সম্প্ৰসাৰণ কৰা হ’ল অসম মন্ত্ৰীসভা। যোৱা ৫ জুনত ১২ গৰাকী বিধায়কে মন্ত্ৰীত্ব লাভ কৰাৰ পিছত আজি ৮ জুন তাৰিখে তেওঁলোকক নিজৰ নিজৰ দপ্তৰ সমূহ প্ৰদান কৰা হৈছে।
এই অনুসৰি ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাই নিজৰ হাতত ৰাখিছে গৃহ আৰু ৰাজনৈতিক বিভাগ, লোক নিৰ্মাণ বিভাগৰ ভৱন আৰু ৰাষ্ট্ৰীয় ঘাইপথ শাখা, লোক নিৰ্মাণ বিভাগৰ পথ শাখা, শক্তি বিভাগ, আৰু তথ্য, জনসংযোগ, মুদ্ৰণ আৰু ষ্টেচনেৰী বিভাগ। ইয়াৰ উপৰিও আন কোনো মন্ত্ৰীক আৱণ্টন নিদিয়া সকলো বিভাগ মুখ্যমন্ত্ৰীৰ নিজৰ হাততে থাকিব।
আনহাতে অশ্বিনী ৰায় চৰকাৰক সমাজ ন্যায় আৰু সবলীকৰণ বিভাগ, ভূমি সংৰক্ষণ বিভাগ, আৰু সংখ্যালঘু কল্যাণ আৰু উন্নয়ন বিভাগৰ দায়িত্ব অৰ্পণ কৰা হৈছে।
অশোক সিংহলে লাভ কৰিছে স্বাস্থ্য আৰু পৰিয়াল কল্যাণ বিভাগ তথা চিকিৎসা শিক্ষা আৰু গৱেষণা বিভাগ।
মন্ত্ৰী বিমল বৰাক সাংস্কৃতিক পৰিক্ৰমা বিভাগ, উদ্যোগ, বাণিজ্য আৰু ৰাজহুৱা উদ্যোগ বিভাগ, আৰু এক্ট ইষ্ট নীতি বিষয়ক বিভাগৰ গুৰুত্বপূৰ্ণ দায়িত্ব দিয়া হৈছে।
বিশ্বজিৎ দৈমাৰীয়ে লাভ কৰিছে হস্ত তাঁত, বস্ত্ৰ আৰু ৰেচম বিভাগ, ক্ৰীড়া আৰু যুৱ কল্যাণ বিভাগ, দক্ষতা, নিয়োগ আৰু উদ্যোগ বিভাগৰ লগতে খিলঞ্জীয়া আৰু জনজাতীয় বিশ্বাস আৰু সাংস্কৃতিক বিভাগ।
মন্ত্ৰীসভাৰ এই নতুন তালিকাত জয়ন্ত মল্লবৰুৱাক বিত্ত বিভাগ, পৰিৱেশ আৰু বন বিভাগ, আৰু খনি আৰু খনিজ বিভাগৰ দায়িত্ব দিয়া হৈছে। কৌশিক ৰায়ে লাভ কৰিছে খাদ্য, ৰাজহুৱা বিতৰণ আৰু গ্ৰাহক পৰিক্ৰমা বিভাগ, গৃহ নিৰ্মাণ আৰু নগৰ পৰিক্ৰমা বিভাগ, আৰু সমবায় বিভাগ। কেশৱ মহন্তক ৰাজহ আৰু দুৰ্যোগ ব্যৱস্থাপনা বিভাগ, বিজ্ঞান, প্ৰযুক্তি আৰু জলবায়ু পৰিৱৰ্তন বিভাগ, আৰু সাধাৰণ প্ৰশাসন বিভাগৰ গুৰুত্বপূৰ্ণ দায়িত্ব অৰ্পণ কৰা হৈছে। আনহাতে কৃষ্ণেন্দু পালে জনস্বাস্থ্য কাৰিকৰী বিভাগ, পাহাৰীয়া অঞ্চল বিভাগ, আৰু বৰাক উপত্যকা উন্নয়ন বিভাগ লাভ কৰিছে।
মন্ত্ৰীসভাত স্থান পোৱা নীলিমা দেৱীক পশুপালন আৰু পশু চিকিৎসা বিভাগ তথা মীন বিভাগৰ দায়িত্ব দিয়া হৈছে। পীযুষ হাজৰিকাই লাভ কৰিছে কৃষি বিভাগ, জলসিঞ্চন বিভাগ, আৰু সংসদীয় পৰিক্ৰমা বিভাগ। ড০ ৰণোজ পেগুক বিদ্যালয় শিক্ষা বিভাগ, উচ্চ শিক্ষা বিভাগ, জনজাতীয় পৰিক্ৰমা ভৈয়াম বিভাগ, আৰু তথ্য প্ৰযুক্তি বিভাগৰ গুৰুত্বপূৰ্ণ দায়িত্ব অৰ্পণ কৰা হৈছে। শেষত, সুশান্ত বৰগোহাঁইক জল সম্পদ বিভাগ আৰু ন্যায়িক বিভাগৰ দায়িত্ব দিয়া হৈছে। এই নতুন দায়িত্ব বিভাজনেৰে চৰকাৰৰ কাম-কাজ নতুন গতিৰে আগবাঢ়িব বুলি আশা কৰা হৈছে।
