কয়লা চিণ্ডিকেটৰ অভিযোগত সোণোৱাল চৰকাৰ ধাৰাবাহিকভাৱে সমালোচিত হৈ অহাৰ মাজতে ডিগবৈৰ শাসকীয় বিধায়ক সুৰেন ফুকনে ঘটাইছে মহা অথন্তৰ।
সোমবাৰে মাজনিশা ফে’চবুকত লাইভ ভিডিঅ’ৰ জৰিয়তে ফুকনে “অসমৰ জনসাধাৰণ”ক প্ৰদৰ্শন কৰিছে তিনিচুকীয়া-মাৰ্ঘেৰিটাৰ মাজত চলা “অবৈধ কয়লা” পৰিবাহী ট্ৰাকৰ লানি।
ঘটনাটোৱে কোদো বাহত হাত দিয়াসদৃশ পৰিস্থিতিৰ সৃষ্টি কৰিছে আৰু চ’চিয়েল মিদিয়াত এতিয়া সি ভাইৰেল হৈ পৰিছে।
ফুকনে নিজ ঘৰ টিংৰাইত ৰাষ্ট্ৰীয় ঘাইপথৰ কাষত থিয় হৈ থাকি মাজ ৰাতি ১২ বজাত অহা যোৱা কৰি থকা “অবৈধ কয়লা” পৰিবাহী ট্ৰাকলৈ আঙুলিয়াই দিয়া দেখা গৈছে।
“এই ১২ বজাৰ পিছত অবৈধ কয়লা ট্ৰাকসমূহ কেনেধৰণে নিয়ে এই কথাখিনি মই জনাব বিচাৰিছো। ইয়াত পুলিচ-প্ৰশাসন সম্পূৰ্ণ জৰিত আছে, কয়লা মাফিয়া জৰিত আছে, বহুত দল-সংগঠনবিশেষ জৰিত আছে…এইখন ট্ৰাক গৈ আছে, চাওক, সব অবৈধ কয়লা,” “অসমৰ ৰাইজক” জনোৱাৰ বাবে এই ব্যৱস্থা কৰা বুলি উল্লেখ কৰি ভিডিঅ’টোত ফুকনে কৈছে।
ফুকনে প্ৰায় ৯ মিনিটৰ ভিডিঅ’টোত কোৱামতে, এই ট্ৰাকসমূহ ৰাতি ১০ বজাৰ পৰা পুৱা ৪ বজালৈকে চলে আৰু সেইবোৰ ৰখাবলৈ কোনো পুলিচ-প্ৰশাসন নাই।
অবৈধ কয়লা ব্যৱসায়ত ফুকন জৰিত বুলি চ’চিয়েল মিদিয়া আৰু কাকতত বাতৰি প্ৰকাশ পাই অহাৰ ফলতে ‘‘সত্য উদঘাটনৰ বাবে” এই পথ লোৱা বুলি ভিডিঅ’টোত তেওঁ কৈছে।
ফুকনৰ ভিডিঅ’টো বাতৰি লিখাৰ সময়ত তেওঁৰ ফে’চবুক একাউণ্টত নাই। বহুলোকে তেওঁক এই কথাক লৈ প্ৰশ্ন কৰাৰ বিপৰীতে ফুকনে তেৱেঁই ভিডিঅ’টো লাইভ কৰা বুলি দায়িত্ব স্বীকাৰ কৰিছে।
“এক্সিডেণ্টেলি ডিলিট হৈ গৈছে, কেনেবাকৈ মোৰ হাত লাগি গ’ল।…আৰে ডিলিট কৰিলে মানে কি? মই কাৰো দাবী ধমকিত সেও মনা মানুহ নহয়। সত্য মই সদায় কওঁ, সত্য কথা কওঁতে কাকো কেয়াৰ নকৰো, শাসক বিৰোধী যিয়েই নহওক, সঁচা কথাটো মই সদায় অন্তৰৰ পৰা কওঁ,” নৰ্থইষ্ট নাওত ফুকনে ভিডিঅ’টোৰ সত্যতাৰ নিশ্চিতি দি কয়।
সঁচা কথা ক’লেও মিডিয়াই তেওঁক “বেলেগ ধৰণে” উপস্থাপন কৰা বুলি মন্তব্য কৰি ফুকনে কয় তেওঁৰ কমেন্ট আজিকালি মিডিয়াই সকলো ওলোটা দিয়ে।
বহুলোকে চ’চিয়েল মিডিয়াত ফুকনৰ “সাহস আৰু সততা”ৰ শলাগ লোৱাৰ বিপৰীতে একাংশই তেওঁ বিধায়ক হৈয়ো কিয়নো আৰক্ষীৰ সহায় নল’লে বুলি প্ৰশ্ন কৰিছে।
কিন্তু, ফুকনে পূৰ্বে নিজে অবৈধ কয়লা ট্ৰাক ধৰাৰ কথা উল্লেখ কৰি কয় যে একাংশ সংবাদ পত্ৰই তেওঁক “বিতৰ্কিত বিধায়ক” বুলিহে তেতিয়া উল্লেখ কৰিছিল।
অসম প্ৰদেশ যুৱ কংগ্ৰেছে বিধায়ক ফুকনক “ধন্যবাদ” জনাইছে। বিধান সভাৰ মজিয়াত একেখিনি অভিযোগ উত্থাপন কৰিবলৈ তেওঁক আমি আহ্বান জনাইছো, যুৱ কংগ্ৰেছৰ সভাপতি কামৰুলে কয়।
অবৈধ কয়লাৰ বেহাক লৈ চৰকাৰলৈ আঙুলি তুলি অহা কৃষক মুক্তি সংগ্ৰাম সমিতিৰ নেতা অখিল গগৈয়ে হয় ফুকনৰ গ্ৰেপ্তাৰ, নহয় সোণোৱালৰ পদত্যাগ দাবী কৰিছে।
কথাটো যদি মিছা তেন্তে সুৰেন ফুকনক তৎকালে গ্ৰেপ্তাৰ কৰিব লাগে আৰু যদি সঁচা তেন্তে মুখ্য মন্ত্ৰী সৰ্বানন্দ সোণোৱালে পদত্যাগ কৰিব লাগে, গগৈয়ে কয়।
অবৈধ কয়লাক লৈ বিৰোধী কংগ্ৰেছ আৰু অসমৰ দল-সংগঠনৰ পিছত খোদ সতীৰ্থ বিধায়কৰ এই মুকলি স্থিতিৰ পিছত এতিয়া মুখ্য মন্ত্ৰী তথা গৃহ মন্ত্ৰী সৰ্বানন্দ সোণোৱাল আৰু বিজেপিৰ ভূমিকা লক্ষণীয় হ’ব।
