গুৱাহাটী প্ৰেছ ক্লাৱৰ নিৰ্বাচন সন্দৰ্ভ মুখ খুলিছে ‘এ আই পি এফ’এ।
সংবাদ মাধ্যমলৈ প্ৰেৰণ কৰা এক প্ৰেছ বিজ্ঞপ্তিত ‘এ আই পি এফ’এ প্ৰেছ ক্লাৱৰ সম্পাদক নৱ ঠাকুৰীয়াৰ পক্ষ লোৱা দেখা গৈছে। প্ৰেছ টোকাটোত ‘এ আই পি এফ’এ কয়- বহু বছৰৰ মূৰত গুৱাহাটী প্ৰেছ ক্লাৱত নিৰ্বাচন অনুষ্ঠিত হ’ব, সেয়া ভাল কথা ৷
কিন্তু কিছুদিন ধৰি অতি আশ্চৰ্যসহকাৰে এটাকথা লক্ষ্য কৰা গৈছে যে এই নিৰ্বাচন নোহোৱাৰ কাৰণ হিচাপে একাংশ সাংবাদিকে প্ৰেছ ক্লাবৰ বিদায়ী সম্পাদক (তেখেত আমাৰ ‘এ আই পি এফ’ৰো সদস্য) গৰাকীকে দায়ী কৰি একমাত্ৰ এই কথাটোকে অহৰহ আৰু মাত্ৰাধিকভাৱে প্ৰচাৰ কৰাত লিপ্ত হৈ এক পক্ষপাতদুষ্ট , দৃষ্টিকটু আৰু বিৰক্তিকৰ পৰিৱেশৰ সৃষ্টি কৰিছে ৷
‘এআইপিএফ’ এ যুক্তি দৰ্শায় যে ইতিপূৰ্বে সংবাদ মাধ্যমত প্ৰকাশ পোৱামতেই প্ৰেছ ক্লাব ইমানদিনে সভাপতি, সম্পাদক আৰু অন্যান্য বিষয়বীয়াসহ একপূৰ্ণাংগ কাৰ্যকৰী কমিটীৰ অধীনত আছিল ৷
গতিকে নিৰ্বাচনৰ বিলম্ব হোৱাৰ কাৰণ হিচাপে সম্পূৰ্ণ কমিটীখনৰ সলনি কেৱল সম্পাদককে দায়ী কৰাটো যুক্তিযুক্ত হ’ব পাৰে জানো ?
তদুপৰি প্ৰেছ ক্লাৱৰ সাধাৰণ সদস্যসকলেও এই বিষয়ত কেতিয়াবাই পদক্ষেপ ল’ব লাগিছিল ৷ যিকিনহওক , আমি আশা কৰোঁ প্ৰেছ ক্লাৱৰ আগন্তুক নিৰ্বাচনত নতুন কাৰ্যবাহী কমিটী গঠিত হৈ প্ৰেছ ক্লাৱৰ গৰিমা পূৰ্বৰ দৰেই অটুট ৰাখিব ৷
‘এ আই পি এফ’ৰ হৈ অজয় দত্ত, কমল দত্ত, ৰূপম বৰুৱা, জগদীন্দ্ৰ ৰায়চৌধুৰী, অৰূপা বৰুৱ , ৰুবী বৰুৱা দাস, বিশ্বজিৎ নাথ, তৰালী চক্ৰৱৰ্তী, টিটো গঞ্জু, হাৰিছ কাদিৰ, ছালিম ছামাদ, উজ্জ্বল শইকীয়া, অঞ্জনীল কাশ্যপ আৰু ওকেনজিৎ সন্ধমে সংবাদ মাধ্যমলৈ এই প্ৰেছ বিবৃতিটো প্ৰেৰণ কৰিছে।