মুখ্য মন্ত্ৰী সৰ্বানন্দ সোণোৱালে বিনিয়োগৰ বাবে অসমত এতিয়া সুন্দৰ ঔদ্যোগিক বাতাবৰণ গঢ়ি উঠিছে বুলি মত প্ৰকাশ কৰিছে।
সেয়েহে উদ্যোগ আৰু বাণিজ্য বিভাগে ‘ইজ অৱ ডুয়িং বিজনেছ’ সঠিক ধৰণে ৰূপায়ণ কৰাৰ দিশত অগ্ৰসৰ হ’ব লাগিব যাতে ৰাজ্যখতন আৰু অধিক বিনিয়োগ সম্ভৱ হৈ উঠে। আজি জনতা ভৱনত মুখ্য মন্ত্ৰীৰ সভা কক্ষত ‘এডভাণ্টেজ আসাম’ শীৰ্ষক বিশ্ব বিনিয়োগ সন্মিলনৰ পৰৱৰ্তী পৰ্যায়ত ৰাজ্যখনত হোৱা বিনিয়োগৰ পৰ্যালোচনামূলক বৈঠকত অধ্যক্ষতা কৰি সোণোৱালে এইদৰে কয়।
মুখ্য মন্ত্ৰীয়ে ৰাজ্যখনলৈ আৰু অধিক বিনিয়োগকাৰীক আকৰ্ষিত কৰাৰ বাবে পদক্ষেপ ল’বলৈও উদ্যোগ আৰু বাণিজ্য বিভাগক নিৰ্দেশ দিয়ে।
উল্লেখযোগ্য যে, বিশ্ব বিনিয়োগ সন্মিলনৰ পাছত ৰাজ্যখনৰ বিভিন্ন ক্ষেত্ৰত ইতিমধ্যে ৫৭,৪৩৭ কোটি টকা বিনিয়োগ হৈছে। তদুপৰি প্ৰায় ১৫,৯২৫ কোটি টকাৰ বিনিয়োগৰ প্ৰস্তাৱ বিভিন্ন পৰ্যায়ত আছে।
মুখ্য মন্ত্ৰীয়ে আজিৰ বৈঠকত বাণিজ্যিক উৎপাদনৰ দিশত হোৱা বিনিয়োগৰ পৰিমাণৰ বিষয়েও জানিব বিচাৰে আৰু উদ্যোগ আৰু বাণিজ্য বিভাগ তথা ইয়াৰ আনুসংগিক বিভাগসমূহক বাণিজ্যিক উৎপাদন কৰা কোম্পানী সমূহত অনুকূল বাতাবৰণ বৰ্তাই ৰখাৰ দিশত পদক্ষেপ ল’বলৈও নিৰ্দেশ দিয়ে।
উৎপাদনৰ ক্ষেত্ৰত ইতিমধ্যে পতঞ্জলি, ডাৱৰ ইণ্ডিয়া লিমিটেড, ইমামি, হিন্দুস্থান ইউনি লিভাৰ, আই টি চি, ব্ৰিটানিয়া তথা আন কেতবোৰ কোম্পানীয়ে ৰাজ্যখনত বাণিজ্যিক উৎপাদনৰ কাম আৰম্ভ কৰিছে।
তদুপৰি ঔষধ উৎপাদনৰ দিশত চানফাৰ্মাস পিঅ’ৰ এণ্ড কিঅ’ৰ, আজন্তা ফাৰ্মা তথা আন কেতবোৰ কোম্পানীয়ে উৎপাদন আৰম্ভ কৰিছে। ইয়াৰ উপৰি হোটেল আৰু হাস্পাতাল খণ্ডই বাণিজ্যিক উৎপাদনত ইতিমধ্যে লাভ অৰ্জনৰ দিশত গতি কৰিছে।
মুখ্য মন্ত্ৰীয়ে ৰাজ্যখনত ‘ইজ অৱ ডুয়িং বিজনেছ’ৰ উত্তৰোণৰ বাবে উদ্যোগ আৰু বাণিজ্য বিভাগক বাণিজ্যিক সংস্কাৰৰ কৰ্ম আঁচনি হাতত লোৱাৰ বাবেও নিৰ্দেশ দিয়ে।
উল্লেখ্য যে বৰ্তমানৰ চৰকাৰৰ প্ৰথমটো বিধান সভাৰ অধিৱেশনতে ‘ইজ অৱ ডুয়িং এক্ট-২০১৬’ খন অনুমোদন জনোৱা হৈছিল। ইয়াৰদ্বাৰা ব্যৱসায়ীৰ ক্ষেত্ৰত চিংগল উইণ্ডো এজেন্সি এটা প্ৰতিষ্ঠা কৰা হৈছিল। ফলশ্ৰুতিত ৩৪ টা চৰকাৰী বিভাগৰ ৪০৫ বিজনেছ টু গৰ্ভমেণ্ট (বি ২ জি) সেৱাৰ অনলাইন অনুমোদনৰ ব্যৱস্থা কৰা হৈছে।
আজিৰ বৈঠকতে মুখ্য মন্ত্ৰীয়ে অসমত ‘নেশ্যনেল বেম্ব’ মিশ্যন’ৰ ৰূপায়ণৰ অগ্ৰগতিৰো পৰ্যাচোলনা কৰে। মুখ্য মন্ত্ৰীয়ে উদ্যোগ আৰু বাণিজ্য বিভাগৰ লগতে অভিযান সঞ্চালকক এই অভিযানৰ বিভিন্ন খণ্ড যেনে-কৃষি, উৎপাদন, উন্নয়ন আৰু প্ৰক্ৰিয়াকৰণ, বাঁহ বিপণনৰ আন্তঃগাঁথনিৰ উন্নয়ন আৰু উৎকৰ্ষ সাধন, দক্ষতা উন্নয়ন আৰু সজাগতা সৃষ্টিৰ অভিযান ইত্যাদি বিষয় সমূহ সক্ৰিয়ভাৱে ৰূপায়ণৰ ওপৰত গুৰুত্ব আৰোপ কৰিবলৈ নিৰ্দেশ দিয়ে।
বৈঠকত উদ্যোগ আৰু বাণিজ্য বিভাগৰ মন্ত্ৰী চন্দ্ৰমোহন পাটোৱাৰী, উদ্যোগ আৰু বাণিজ্য বিভাগৰ দায়িত্বত থকা অতিৰিক্ত মুখ্য সচিব ৰবি কাপুৰ, বেম্ব’ মিশ্যনৰ অভিযান সঞ্চালক মিনাক্ষী সুন্দৰম, মুখ্য মন্ত্ৰীৰ প্ৰধান সচিব সঞ্জয় লোহিয়া, প্ৰধান সচিব ৰাজেশ প্ৰসাদৰ লগতে বিভিন্ন জেষ্ঠ বিষয়াসকল উপস্থিত থাকে।