কোভিডৰ সংক্ৰমণৰ মাজতে অনুষ্ঠিত হোৱা অসম বিধান সভাৰ অধিৱেশনত আজি গৃহীত হ’ল অসম চৰকাৰী ভাষা সংশোধনী বিধেয়ক, ২০২০। ধ্বনি ভোটত গৃহীত কৰা হয় বহু চৰ্চিত বিধেয়কখন।
বড়ো ভাষাক অসমৰ সহযোগী চৰকাৰী ভাষা স্বীকৃতি দিয়াৰ বাবে গৃহীত হ’ল এই বিধেয়ক। বিটিআৰ চুক্তি অনুসৰি বড়ো ভাষাক অসমৰ সহযোগী চৰকাৰী ভাষাৰ মৰ্য্যাদা প্ৰদানৰ প্ৰস্তাৱ আছিল।
আজি গৃহীত হোৱা এই বিধেয়কৰ জৰিয়তে বড়ো ভাষাই অসমৰ সহযোগী চৰকাৰী ভাষা হিচাপে নিশ্চিতি লাভ কৰিলে।প্ৰথমে এই বিধেয়কখনত সংশোধনীৰ প্ৰস্তাৱ আনিছিল বিধায়ক কমলাক্ষ দে পুৰকায়স্থই। বিধায়ক পুৰকায়স্থই বড়োৰ সৈতে বাংলা ভাষাকো অসমৰ সহযোগী ভাষা হিচাপে স্বীকৃতি প্ৰদান কৰাৰ দাবী কৰে।
এই বিষয় লৈ সদনত বিতৰ্ক হয়। কমলাক্ষ দে পুৰকায়স্থৰ যুক্তি অসমত ৯০ লাখ মানুহে বাংলা ভাষা কয়, কিন্তু বড়োভাষী লোকৰ সংখ্যা প্ৰায় ১৪ লাখহে। সেয়ে বাংলা ভাষাৰ ক্ষেত্ৰতো বড়ো ভাষাৰ দৰেই পদক্ষেপ গ্ৰহণ কৰিবলৈ তেওঁ দাবী জনাইছিল।
বিধায়ক কমলাক্ষ দে পুৰকায়স্থৰ সংশোধনী প্ৰস্তাৱৰ বিপৰীতে সদনত বক্তব্য ৰাখে মন্ত্ৰী চন্দ্ৰমোহন পাটোৱাৰী আৰু ড০ হিমন্ত বিশ্ব শৰ্মাই। প্ৰসংগ আহিল বিটিআৰ চুক্তিৰ। বিশ্বৰ বৃহৎ সংখ্যক লোকে কোৱা ভাষাৰ ভিতৰত পৰে বাংলা ভাষা। অসমতো বৰাক উপত্যকাৰ তিনিখন জিলাৰ চৰকাৰী ভাষা বাংলা। তৎসত্বেও সমগ্ৰ অসমত বাংলা ভাষাক সহযোগী ভাষাৰ স্বীকৃতি দিয়াৰ প্ৰয়োজনহীনতাৰ কথা দোহাৰিলে দুয়োগৰাকী মন্ত্ৰীয়ে।
অৱশ্যে শেষত বিৰোধী বিধায়ক কমলাক্ষৰ এই প্ৰস্তাৱ উঠাই ল’লে বিৰোধী দলপতি দেৱব্ৰত শইকীয়াই। কিন্তু নিজৰ মতত অটল হৈয়েই থাকিল বিধায়ক কমলাক্ষ দে পুৰকায়স্থ। প্ৰকৃততে বিধায়ক কমলাক্ষ দে পুৰকায়স্থৰ এয়া জাতি প্ৰীতি নে এয়া এক ৰাজনীতি তাকে লৈ বহুতৰে মনত প্ৰশ্নৰ উদয় হোৱা দেখা গৈছে। সেই একে সন্দেহেই ব্যক্ত কৰিলে মন্ত্ৰী হিমন্ত বিশ্ব শৰ্মায়ো।
বাইটঃ
অৱশ্যে সৰ্ব শেষত সৰ্বসন্মতভাৱে গৃহীত হ’ল অসম চৰকাৰী ভাষা সংশোধনী বিধেয়ক, ২০২০। বিধেয়কখনত এতিয়া কেৱল ৰাজ্যপালৰ অনুমোদনহে বাকী আছে। ৰাজ্যপালৰ অনুমোদনৰ পিছতেই বড়ো ভাষাই অসমৰ সহযোগী চৰকাৰী ভাষাৰ মৰ্য্যাদা লাভ কৰিব।
