অসমৰ মুখ্য মন্ত্ৰী সৰ্বানন্দ সোণোৱালৰ প্ৰত্যক্ষ নিয়ন্ত্ৰণত থকা তথ্য আৰু জনসংযোগ বিভাগে অঘোষিত নীতি আৰু যোগ্যতাৰ ভিত্তিত একাংশ সাংবাদিকক টেবলেট প্ৰদান কৰিছে।
বিভাগটোৱে ৰাজ্যখনৰ সাংবাদিকৰ মাজত ২০০টা চেমচাং গেলেক্সি টেবলেট বিতৰণ কৰিছে; কিন্তু অভিযোগ মতে, কিহৰ ভিত্তিত এইসমূহ প্ৰদান কৰা হৈছে সেয়া ৰাজহুৱা কৰা হোৱা নাই।
ৰাজীৱ কুমাৰ নামৰ সাংবাদিক এজনে বিভাগটোত আৰ টি আই কৰাৰ পিছতো এই বিষয়ে সদুত্তৰ নোপোৱা বুলি সদৰী কৰি শুকুৰবাৰে এই অভিযোগ কৰিছে।
বিভাগটোৰ বিৰুদ্ধে উত্থাপিত এই অভিযোগ নিশ্চয়কৈ মুখ্য মন্ত্ৰীৰ বাবে অস্বস্তিকৰ হ’ব পাৰে।
কুমাৰে কোৱামতে, টেবলেটসমূহ বিতৰণৰ “মানদণ্ড সম্পৰ্কে বিভাগ অৱগত নহয়” বুলি তথ্য আৰু জনসংযোগ বিভাগে তেওঁৰ আৰ টি আই আবেদনৰ উত্তৰত জনাইছে।
২০১৮-১৯ আৰু ২০১৯-২০ বিত্ত বৰ্ষত টেবলেট প্ৰদানৰ বাবে সাংবাদিকসকলৰ তালিকা “কোনে প্ৰস্তুত কৰিছিল” আৰু “কি নীতিৰ আধাৰত” এইসমূহ বিতৰণ কৰা হৈছিল তাৰো কোনো তথ্য বিভাগটোৰ হাতত নাই, কুমাৰৰ অভিযোগ।
[pdf-embedder url=”https://assam.nenow.in/wp-content/uploads/2019/10/Final-1-converted.pdf”]
টেবলেটৰ কাৰণে হামৰাও কঢ়া নাই বুলি উল্লেখ কৰি কুমাৰে কৈছে মূল প্ৰশ্নটো হৈছে চৰকাৰী নীতিৰ। আৰু তেওঁৰমতে, এনে বৈষম্যৰ জৰিয়তে চৰকাৰে সাংবাদিকৰ মাজত বিভাজন আনিব খুজিছে।
“প্ৰতিষ্ঠানবিৰোধী আৰু চৰকাৰৰমতে নচলা বুলি ধাৰণা কৰা বহু জ্যেষ্ঠ স্বীকৃত সাংবাদিকৰ ক্ষেত্ৰতো বিভাগটোৱে বদান্যতা এৰাই চলিলে। মই এখন আৰ টি আই আবেদন কৰাৰ পিছতো আনকি চৰকাৰে কথাটো ৰাজহুৱা নকৰিলে,” কুমাৰে কয়।
অসমৰ তথ্য আৰু জনসংযোগ বিভাগৰ এই কাণ্ডই বিজেপি চৰকাৰৰ শ্ল’গান “চবকা চাথ, চবকা বিকাশ” অন্তঃসাৰশূন্যতা প্ৰমাণ কৰা বুলি কুমাৰে মন্তব্য কৰিছে।
“বিজেপিৰ শ্ল’গান চবকা চাথ, চবকা বিকাশ অসমৰ মুখ্য মন্ত্ৰী সৰ্বানন্দ সোণোৱালে প্ৰায়েই আওৰাই থাকে। কিন্তু সকলোকে সামৰি লোৱাৰ এই দাবীৰ অন্তঃসাৰশূন্যতা ৰাজ্যৰ তথ্য আৰু জনসংযোগ বিভাগতে জলজল পটপট হৈ আছে,” কুমাৰে কয়।
খবৰমতে, ২০১৮ চনৰ এপ্ৰিলৰ পৰা ২০১৯ চনৰ ছেপ্তেম্বৰলৈকে টেবলেটসমূহ বিতৰণ কৰা হৈছিল।
চৰকাৰী তথ্যমতে ২০০গৰাকী সাংবাদিকে বেলেগ বেলেগ তাৰিখে এই টেবলেটসমূহ গ্ৰহণ কৰিছে।
