ৰাজ্যৰ বৰ্তমানৰ মুখ্যমন্ত্ৰী হিমন্ত বিশ্ব শৰ্মা উকীল হৈ থকা হ’লে তেওঁ দেশৰ ন্যায় ব্যৱস্থাৰ নেতৃত্ব ল’লেহেঁতেন! দেশৰ ন্যায় ব্যৱস্থাই সঁচাকৈয়ে হেৰুওৱালে হিমন্ত বিশ্ব শৰ্মাক! এই মন্তব্য কৰিছে উচ্চতম ন্যায়ালয়ৰ প্ৰাক্তন মুখ্য ন্যায়াধীশ ৰঞ্জন গগৈয়ে।
কেৱল সিমানেই নহয়, হিমন্ত বিশ্ব শৰ্মাক এগৰাকী আইন কৰ্মী হিচাপে হেৰুৱাই ন্যায় ব্যৱস্থাৰ এগৰাকী কৰ্মী হিচাপে দুখ প্ৰকাশ কৰে ৰঞ্জন গগৈয়ে।
বৃহস্পতিবাৰে ডঃ হিমন্ত বিশ্ব শৰ্মাৰ মুখ্যমন্ত্ৰী ডায়েৰী ১ শীৰ্ষক গ্ৰন্থখন উন্মোচন কৰি মুখ্যমন্ত্ৰীক শৰ্মাক এইদৰে প্ৰশংসাৰে ওপচাই পেলালে প্ৰাক্তন মুখ্য ন্যায়াধীশ গৰাকীয়ে।
প্ৰায়ে বিতৰ্কৰ আৱৰ্তত সোমাই পৰা ৰঞ্জন গগৈয়ে মুখ্যমন্ত্ৰী হিমন্ত বিশ্ব শৰ্মাক এগৰাকী সৌভাগ্যৱান মুখ্যমন্ত্ৰী বুলিও অভিহিত কৰে।
ৰঞ্জন গগৈৰ মতে মুখ্যমন্ত্ৰী হিমন্ত বিশ্ব শৰ্মাই ১৯৫০ চনৰ ভূমিকম্প, ১৯৬২ চনৰ ভাৰত-চীনৰ যুদ্ধ বা অসম আন্দোলন দৰে কোনো পৰিস্থিতিৰ সন্মুখীন হ’ব লগীয়া হোৱা নাই। ইয়াৰ ফলস্বৰূপে মুখ্যমন্ত্ৰী শৰ্মাই উন্নয়নমূলক কামত মনোনিৱেশ কৰিব পাৰিব।
ইফালে হিমন্ত বিশ্ব শৰ্মাই উকীল হৈ থকা হ’লে দেশৰ ন্যায় ব্যৱস্থাৰ চেহেৰাই সলনি হৈ গ’লহেঁতেন বুলি কয় ৰঞ্জন গগৈয়ে। ইমানেই নহয় হিমন্ত বিশ্ব শৰ্মাই ন্যায় ক্ষেত্ৰখনত থকা হ’লে দেশৰ ন্যায় ব্যৱস্থাক নেতৃত্ব প্ৰদান কৰিলেহেঁতেন।
অৱশ্যে মুখ্যমন্ত্ৰী ডঃ হিমন্ত বিশ্ব শৰ্মাৰ সৈতে দুটা কথাত একমত নহয় বুলিও মন্তব্য কৰে ৰঞ্জন গগৈয়ে। গগৈৰ মতে কালি উন্মোচিত হোৱা গ্ৰন্থখনৰ নাম হিমন্ত বিশ্ব শৰ্মাই মুখ্যমন্ত্ৰীৰ ডায়েৰী নহয়, হিমন্ত বিশ্ব শৰ্মাৰ ডায়েৰীহে ৰাখিব লাগিছিল।
কাৰণ গগৈৰ মতে গ্ৰন্থখনত ক’ভিদ কালত হিমন্ত বিশ্ব শৰ্মাই আগবঢ়োৱা অৱদানখিনি বাদ পৰিল। সেয়ে ৰঞ্জন গগৈয়ে গ্ৰন্থখনক হিমন্ত বিশ্ব শৰ্মাৰ ডায়েৰী নামাকৰণ কৰিবলৈ দাবী জনায়। তেতিয়া হিমন্ত বিশ্বৰ বিশাল কৰ্মৰাজি ইয়াত প্ৰতিফলন ঘটিব বুলি গগৈয়ে দোহাৰে।
এইদৰে হিমন্ত বিশ্ব শৰ্মাক প্ৰশংসা কৰা এটা নেন’ সুযোগো নষ্ট নকৰিলে দেশৰ প্ৰাক্তন মুখ্য ন্যায়াধীশ ৰঞ্জন গগৈয়ে। প্ৰাক্তন মুখ্য ন্যায়াধীশগৰাকীয়ে মুখ্যমন্ত্ৰী ডঃ হিমন্ত বিশ্ব শৰ্মাক প্ৰশংসাৰে ইমানে ওপচাই পেলালে যে ৰাজ্যত হৈ থকা ভুৱা এনাউকাণ্টাৰ, বুলডজাৰ ৰাজনীতি, উচ্ছেদৰ ৰাজনীতিৰ বিষয়ে এটাও টু শব্দ উচ্চাৰণ নকৰিলে।
উল্লেখ্য যে দেশৰ মুখ্য ন্যায়াধীশ হিচাপে অৱসৰ গ্ৰহণ কৰাৰ পাছতে ৰঞ্জন গগৈক বিজেপি চৰকাৰে ৰাজ্যসভালৈ মনোনীত কৰিছিল। তেওঁক ৰাজ্যসভালৈ মনোনীত কৰা বিষয়টোৱে দেশৰ ৰাজনীতিত তুমুল বিতৰ্কৰ সৃ্ষ্টি কৰিছিল।
ৰাজ্যসভাৰ সাংসদ হিচাপে শপত গ্ৰহণ কৰাৰ পাছতে ৰঞ্জন গগৈয়ে প্ৰাক্তন মুখ্য ন্যায়াধীশ হিচাপে নিজৰ পূৰ্ব পদমৰ্যাদা লাঘৱ কৰা বুলিও চৰ্চা চলিছিল। লগতে বহুতে ৰঞ্জন গগৈক ক্ষমতাৰ প্ৰতি লালায়িত বুলিও অভিহিত কৰিছিল।
এতিয়া ৰঞ্জন গগৈয়ে মুখ্যমন্ত্ৰী ড৹ হিমন্ত বিশ্ব শৰ্মাক প্ৰশংসাৰে উপচাই দিয়াৰ সময়ত এই প্ৰসংগবোৰ মানুহৰ মনত পুনৰ এবাৰ সজীৱ হৈ উঠিছে।