ৰাজ্য ‘জ্বলাই’ যোৱা কা’ বিৰোধী আন্দোলনৰ মাজত জেহাদীৰ ‘গোন্ধ’ পাইছে বিজেপিৰ ৰাজ্যিক সভাপতি সভাপতি ৰঞ্জিত দাসে। দাসৰ মতে জেহাদীয়ে দিচপুৰৰ জনতা ভৱন জ্বলাই দিয়া পৰিকল্পনা কৰিছিল।
আজি গুৱাহাটীত এখন সংবাদমেল সম্বোধন কৰি দাসে তেওঁৰ কথা সত্য প্ৰমাণিত নহ’লে ৰাজনৈতিক জীৱন ত্যাগ কৰিব বুলিও ঘোষণা কৰে।
সাংবাদিকসকলক উদ্দেশ্যে তেওঁ কয়, ‘বেলতলাৰ পৰা হাতীগাঁওলৈকে যিমান খিলঞ্জীয়া লোক আছে প্ৰত্যেককে স্পাই কেমেৰাৰে শোধক তেতিয়া জনতা ভৱন জ্বলোৱাৰ পৰিকল্পনাৰ লগত কোন জড়িত আছিল গম পাব। যদি এই কামৰ লগত জেহাদী জড়িত নাই বুলি তেওঁলোকে কয় তেন্তে মই ৰাজনৈতিক জীৱন ত্যাগ কৰিম। ‘
‘মই নিজেই ৪০০ ভিডিও ফুটেজ চালো। কেইবাগৰাকীয়েও পকেটত মেচ লৈ অহা দেখিবলৈ পাইছো। পকেটত মেচ লৈ আন্দোলন কৰা এইবাৰহে দেখিলো।‘ দাসে কয়।
আৰক্ষীয়ে ব্যৱস্থা নোলোৱা হ’লে জনতা ভৱন জ্বলাই দিলেহেঁতেন বুলি মন্তব্য কৰি তেওঁ কয় যে একেধৰণে বৰপেটাটো উপায়ুক্তৰ কাৰ্যালয় জ্বলাই দি এন আৰ চি ৰ নথি পত্ৰ জ্বলাই দিলেহেঁতেন।
আনহাতে চাবুৱা কাণ্ডত মাওবাদী আৰু কৃষক মুক্তি জড়িত থকা বুলি কয় সভাপতি গৰাকীয়ে।
‘পূৰ্বতে কোনেও বিধায়কৰ ঘৰ জ্বলাই প্ৰতিবাদ কৰা নাছিল। চাবুৱা কাণ্ডৰ লগত মাওবাদী আৰু কৃষক মুক্তিৰ সম্পৰ্ক আছে। কংগ্ৰেছো জড়িত আছে। আমি ৰাজ্য চৰকাৰক দাবী জনাইছো জড়িত দুস্কৃতিকাৰীক শাস্তি বিহিবলৈ।‘ তেওঁ কয়।
সংবাদমেলত প্ৰবজনকাৰীক এক ইঞ্চি মাটিও দিয়া নহয় বুলি উল্লেখ কৰি তেওঁ আৰু ‘খিলঞ্জীয়া ভূমি পুত্ৰৰ বাহিৰে কোনোবাই ভূমি বিচাৰি বিধানসভা মজিয়াত আত্মহত্যা কৰিলেও আমি মাটি নিদিওঁ।‘
‘আমি দিল্লীৰ বহতিয়া নহয়, অসমীয়া ভাষা সংস্কৃতি ৰক্ষাৰ ক্ষেত্ৰত যি কৰিব লাগে সেয়া সংবিধান সংশোধন কৰি হ’লেও কৰা হ’ব।‘ দাসৰ মন্তব্য।
অসমৰ বিদেশী সমস্যাৰ বাবে কংগ্ৰেছক দায়ী কৰি তেওঁ কয়, ‘ৰাজীৱ গান্ধীয়ে ১৯৮৫ চনত চুক্তি কৰি অসমবাসীক প্ৰবঞ্ছনা কৰিলে। ‘৫১ৰ পৰা ‘৭১লৈকে অহা বিদেশীক আদৰি ল’লে। কংগ্ৰেছীসকলে ৮৫৫ গৰাকী চহিদৰ ঘৰলৈ গৈ খবৰ লওক, আজিলৈকে ঘৰলৈ গৈ খবৰ নল’লে।‘
অহা ’২১ চনৰ নিৰ্বাচনত বিজেপি মিত্ৰজোঁটে ১০০খনতকৈ অধিক আসন লাভ কৰিব বুলি দাবী কৰি তেওঁ কয়, ‘৪২ লাখ কাৰ্যকৰ্তা যেতিয়ালৈ বাছি থাকিব তেতিয়ালৈকে অসমীয়া জাতি বাছি থাকিব।‘
ৰাজ্যৰ বিভিন্ন স্থানত মুখ্য মন্ত্ৰীকে ধৰি আন মন্ত্ৰী বিধায়কক ক’লা পতাকা দেখুওৱা প্ৰতিবাদকাৰীক উদ্দেশ্যি তেওঁ কয়, ক’লা পতকা দেখুৱাই দেখুৱাওক, সেইটো গণতান্ত্ৰিক অধিকাৰ। শান্তিপূৰ্ণভাৱে কৰবাত বহি ক’লা পতকা দেখুৱালে ভাল পাওঁ, কিন্তু গাড়ীৰ আগলৈ আহিলে দুৰ্ঘটনা সংঘটিত হোৱাৰ সম্ভাৱনা থাকে, সেয়েহে আৰক্ষীয়ে বাধা দিয়ে।‘
