অসমৰ মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে পুনৰ সৰৱ হৈ পৰিছে নিখিল ভাৰত কংগ্ৰেছ কমিটী। মুখ্যমন্ত্ৰীগৰাকীয়ে প্ৰতিষ্ঠিত বিচাৰ প্ৰক্ৰিয়া অনুসৰণ নকৰি কেৱল “মিডিয়া ট্ৰায়েল” আৰু বিচ্যুতিৰ ৰাজনীতিৰ আশ্ৰয় লোৱা বুলি এআইচিচিয়ে গুৰুতৰ অভিযোগ উত্থাপন কৰে। শ্ৰীভূমি জিলা কংগ্ৰেছ কাৰ্যালয়ত আয়োজিত এক সংবাদমেলৰ জৰিয়তে দলটোৱে স্পষ্ট কৰি দিয়ে যে ৰাজহুৱা স্থানত ভিত্তিহীন অভিযোগ কৰাতকৈ চৰকাৰে আইনী পথ গ্ৰহণ কৰা উচিত।
সংবাদমেলত এআইচিচিৰ মিডিয়া কোষৰ আহ্বায়ক নিঘাত আব্বাছে কয় যে যদিহে কংগ্ৰেছ সাংসদ গৌৰৱ গগৈৰ সৈতে পাকিস্তানৰ সম্পৰ্ক থকাৰ কোনো দৃঢ় প্ৰমাণ মুখ্যমন্ত্ৰীৰ হাতত আছে, তেন্তে তেওঁ ৰাজহুৱাভাৱে অভিযোগ কৰাৰ পৰিৱৰ্তে আদালতৰ কাষ চাপিব লাগে আৰু আনুষ্ঠানিকভাৱে এজাহাৰ দাখিল কৰিব লাগে।
আব্বাছে অভিযোগ কৰে যে মুখ্যমন্ত্ৰীৰ মন্তব্যই তেওঁৰ ৰাজনৈতিক হতাশাহে প্ৰতিফলিত কৰিছে আৰু সংবাদ মাধ্যমৰ জৰিয়তে কেৱল ইংগিত দি কংগ্ৰেছ নেতৃত্বৰ ভাৱমূৰ্তি ম্লান কৰাই ইয়াৰ মূল লক্ষ্য। তেওঁ কয়, “ন্যায়পালিকাৰ অধিকাৰ ক্ষেত্ৰত থকা বিষয়সমূহ সংবাদমেলত লঘুভাৱে আলোচনা কৰা অনুচিত।”
প্ৰধানমন্ত্ৰী নৰেন্দ্ৰ মোদী আৰু মুখ্যমন্ত্ৰী শৰ্মাক সমালোচনা কৰি আব্বাছে মন্তব্য কৰে যে বিজেপিৰ জ্যেষ্ঠ নেতাসকলে প্ৰায়েই ৰাজনৈতিক বিৰোধীক “পাকিস্তানলৈ যাওক” বুলি পৰামৰ্শ দিয়ে। তেওঁ পুনৰ কয়, “যদি তেওঁলোকে নিজৰ দাবীৰ ওপৰত ইমান আত্মবিশ্বাসী, তেন্তে তেওঁলোক নিজেই পাকিস্তানলৈ যোৱা উচিত আৰু গৌৰৱ গগৈৰ বিৰুদ্ধে তথ্যচিত্ৰ বা নথিপত্ৰ সংগ্ৰহ কৰি আদালতত দাখিল কৰিব লাগে।”
ইফালে, বিজেপি নেতৃত্বই অসমৰ বৰাক উপত্যকাৰ বাস্তৱ পৰিস্থিতিৰ পৰা বিচ্ছিন্ন হৈ পৰা বুলি অভিযোগ কৰি আব্বাছে কয় যে কেন্দ্ৰ আৰু ৰাজ্য চৰকাৰে কৰিমগঞ্জ তথা সমগ্ৰ বৰাক অঞ্চলৰ মানুহৰ সমস্যা সমাধান কৰাতকৈ ৰাজনৈতিক ভাষ্য বা ‘ন্যৰেটিভ’ গঢ়ি তোলাতহে বেছি মনোনিৱেশ কৰিছে।
সংবেদনশীল বিষয়মূহৰ ওপৰত মুখ্যমন্ত্ৰীয়ে বাৰে বাৰে কৰা ৰাজহুৱা মন্তব্যই প্ৰতিষ্ঠানিক প্ৰক্ৰিয়াৰ প্ৰতি থকা অৱজ্ঞা আৰু বৰ্ধিত অধৈৰ্য্যক সূচাইছে বুলি মন্তব্য কৰি আব্বাছে সতৰ্ক কৰি দিয়ে যে এনে আচৰণে গণতান্ত্ৰিক নীতি আৰু ৰাজহুৱা বিশ্বাস দুৰ্বল কৰে।
