হ’ব লাগে।‘ শইকীয়াই লগতে কয়।