উজনিত আত্মসমৰ্পণ দুই আলফা(স্বা) কেডাৰৰ
শনিবাৰে চৰাইদেউ জিলাৰ সোণাৰিত আলফাৰ দুই সক্ৰিয় কেডাৰে আৰক্ষীৰ সন্মুখত আত্মসমৰ্পণ কৰিছে।
কেডাৰ দুজনৰ নাম নয়ন পাটমাউত ওৰফে বিকাশ অসম আৰু দীপক হাতীবৰুৱা ওৰফে দিব্য অসম। এই দুই কেডাৰৰ ঘৰ চৰাইদেউ আৰু ডিগবৈত।
অঞ্চলটোত আলফাৰ কাৰ্যকলাপ ৰোধ কৰিবলৈ অসম আৰক্ষীৰ প্ৰচেষ্টা অব্যাহত থকাৰ সময়ত এই দুই কেডাৰে আত্মসমৰ্পন কৰিছে।
সূত্ৰ অনুসৰি, ২৫টা সজীৱ গুলীৰ সৈতে থাইলেণ্ডত নিৰ্মিত দুটা ৯ এম এম পিষ্টলক আৰু দুটা গ্ৰেনেড আৰক্ষীক জমা দিছে কেডাৰ দুজনে।
ইতিমধ্যে কেডাৰ দুজনক গুৱাহাটী আৰক্ষীৰ বিশেষ শাখালৈ প্ৰেৰণ কৰা হৈছে।
উল্লেখ্য যে শেহতীয়াকৈ উজনি অসমত পুনৰ সক্ৰিয় হৈ উঠিছে আলফা(স্বাঃ)। আলফাই বিভিন্ন ব্যৱসায়ীলৈ ধন দাবী পত্ৰ প্ৰেৰণ কৰিছে। ইয়াৰ লগতে ধাৰাবাহিকভাবে বিভিন্ন যুৱক-যুৱতীক আলফাত যোগদান কৰি আছে। ইয়াৰ মাজতে এই দুই সদস্যৰ আত্মসমৰ্পণে অসম আৰক্ষীলৈ কিছু পৰিমাণে স্বস্তি কঢ়িয়াই আনিছে।