বিশ্বব্যাপী ত্রাসৰ সৃষ্টি কৰা ক’ৰ’না মহামাৰী প্ৰতিৰোধৰ নামত দিল্লী আৰু দিছপুৰৰ চৰকাৰে নিজৰ সমস্ত দ্বায়িত্ব জনসাধাৰণৰ ওপৰত জাপি দি নীৰৱে লুন্ঠন চলোৱা কাৰ্য্য দূৰ্ভাগ্যজনক তথা জনগণৰ প্ৰতি বিশ্বাসঘাতকতা বুলি অভিহিত কৰিছে অসম প্ৰদেশ কংগ্ৰেছ কমিটিৰ সাধাৰণ সম্পাদক তথা জ্যেষ্ঠ মুখপাত্ৰ অপূৰ্ব কুমাৰ ভট্টাচাৰ্য্যই।
চৰকাৰৰ আহ্বানৰ প্ৰতি সহাঁৰি জনাই দেশবাসীয়ে বিশ্বাস আৰু আস্থাৰে প্ৰধান মন্ত্রীৰ সাহায্য নিধিলৈ প্ৰদান কৰা পুঁজিৰ ক্ষেত্ৰতো কোনো ধৰণৰ স্বচ্ছতা ফুটি উঠা নাই বুলি মন্তব্য কৰে ভট্টচাৰ্য্যই।
গুৰত্বপূৰ্ণ কথা যে, প্ৰধান মন্ত্ৰী মোডীক সমালোচনা কৰি জ্যেষ্ঠ মুখপাত্ৰ গৰাকীয়ে কয়, ‘‘বিগত ফাকুৱাৰ সময়ত চীনা ৰঙং ব্যৱহাৰ নকৰিবলৈ কোৱা চৰকাৰে কাৰ স্বাৰ্থত আই চি এম আৰে নিষিদ্ধ কৰা পি পি ই আৰু ৰেপিড টেষ্টিং কিট ক্ৰয় কৰিলে তাকো ২৪৫ টকাৰ সামগ্ৰী ৬০০ টকাত ? মোদীজিৰ কেন্দ্ৰীয় চৰকাৰৰ দ্বাৰা সংঘটিত এই লুন্ঠনে প্ৰমাণ কৰি দিলে বিজেপিৰ দেশপ্ৰেম তথা প্ৰধান মন্ত্রী দেৱৰ ‘না খাউগাং,না খানে দুংগা নীতি।’’
মুখ্য মন্ত্রী সোণোৱাল নেতৃত্বাধীন বিজেপি মিত্রজোঁট চৰকাৰৰ মাজত চলিছে দেশসেৱাৰ নামত অলিখিত প্ৰতিযোগিতা। চৰকাৰ প্ৰকৃতাৰ্থত কোনে চলাইছে ধৰাই টান হৈ পৰিছে বুলি উল্লেখ কৰে ভট্টচাৰ্য্যয়।
‘‘জনসেৱাৰ নামত সাধাৰণ ৰাইজৰ কান্ধত সকলো দ্বায়িত্ব অৰ্পণ কৰা হৈছে।জীয়াই থকাৰ আশাত আমি সকলো গৃহবন্দী হৈ থকাৰ সুযোগ গ্ৰহণ কৰি আতংক সৃষ্টিৰে মেৰুকৰণৰ ৰাজনীতিৰে দৰিদ্ৰজনক সাহায্য প্ৰদানতো নিকৃষ্ট ৰাজনীতি কৰা হ’ল। চৰম দূৰ্ভাগ্যজনক। সাহায্য সংগ্ৰহৰ নামত অঘোষিত প্ৰতিযোগিতা চলিছে। ইয়াতো স্পষ্ট নহয় ক’ত কিমান ধন জমা হৈছে, লগতে ক’ত কেনেকৈ খৰচ হব?, আমাৰদৰে সকলো ৰাইজে সাধ্যনুসৰি ধনে-জনে আৰ্তজনৰ প্ৰতি সেৱা আগবঢ়াই আহিছে’’-ভট্টাচাৰ্য্যই লগতে কয়।
কিন্তু, ৰাজ্যৰ স্বাস্থ্য মন্ত্রী গৰাকীয়ে অহৰ্নিশে তদাৰক কৰি থকাৰ মাজতে চৰকাৰী নীতি-নিয়ম উলংঘা কৰি চকুৰকুটা চীন দেশৰ পৰা আই চি এম আৰে নিষিদ্ধ কৰা কোম্পানীৰ পৰা মধ্যভোগীৰ জৰিয়তে অধিক দামত কিনা পিপিই আৰু ৰেপিড টেষ্টিং কিটৰ ক্ষেত্রত মুখ্য মন্ত্রী ডাঙৰীয়া আপুনি আৰু আপোনাৰ চৰকাৰ নীৰৱ কিয় বুলিও প্ৰশ্ন কৰে মুখপাত্ৰ ভট্টচাৰ্য্যই।
কৰ্মচাৰীৰ এদিনৰ দৰমহা আদায়ৰ লগতে চলিত বৰ্ষৰ জানুৱাৰী মাহৰ পৰা ২০২১ৰ জুন মাহলৈকে মৰগীয়া বানচ নিদিয়াৰ সিদ্ধান্ত কিমান যুক্তিসংগত হ’ব। দ্বায়িত্ব পালনৰ নামত চাৰ্টাড বিমান, হেলিকপ্টাৰত ভ্ৰমণ কৰা কাৰ্য্য সমৰ্থনযোগ্য নে। ইতিমধ্যে সকলো কামৰ অন্তৰালত থকা ৰাজনীতি জোলোঙাৰ মেকুৰী ওলোৱাদি ওলাইছে। অন্যথা কৰ্মহীন, খাদ্যহীন তথা সৰ্বস্বান্ত কৃষকৰ ৰোষৰ সন্মুখীন হব লাগিব বুলি মন্তব্য কৰে অপূৰ্ব ভট্টচাৰ্যই ৷
