অসমে ৰাজ্য চৰকাৰৰ বাবে কেন্দ্ৰৰ ৪৯ কোটি টকাৰ এক পুঁজি ব্যৱহাৰৰ সুযোগ হেৰুৱাব লগা হৈছে।
অসমত এক দৰৱ নিয়ামক ব্যৱস্থা গঢ়ি তোলাৰ বাবে কেন্দ্ৰই পুঁজিখিনিত অনুমোদন জনাইছিল।
কেন্দ্ৰীয় স্বাস্থ্য আৰু পৰিয়াল কল্যাণ ৰাজ্যিক মন্ত্ৰী অশ্বিনী কুমাৰ দুবেই কংগ্ৰেছ সাংসদ আব্দুল খালেকৰ প্ৰশ্নৰ উত্তৰত শেহতীয়াকৈ লোক সভাত এই কথা সদৰী কৰিছে।
“অসম ৰাজ্যক ৪৯ কোটি টকাৰ এক সূচক পৰিমাণ আবণ্টন দিয়া হৈছিল। অসম চৰকাৰে ভাৰত চৰকাৰৰ সৈতে বুজাবুজিৰ চুক্তি স্বাক্ষৰ নকৰিলে, সেয়ে কোনো ধন মোকলাই দিয়া নহ’ল,” মন্ত্ৰীজনে কয়।
পুঁজিখিনি আছিল কেন্দ্ৰই গোটেই দেশত দৰৱ নিয়ামক ব্যৱস্থাটো সবল কৰাৰ বাবে লোৱা পদক্ষেপৰ অংশ।
“মুঠ ১৭৫০ কোটি টকা ব্যয়েৰে কেন্দ্ৰীয় আৰু ৰাজ্যসমূহৰ চৰকাৰৰ অধীনত দেশৰ দৰৱ নিয়ামক ব্যৱস্থাটো সবলীকৰণৰ এক প্ৰস্তাৱত চৰকাৰে অনুমোদন জনাইছে,” মন্ত্ৰীজনৰ উত্তৰত প্ৰকাশ।
আঁচনিখনত দুটা শিতান ৰখা হৈছে— ৯০০ কোটি টকা ব্যয়সাপেক্ষে কেন্দ্ৰীয় দৰৱ মানক নিয়ন্ত্ৰণ সংস্থা (CDSCO) আৰু ৮৫০ কোটি টকা ব্যয়েৰে ৰাজ্যিক দৰৱ নিয়ামক ব্যৱস্থাৰ সবলীকৰণ।
আঁচনিখনৰ অধীনত গুৱাহাটীৰ ৰেজিঅ’নেল ড্ৰাগছ টেষ্টিং লেবৰেটৰি (RTDL)ক ১৮.১৪ কোটি টকা নতুন লেব নিৰ্মাণৰ বাবে মোকলাই দিয়া হৈছে।
“উক্ত ধনৰাশিৰ ১৩.৩৪ কোটি টকা চি পি ডব্লিউ দিয়ে ইতিমধ্যে ব্যৱহাৰ কৰিছে,” ডুবেই কয়।
মন্ত্ৰীজনে লগতে জনায় যে গুৱাহাটীৰ পৰীক্ষাগাৰটোৰ বাবে মুঠ ১৭টা পদত অনুমোদন জনোৱা হৈছে আৰু ৪১গৰাকী চুক্তিভিত্তিক কৰ্মচাৰী যোগান ধৰা হৈছে।
পৰীক্ষাগাৰটোৰ কামৰ বৰ্ধিত বোজা মোকাবিলাৰ বাবে এই ব্যৱস্থা লোৱা হৈছে, ডুবেই কয়।
