মুখ্য মন্ত্ৰী সৰ্বানন্দ সোণোৱাল নেতৃত্বাধীন ৰাজ্য চৰকাৰৰ মন্ত্ৰীসভাৰ সম্প্ৰসাৰণৰ বিষয়টো অধিক চৰ্চিত হৈ থকাৰ মাজতে কাইলৈ মন্ত্ৰীসভাৰ সম্প্ৰসাৰণ ঘটিব।
পুৱা ৯ বজাত উজানবজাৰস্থিত ৰাজভৱনত হ’ব মন্ত্ৰীসভাৰ সম্প্ৰসাৰণ। বিজেপিৰ এক উচ্চস্তৰীয় সুত্ৰই জানিবলৈ দিছে এই কথা।
ইতিমধ্যে বিজেপিৰ দুজনকৈ বিধায়ক ক্ৰমে মাহমৰা সমষ্টিৰ বিধায়ক যোগেন মহন আৰু তিনিচুকীয়া সমষ্টিৰ বিধায়ক সঞ্জয় কিষাণলৈ মুখ্য মন্ত্ৰীৰ কাৰ্য্যালয়ৰ পৰা ফোনযোগে পুৱা ৯ বজাত ৰাজভৱনত উপস্থিত হ’বলৈ কোৱা বুলি নৰ্থ ইষ্ট নাওৰ সাংবাদিকৰ আগত স্পষ্ট কৰিছে বিধায়ক দুজনে।
উল্লেখ কৰিব পাৰি যে, ২০১৯ ৰ লোকসভা নিৰ্বাচনত দুজনকৈ কেবিনেট মন্ত্ৰী ক্ৰমে তপন গগৈ আৰু পল্লৱ লোচন দাস সাংসদ হিচাপে নিৰ্বাচিত হোৱাৰ পাছতে খালী হৈ আছিল সোণোৱাল কেবিনেটৰ কেইবাটাও গুৰুত্বপূৰ্ণ দপ্তৰ।
সাংসদ তপন গগৈৰ অধীনত আছিল শক্তি বিভাগ আৰু পল্লৱলোচন দাসৰ অধীনত আছিল শ্ৰম, নিয়োগ আৰু চাহ জনজাতীয় কল্যাণ দপ্তৰ।
স্বাভাৱিকতে চৰ্চা চলিছে যে সাংসদ তপন গগৈৰ অধীনত থকা শক্তি বিভাগটো মাহমৰা সমষ্টিৰ বিধায়ক যোগেন মহনে আৰু চাহ জনজাতিক প্ৰতিনিধিত্ব কৰা সঞ্জয় কিষাণে সাংসদ পল্লৱলোচন দাসৰ অধীনত থকা দপ্তৰকেইটা লাভ কৰিব নেকি?
বিজেপিৰ এক উচ্চস্তৰীয় সুত্ৰই এই সম্ভাৱনাই প্ৰকট বুলি দাবী কৰিছে।
উল্লেখযোগ্য যে, দুয়োগৰাকী বিজেপি বিধায়কে প্ৰথমবাৰলৈ মন্ত্ৰিত্বৰ সোৱাদ লাভ কৰিব।
তাৎপয্যপূৰ্ণভাৱে, সোণোৱাল মন্ত্ৰীসভাৰ সম্প্ৰসাৰণ হ’ল যদিও জ্যেষ্ঠ বিজেপি নেতা অথবা বিধায়ক মন্ত্ৰিত্ব লাভৰ পৰা বাৰেপতি উপেক্ষিত হৈছে বুলি জানিব পৰা গৈছে।
ইপিনে, অচিৰেই সোণোৱাল মন্ত্ৰীসভাৰ কেইবাটাও দপ্তৰৰ ৰদবদল হ’ব পাৰে বুলি সুত্ৰত প্ৰকাশ পাইছে। শিক্ষা মন্ত্ৰী হিচাপে কাৰ্য্য নিৰ্বাহ কৰি থকা সিদ্ধাৰ্থ ভট্টাচাৰ্য্য, জলসিঞ্চন বিভাগৰ মন্ত্ৰী ৰঞ্জিত দত্ত আৰু সাংস্কৃতিক পৰিক্ৰমা দপ্তৰৰ মন্ত্ৰী নৱকুমাৰ দলেই মন্ত্ৰীত্ব পদ হেৰুৱাব বুলিও চৰ্চিত হৈছে।
অহা দেওবাৰে মুখ্য মন্ত্ৰী সৰ্বানন্দ সোণোৱাল মন্ত্ৰিত্ব ৰদবদল সম্পৰ্কে দিল্লীত গৈ কেন্দ্ৰীয় গৃহ মন্ত্ৰী অমিত শ্বাহৰে এক আলোচনাত মিলিত হ’ব বুলিও এক সুত্ৰত প্ৰকাশ পাইছে।