মুখ্য মন্ত্ৰী সৰ্বানন্দ সোণোৱালে আজি দক্ষিণ শালমাৰা-মানকাছাৰ জিলা প্ৰশাসনে ক’ভিদ-১৯ৰ সংক্ৰমণ প্ৰতিহত কৰাৰ বাবে লোৱা ব্যৱস্থাৱলীসমূহ পৰ্যালোচনা কৰে।
দক্ষিণ শালমাৰা-মানকাছাৰ জিলাৰ সদৰ হাটশিঙিমাৰীস্থিত জিলা উপায়ুক্তৰ কাৰ্য্যালয়ৰ সভাকক্ষত এই বিষয়ে অনুষ্ঠিত পৰ্যালোচনামূলক বৈঠকত মুখ্য মন্ত্ৰীয়ে দক্ষিণ শালমাৰা-মানকাছাৰ জিলাৰ উপায়ুক্ত আতিকা ছুলতানাক জিলাখনৰ অন্তৰ্গত ভাৰত-বাংলাদেশ সীমান্তত চোকা দৃষ্টি ৰখাৰ বাবে নিৰ্দেশ দিয়ে।
আনকি সীমান্তৰ ন’মেনছ লেণ্ডটো যাতে এই সময়ছোৱাত কোনো কৃষকে কৃষিকাৰ্য্যৰ বাবে যাব নোৱাৰে তাৰ প্ৰতি চোকা দৃষ্টি ৰখাৰ বাবেও জিলা প্ৰশাসনক নিৰ্দেশ দিয়ে সোণোৱালে।
সীমান্ত সুৰক্ষিত কৰি ৰখাৰ ক্ষেত্ৰত সীমান্ত সুৰক্ষা বাহিনীৰ সৈতে প্ৰশাসনে সঘনাই যোগাযোগ স্থাপনেৰে নিশ্চিত পদক্ষেপ লোৱাৰ পোষকতা কৰে মুখ্য মন্ত্ৰী গৰাকীয়ে।
বৈঠকত জিলা উপায়ুক্ত গৰাকীয়ে আগন্তুক ৰমজান মাহৰ সময়ত জিলাখনলৈ যাতে ফলমূলৰ অবিৰত যোগান নিশ্চিত কৰিব পৰা যায় তাৰ বাবে পদক্ষেপ লোৱাৰ বাবেও মুখ্য মন্ত্ৰীক অনুৰোধ জনায়।
আনহাতে, বৈঠকত সোণোৱালে ৰাষ্ট্ৰীয় খাদ্য সুৰক্ষা আইনৰ অধীনত পৰিয়াল পৰিচয় পত্ৰ নথকা পৰিয়ালক ১ হাজাৰ টকাকৈ এককালীন সাহায্য আগবঢ়োৱাৰ দিশক প্ৰকৃত হিতাধিকাৰী যাতে নিৰ্বাচিত কৰা হয় তাৰ বাবে বিহীন ব্যৱস্থা গ্ৰহণ কৰাৰ বাবেও জিলা উপায়ুক্ত গৰাকীক নিৰ্দেশ দিয়ে।
তদুপৰি, জিলাখনৰ জনসাধাৰণে ল’কডাউনৰ সময়ছোৱাত যাতে কোনোধৰণৰ অত্যাৱশ্যকীয় সামগ্ৰী লাভ কৰাত ব্যাঘাত নজন্মে তাৰ বাবে উচিত পদক্ষেপ ল’বলৈও জিলা প্ৰশাসনক নিৰ্দেশ দিয়াৰ লগতে এই সময়ছোৱাত কোনো অসাধু ব্যৱসায়ীয়ে যাতে কৃত্ৰিম নাটনি তথা মূল্যবৃদ্ধি কৰিব নোৱাৰে তাৰ বাবে সক্ৰিয় পদক্ষেপ গ্ৰহণ কৰিবলৈও জিলা উপায়ুক্তক নিৰ্দেশ দিয়ে মুখ্য মন্ত্ৰী সোণোৱালে।