ৰাজ্যৰ ক’ৰ’না ভাইৰাছৰ শেহতীয়া পৰিস্থিতি সন্দৰ্ভত স্বাস্থ্য মন্ত্ৰী হিমন্ত বিশ্ব শৰ্মাই আজি এখন সংবাদমেল সম্বোধন কৰে।
ক’ৰ’নাৰ পৰা আৰোগ্য লাভৰ সংখ্যা, মৃত্যুৰ হাৰ আদিৰ ক্ষেত্ৰত দেশৰ ভিতৰতে অসমে ভাল ফলাফল দেখুৱাইছে বুলি সংবাদমেলত মন্ত্ৰী হিমন্ত বিশ্ব শৰ্মাই উল্লেখ কৰে।
অসমত বৰ্তমানলৈ আৰোগ্য লাভৰ হাৰ ৬৩.৩ শতাংশ বুলি উল্লেখ কৰি হিমন্ত বিশ্ব শৰ্মাই এইক্ষেত্ৰত একমাত্ৰ গুজৰাট (৭০ শতাংশ) অসমৰ আগত আছে বুলি জানিবলৈ দিয়ে।
সমগ্ৰ বিশ্বত মৃত্যুৰ হাৰ ৫ শতাংশ আৰু ভাৰতত মৃত্যুৰ হাৰ ৩ শতাংশ হোৱাৰ বিপৰীতে অসমত এতিয়ালৈ মৃত্যৰ হাৰ দশমিকত আছে বুলিও স্বাস্থ্য মন্ত্ৰী গৰাকীয়ে লগতে উল্লেখ কৰে।
আনহাতে, অসমতে আজি ৩ লাখ ক’ৰ’না টেষ্ট সম্পন্ন কৰা ৰাজ্যৰ ভিতৰত নিজৰ নাম অন্তৰ্ভূক্ত কৰিব বুলি জানিবলৈ দি হিমন্ত বিশ্ব শৰ্মাই দেশৰ মাত্ৰ কেইখন মান ৰাজ্যই হে ৩ লাখ ক’ৰ’না টেষ্ট কৰিছে বুলি কয়।
শেহতীয়াকৈ ৰাজ্যৰ স্বাস্থ্য বিভাগে মাত্ৰ ৯ দিনৰ ভিতৰতে ১ লাখ ক’ৰ’নাৰ টেষ্ট সম্পন্ন কৰিবলৈ সক্ষম হৈছে বুলিও হিমন্ত বিশ্ব শৰ্মাই কয়।
তদুপৰি, ২১ জুনৰ পাছত শ্ৰমিক ৰে’লেৰে মানুহ উভতি অহা শেষ হ’ব বুলি জানিবলৈ দি হিমন্ত বিশ্ব শৰ্মাই ইয়াৰ সাত দিন পাছত অৰ্থাৎ প্ৰায় জুলাইৰ প্ৰথম সপ্তাহৰ পৰাই ৰাজ্যত কোৱাৰেণ্টাইন কেন্দ্ৰ সমূহৰ ওপৰত থকা চাপ হ্ৰাস পাব বুলি মন্ত্ৰী গৰাকীয়ে সংবাদমেলত সদৰী কৰে।
কোৱাৰেণ্টাইনৰ চাপ হ্ৰাস পালে স্বাস্থ্য বিভাগে সম্পূৰ্ণভাৱে কোভিড-১৯ চিকিৎসাৰ ক্ষেত্ৰত মনোযোগ দিব পাৰিব বুলিও হিমন্তই লগতে কয়।
