শুকুৰবাৰে হোটেল গেটৱে’ গ্ৰেণ্ডৱেৰত এক সংবাদমেল সম্বোধন কৰি কংগ্ৰেছৰ কামৰূপ মহানগৰ জিলা সমিতিৰ সভানেত্ৰী জুৰি শৰ্মা বৰদলৈৰ সৈতে ১৫০ জনে পদত্যাগ কৰে।
পদত্যাগ পত্ৰ দাখিল কৰি নেতৃত্বৰ খোৱা কামোৰা, স্বজন-প্ৰীতিত কংগ্ৰেছ বিধস্ত বুলি উল্লেখ কৰি তেওঁ কয়, “কংগ্ৰেছৰ দুমুখীয়া চৰিত্ৰৰ বাবেই আজি কংগ্ৰেছ পদত্যাগ কৰিবলৈ বাধ্য। মোৰ লগতে ১৫০ জনে আজি কংগ্ৰেছ ত্যাগ কৰিছে।‘’
অসম প্ৰদেশ কংগ্ৰেছ কমিটিৰ প্ৰাক্তন সভাপতি তথা অতি দুৰ্দিনত কংগ্ৰেছ দলক অসমত নেতৃত্ব দি অহা ভুৱনেশ্বৰ কলিতায়ো দলৰ কেন্দ্ৰীয় নেতৃত্বৰ কাম-কাজত অসন্তুষ্ট হৈয়েই পদত্যাগ কৰিছিল বুলিও শৰ্মা বৰদলৈয়ে উল্লেখ কৰে।
আনহাতে, এ আই ইউ ডি এফৰ সৈতে মিত্ৰতাৰ সন্দৰ্ভত তেওঁ পুনৰ কয়,”অসমৰ লক্ষ লক্ষ কংগ্ৰেছ নেতা-কৰ্মীয়ে নিবিচাৰা সত্বেও হাইকামাণ্ডে এ আই ইউ ডি এফৰ সৈতে কংগ্ৰেছৰ মহাজোঁট বান্ধি দিলে যাৰ ফলত ৰাজ্যখনৰ গৰিষ্ঠসংখ্যক হিন্দুৱে কংগ্ৰেছক প্ৰত্যাখান কৰিলে। কংগ্ৰেছ দলৰ বহু সক্ৰিয় হিন্দু কৰ্মীয়েও কংগ্ৰেছ দলত থাকিও ভোট কংগ্ৰেছক নিদিলে। সংখ্যালাঘু মুছলমান সম্প্ৰদায়ৰ অধিক তুষ্টিকৰণে দলটোক ক্ৰমনবয়ে পাহৰণিৰ গৰ্ভলৈ ঠেলি দিলে।”
কংগ্ৰেছ দলত জড়িত হৈ থকা বিশেষকৈ হিন্দু, বৌদ্ধ, জৈন, খ্ৰীষ্টান আৰু অসমীয়া মুছলমান ভাইসকলক দল ত্যাগ কৰি এক সময়োচিত সিদ্ধান্ত ল’বলৈ আহ্বান জনায় জুৰি শৰ্মা বৰদলৈয়ে।
তেওঁ লগতে কেন্দ্ৰত নেতৃত্বত থকা কংগ্ৰেছ নেতা ৰাহুল গান্ধীকো ব্যৰ্থ নেতা বুলি উল্লেখ কৰে।
