অসমৰ বান: জৰুৰী মনোযোগ দিবলৈ প্ৰধান মন্ত্ৰীক আহ্বান প্ৰা. প্ৰ. মন্ত্ৰী দেৱেগৌড়াৰ

ভাৰতৰ প্ৰাক্তন প্ৰধান মন্ত্ৰী এইচ ডি দেৱেগৌড়াই অসমৰ চলিত বান পৰিস্থিতিৰ প্ৰতি জৰুৰী মনোযোগ দিবলৈ প্ৰধান মন্ত্ৰী নৰেন্দ্ৰ মোদী তথা কেন্দ্ৰক আহ্বান জনাইছে।

“অসমত উদয় হোৱা পৰিস্থিতিৰ প্ৰতি জৰুৰী মনোযোগ দিবলৈ আৰু ৰাজ্য চৰকাৰক সৰ্বোচ্চ সহায় আগবঢ়াবলৈ মই প্ৰধান মন্ত্ৰী আৰু কেন্দ্ৰীয় চৰকাৰক আহ্বান জনাইছো,” দেৱেগৌড়াৰ এক বিবৃতিত প্ৰকাশ।

প্ৰাক্তন প্ৰধান মন্ত্ৰীজনে কয় যে ক’ভিড-১৯ মহামাৰীৰ সময়ত অসমে দুফালে যুঁজিব লগা হৈছে।

“ক’ভিড-১৯ মহামাৰীয়ে দেশজুৰি প্ৰচণ্ড ৰূপ লোৱাৰ সময়ত এইটো দুৰ্ভাগ্যজনক যে অসমৰ মানুহে বানপানী আৰু ই সৃষ্টি কৰা মৃত্যু আৰু বিস্থাপনৰ সৈতে সংঘৰ্ষ কৰিব লগা হৈছে,” তেওঁ কয়।

I am deeply disturbed by the reports of floods in Assam. I appeal to the Prime Minister and the central government to pay urgent attention to the situation and offer maximum assistance.#AssamFloods #AssamNeedsHelp@PMOIndia @sarbanandsonwal @CMOfficeAssam pic.twitter.com/3kdJQgOx6I

— H D Devegowda (@H_D_Devegowda) July 17, 2020

অসমৰ চলিত বানত এতিয়ালৈকে ৭১গৰাকী লোকে প্ৰাণ হেৰুৱাইছে।

বানত ২৭খন জিলাৰ প্ৰায় ৪০লাখ লোক আক্ৰান্ত হৈছে। ৰাজ্যৰ ১.৩১ লাখ হেক্তৰ কৃষিভূমি বানত ক্ষতিগ্ৰস্ত হৈছে।

চলিত বানে প্ৰায় ৫০হাজাৰ লোকক গৃ্হহীন কৰিছে। চৰকাৰে ৩০৩টা আশ্ৰয় শিৱিৰ স্থাপন কৰিছে।

বানত ঘৰচীয়া পশুধন আক্ৰান্ত হোৱাৰ লগতে কাজিৰঙা ৰাষ্ট্ৰীয় উদ্যানত এতিয়ালৈকে ৭৬টা জন্তুৱে প্ৰাণ হেৰুৱাইছে।

প্ৰধান মন্ত্ৰী নৰেন্দ্ৰ মোদীয়ে অসমৰ চলিত বানত নিহতৰ নিকট আত্মীয়লৈ ২লাখকৈ টকাৰ সাহায্য ইতিপূৰ্বে ঘোষণা কৰিছিল।

লগতে পঢ়ক– অসমৰ বানত নিহতৰ নিকট আত্মীয়লৈ ২লাখ টকাৰ সাহায্য ঘোষণা প্ৰধান মন্ত্ৰীৰ