মুখ্যমন্ত্ৰী সৰ্বানন্দ সোণোৱালে আজি ধুবুৰীত ৰূপসী বিমান বন্দৰৰ পুনৰ নিৰ্মাণৰ বাবে দ্বিতীয় পৰ্য্যায়ৰ কামৰ আধাৰশিলা স্থাপন কৰিব। দীৰ্ঘদিন ধৰি অৱহেলিত হৈ থকা ৰূপসী বিমান বন্দৰৰ উন্নয়নৰ বাবে চৰকাৰে বিশেষ পদক্ষেপ হাতত লৈছে। ইতিমধ্যে প্ৰথম পৰ্য্যায়ৰ নিৰ্মাণৰ কাম চলি আছে।
দিনৰ ১২ বজাত বিমানবন্দৰটোৰ চৌহদত অনুষ্ঠিত হ’ব লগীয়া এখন জনসভাত মুখ্য অতিথিৰূপে অংশগ্ৰহণ কৰি সৰ্বানন্দ সোণোৱালে বিমান বন্দৰটোৰ বিকাশৰ বাবে দ্বিতীয় পৰ্য্যায়ৰ কামৰ আধাৰশিলা স্থাপন কৰিব। সভাত কেন্দ্ৰীয় অসামৰিক বিমান পৰিবহণ মন্ত্ৰী সুৰেশ প্ৰভুৱে নতুন দিল্লীৰ পৰা ভিডিঅ’ কনফাৰেন্সিং ব্যাৱস্থাৰে ভাষণ প্ৰদান কৰিব।
উল্লেখযোগ্য যে, ব্ৰিটিছ শাসন কালৰ দ্বিতীয় বিশ্বযুদ্ধৰ সময়তে স্থাপন হোৱা ৰূপসী বিমান বন্দৰটো ১৯৮৪ চনৰ পৰা বন্ধ হৈ আছে। ৰাজ্য চৰকাৰে বহুবাৰ বিমান বন্দৰটো মুকলি কৰাৰ চেষ্টা কৰিছিল যদিও এইক্ষেত্ৰত ব্যৰ্থ হয়। অৱশেষত চৰকাৰৰ স্থানীয় সংযোগ আঁচনিৰ অধীনত ভাৰতীয় বিমান প্ৰাধিকৰণ আৰু বায়ু সেনা বাহিনীৰ উদ্যোগত ৰূপসী বিমান বন্দৰৰ পুনৰ নিৰ্মাণৰ কাম হাতত লোৱা হৈছে।
আনহাতে, বিমানবন্দৰটোৰ পুনৰ নিৰ্মাণৰ কামত স্থানীয় লোকসকল যথেষ্ট উৎফুল্লিত হৈ পৰিছে। বিমানবন্দৰটো পুনৰ সক্ৰিয় হৈ উঠিলে ভাৰতবৰ্ষৰ বিভিন্ন ঠাইলৈ বিমানেৰে যাত্ৰা কৰিবৰ বাবে গোৱালপাৰা,ধুবুৰী, কোকৰাঝাৰ আদি জিলাৰ লোক সকলে গুৱাহাটীৰ গোপীনাথ বৰদলৈ বিমানবন্দৰলৈ অহাৰ পৰিবৰ্তে ৰূপসী বিমানবন্দৰৰ পৰাই যাত্ৰা কৰিব পাৰিব।
