”হিমন্ত বিশ্ব শৰ্মা অসমৰ মুখ্যমন্ত্ৰী হোৱাৰ পাছত অতি দ্রুত হাৰত থলুৱা মানুহৰ মাটি – ভেটি বহিৰাগত বণিয়াৰ দখললৈ যাব ধৰিছে। থলুৱা জনজাতীয় মানুহক ভূমিহীন কৰি চিৰদিনলৈ ৰাজনৈতিকভাৱে পংগু কৰাৰ এক বৃহৎ ষড়যন্ত্র মূখ্যমন্ত্রী হিমন্ত বিশ্ব শর্মাই আৰম্ভ কৰাই নহয়, বহুদূৰ আগুৱাই লৈ গৈছে। কেৱল কমিছন আৰু গাদী ৰক্ষাৰ স্বাৰ্থত বিশেষকৈ জনজাতীয় মানুহক নিজৰ পৈতৃক ভূমিৰ পৰা বিতাড়িত কৰি সেই মাটি অবৈধভাবে আদানী আম্বানী ৰামদেৱ – জয় শ্বাহৰ দৰে বহিৰাগতক গটাই দিবলৈ হিমন্ত বিশ্ব অতি উৎসাহেৰে আগুৱাই আহিছে।”
নতুন দিল্লীত আজি এক সংবাদমেলযোগে এই বিস্ফোৰক অভিযোগ উত্থাপন কৰিছে ৰাজ্যসভাৰ সাংসদ তথা জাতীয় দল, অসমৰ সভাপতি অজিত কুমাৰ ভূঞাই। ভূঞাই কয় যে এডভান্টেজ অসমৰ নামত কেৱল মাত্র বণিয়াৰ ‘এডভান্টেজ’ কৰিবলৈ অসমৰ অতি মূল্যবান লাখ লাখ বিঘা মাটি পানীৰ দৰত কোম্পানিক বিক্ৰী কৰিবলৈ সাজু হৈছে অসম চৰকাৰ। গুৰুত্বপূৰ্ণ কিছু তথ্য দাঙি ধৰি ভূঞাই কয় যে- কাৰ্বি আংলঙৰ ২৩ খন গাৱৰ ২০,০০০ কার্বি, আদিবাসী আৰু নগালোকক উচ্ছেদ কৰি সৌৰশক্তি প্রকল্প স্থাপনৰ বাবে ১৮০০০ বিঘা মাটি গৌতম আদানীক গটোৱাৰ সিদ্ধান্ত লোৱা হৈছে।
একেখন জিলাতেই ৫০,০০০ বিঘা মাটি কমপ্রেছদ বায়’গেছ প্রকল্পৰ বাবে মুকেশ আম্বানীক গটোৱাৰ সিদ্ধান্ত গ্রহণ কৰা হৈছে।
পলাশবাৰীৰ ৰামপুৰ অঞ্চলৰ দৰাবিলৰ ১৫০ বিঘা মাটি লজিষ্টিক পার্ক নির্মাণৰ বাবে বহিৰাগত কোম্পানীক গটোৱাৰ সিদ্ধান্ত হৈছে।
পলাশবাৰীৰেই বৰদৱাৰ অঞ্চলৰ ২১০০ ৰো অধিক জনজাতীয় পৰিয়ালক উচ্ছেদ কবি ১৫০০ একৰ ভূমি চেটেলাইট টাউনশ্রীপৰ নামত বহিৰাগত কোম্পানিক গটোৱাৰ সিদ্ধান্ত কাগজে কলমে সম্পূর্ণ হৈছে।
গোলাঘাটৰ ফলঙনী বীজ পামৰ ৭৫ বিঘা মাটি ৰামদেৱক গটোৱাৰ পৰিকল্পনা কৰা হৈছে।
নগাঁৱৰ মিকিৰ বামুণীৰ কেইবাহাজাৰো কাৰ্বি আৰু আদিবাসী লোকক উচ্ছেদ কৰি ২৭৬ বিঘা মাটি ‘এজিউৰ পাৱাৰ’ নামৰ এটা বহিৰাগত কোম্পানীক গটোৱা হৈ গৈছে।
কোকৰাঝাৰ জিলাব পর্বতঝোৰা বাছবাৰী অঞ্চলৰ কেইবাহাজাৰ বড়োলোকক উচ্ছেদ কৰি ৩,৬০০ বিঘা মাটি গৌতম আদানীক গটোৱাৰ সিদ্ধান্ত হৈছে। কাজিৰঙাৰ ৪৫ বিঘা মাটি আদিবাসী মানুহৰ পৰা বৃহৎ হোটেল কোম্পানিক ইতিমধ্যেই গটাই দিয়া হৈছে।
লগতে ভূঞাই কয়, “ এনেদৰে এখন দীঘলীয়া তালিকা। যাৰ বাবে অসমৰ খিলঞ্জীয়া, থলুৱা জনতাই প্রতিবাদৰ পতাকা লৈ ৰাজপথলৈ ওলাই আহিবলৈ বাধ্য হৈছে। বিগত সময়ত আমিও ইয়াৰ প্রতিবাদ কৰিছো আৰু ৰাজ্যসভাতো এই বিষয়ে চৰকাৰক জবাবদিহি কৰিবলৈ চেষ্টা কৰিছো। জাতি মাটি ভেটিৰ শ্লোগান দি ক্ষমতা দখল কৰা বিজেপি দলে মূখ্যমন্ত্রী হিমন্ত বিশ্ব শৰ্মাৰ নেতৃত্বত অসম আৰু অসমীয়া জাতিক বহিৰাগত বৃহৎ বণিয়াৰ সম্পূর্ণ উপনিৱেশ (Colony) ত পৰিণত কৰিছে। গতিকে এই কথা বুজি জনজাতীয় ৰাইজে অবিৰতভাবে প্রতিবাদত মুখৰ হৈ পৰিছে। মন কৰিবলগীয়া যে বিভিন্ন চল-চাতুবীৰে মূখ্যমন্ত্রী শর্মাই এই আন্দোলনতো ভাঙোন আনিবলৈ অহৰহ প্রচেষ্টা চলাইছে। যি দেখা গৈছে, ৰাজ্যখন চলাব নোৱাৰা পৰিস্থিতি এটাত মূখ্যমন্ত্ৰীগৰাকী সোমাই পৰিছে। এনে অৱস্থাত আমি মূখ্যমন্ত্রী শর্মাৰ পদত্যাগ দাবী কৰিছো। অতি উদ্বেগজনক ভাবে খিলঞ্জীয়া মানুহে সম্মুখীন হোৱা এই জ্বলন্ত সমস্যাবোৰ কৌশলেৰে ঢাকি ৰাখিবলৈ মূখ্যমন্ত্রী গৰাকীয়ে অন্যান্য কিছুমান তৰল বিষয় উত্থাপন কৰি ৰাজ্যখনক সম্পূর্ণ ধ্বংসৰ মুখলৈ ঠেলি দিছে। গতিকে এই পৰিস্থিতিত জাতি-মাটি-ভেটিৰ নামত সর্বনাশ মাতি অনা মূখ্যমন্ত্ৰীগৰাকীৰ শাসনত থকাৰ কিবা অধিকাৰ আছেনে!”
