অসমৰ উচ্চ শিক্ষা ক্ষেত্ৰত শেহতীয়াকৈ এক উদ্বেগজনক ছবি পোহৰলৈ আহিছে। গুৱাহাটীৰ ললিত চন্দ্ৰ ভৰালী মহাবিদ্যালয়ৰ অধ্যক্ষ অমৰেন্দ্ৰ কলিতাই ৰাজ্যৰ মহাবিদ্যালয়সমূহৰ পৰা বৃহৎ সংখ্যক ছাত্ৰ-ছাত্ৰীয়ে শিক্ষা আধাতে ত্যাগ কৰা (ড্ৰপ-আউট) ঘটনাক লৈ গুৰুতৰ প্ৰশ্ন উত্থাপন কৰিছে। তেওঁৰ মতে, চৰকাৰী সা-সুবিধা তথা সাহায্যৰ পাছতো ছাত্ৰসকলৰ মহাবিদ্যালয় ত্যাগ কৰাৰ এই প্ৰৱণতাই এক গভীৰ সামাজিক সংকটৰ ইংগিত দিছে।
সামাজিক মাধ্যমত প্ৰকাশ কৰা এটা প’ষ্টত অধ্যক্ষগৰাকীয়ে আঙুলিয়াই দিছে যে ৰাজ্য চৰকাৰে কলেজত নামভৰ্তি বিনামূলীয়া কৰাৰ লগতে ২০২৫ শৈক্ষিক বৰ্ষত নামভৰ্তি কৰা ছাত্ৰসকলক ‘মুখ্যমন্ত্ৰী নিযুত বাবু আঁচনি’ৰ অধীনত মাহে এহাজাৰ টকাকৈ জলপানি দিয়াৰ কথা ঘোষণা কৰিছিল। কিন্তু আচৰিত ধৰণে, এই আৰ্থিক সাহায্য লাভৰ বাবেও ছাত্ৰসকলৰ মাজত বিশেষ উৎসাহ দেখা পোৱা হোৱা নাই। তথ্য অনুসৰি, ছমাহ আগতে নামভৰ্তি কৰা ছাত্ৰসকলৰ প্ৰায় আধা সংখ্যকে এই আঁচনিৰ বাবে আবেদন জনোৱা নাই।
চৰকাৰী আৰু বিশ্ববিদ্যালয়ৰ তথ্যৰ উদ্ধৃতি দি অধ্যক্ষ কলিতাই জানিবলৈ দিয়ে যে ২০২৫ চনৰ জুলাই মাহত ৰাজ্যৰ চৰকাৰী আৰু প্ৰাদেশিকৃত মহাবিদ্যালয়সমূহত মুঠ ৯০ হাজাৰ ছাত্ৰ-ছাত্ৰীয়ে নামভৰ্তি কৰিছিল। কিন্তু পৰিতাপৰ বিষয় যে ছমাহ পাছতে অনুষ্ঠিত প্ৰথম ষান্মাসিকৰ পৰীক্ষাত প্ৰায় ২৮ হাজাৰ শিক্ষাৰ্থীয়ে পৰীক্ষাৰ প্ৰপত্ৰ পূৰণ নকৰিলে। অৰ্থাৎ মাত্ৰ ছমাহৰ ভিতৰতে ৰাজ্যৰ উচ্চ শিক্ষা খণ্ডৰ পৰা প্ৰায় ২৮ হাজাৰ শিক্ষাৰ্থী নোহোৱা হৈ পৰিছে।
এই পৰিস্থিতিক অতি চিন্তনীয় আখ্যা দি অধ্যক্ষগৰাকীয়ে সমাজ তথা চৰকাৰৰ ওচৰত কেইটামান মৌলিক প্ৰশ্ন উত্থাপন কৰিছে:
বিনামূলীয়া নামভৰ্তি আৰু যাতায়তী খৰচৰ আশ্বাসৰ পাছতো ছাত্ৰ-ছাত্ৰীৰ ‘ড্ৰপ-আউট’ৰ সংখ্যা ইমান বেছি কিয়?
এই ড্ৰপ-আউটৰ বৃহৎ অংশটো কেৱল ছাত্ৰ বা ল‘ৰাই কিয়? তেওঁলোক শিক্ষা এৰি কোনবোৰ কামত নিয়োজিত হৈছে?
বৰ্তমান সময়ত স্নাতক বা স্নাতকোত্তৰ ডিগ্ৰীৰ সামাজিক তথা অৰ্থনৈতিক মূল্য কমি গৈছে নেকি?
এয়া নতুন শিক্ষানীতিৰ প্ৰভাৱ নে ইয়াৰ আঁৰত কোনো গভীৰ অৰ্থনৈতিক আৰু সামাজিক কাৰণ নিহিত আছে?
চৰকাৰী আঁচনিসমূহৰ উপযোগিতাৰ ক্ষেত্ৰত ক’ৰবাত ত্ৰুটি ৰৈ গৈছে নেকি?
অধ্যক্ষ অমৰেন্দ্ৰ কলিতাই মত পোষণ কৰে যে যদি এই ধাৰা অব্যাহত থাকে, তেন্তে ভৱিষ্যতে মহাবিদ্যালয়সমূহত ছাত্ৰৰ সংখ্যা একেবাৰে নগণ্য হৈ পৰিব। পৰিস্থিতিৰ ভয়াৱহতা লক্ষ্য কৰি তেওঁ অভিভাৱক, শিক্ষক, চৰকাৰ আৰু সচেতন ৰাইজক এই বিষয়ত এক মুকলি আলোচনাৰ বাবে আহ্বান জনাইছে। তেওঁৰ মতে, সমাজৰ বৃহৎ স্বাৰ্থত এই সমস্যাৰ গভীৰলৈ গৈ ইয়াৰ প্ৰকৃত কাৰণ নিৰ্ণয় কৰাটো অতি জৰুৰী হৈ পৰিছে।
