ছিণ্ডিকেটৰ তদন্ত চিবিআইক আগবঢ়াব অসম চৰকাৰে : মন্ত্ৰী পাটোৱাৰী
ৰাজ্যৰ উদ্যোগ আৰু বাণিজ্য বিভাগৰ মন্ত্ৰী চন্দ্ৰমোহন পাটোৱাৰীয়ে সোমবাৰে কয় যে অসম চৰকাৰে শীঘ্ৰেই অসমৰ ছিণ্ডিকেটৰ পুনৰ তদন্ত কৰাৰ বাবে চিবিআইক অনুৰোধ জনাব।
ৰাজ্যখনত মুখ্য মন্ত্ৰীৰ কাৰ্যালয়ৰ পৰা ছিণ্ডিকেট চলি থকা আৰু নিয়ন্ত্ৰিত হৈ থকা বুলি নগাঁও লোকসভা সমষ্টিৰ সাংসদ প্ৰদ্যুৎ বৰদলৈয়ে অভিযোগ অনাৰ এদিন পাছতেই পাটোৱাৰীয়ে এই প্ৰতিক্ৰিয়া প্ৰকাশ কৰিছে।
‘’এতিয়া কোনো ছিণ্ডিকেট চলি থকা নাই। কংগ্ৰেছ হতাশ হৈছে আৰু সেয়েহে তেওঁলোকে বিষয়টো ৰাজনীতিকৰণ কৰাৰ চেষ্টা চলাইছে। বিজেপি নেতৃত্বাধীন অসম চৰকাৰখনে কাৰ্যভাৰ গ্ৰহণ কৰাৰ মাত্ৰ দুমাহ পাছতে ছিণ্ডিকেটৰ অভিযোগৰ এক চিবিআই তদন্তৰ নিৰ্দেশ দিছিল। চৰকাৰে লগতে ছিণ্ডিকেটৰ সন্দৰ্ভত অনুসন্ধান চলাবলৈ চিবিআইক অনুৰোধ জনাইছে,’’-পাটোৱাৰীয়ে এখন সংবাদমেলত সোমবাৰে এইদৰে কয়।
পাটোৱাৰীয়ে কয় যে বিজেপি নেতৃত্বাধীন চৰকাৰখনে ২০১৮-১৯ বিত্তীয় বৰ্ষত অবৈধ কয়লা কঢ়িওৱা ৩০০ খন ট্ৰাক জব্দ কৰিছে আৰু অবৈধ কয়লা ব্যৱসায়ৰ সৈতে জড়িত ১০০জন লোকক গ্ৰেপ্তাৰ কৰিছে। অকল চলিত মাহটোতেই চোৰাং সৰবৰাহৰ বাবে নিয়া ৪৫০ টা গৰু জব্দ কৰা হৈছে আৰু এই অবৈধ ব্যৱসায়ৰ সৈতে জড়িত ৫৫ জন লোকক গ্ৰেপ্তাৰ কৰা হৈছে,’’-তেওঁ কয়।
পাটোৱাৰীয়ে লগতে কয় যে গৰুৰ চোৰাং ব্যৱসায়ৰ সৈতে জড়িত মূল নায়ক ছৰফৰাজক দেওবাৰে বিহাৰৰ গোলাপগঞ্জৰ পৰা গ্ৰেপ্তাৰ কৰি অসমলৈ অনা হৈছে। তদুপৰি, পাটোৱাৰীয়ে কয় যে নতুন চৰকাৰখনে কাৰ্যভাৰ গ্ৰহণ কৰাৰ পাছত দুৰ্নীতিত জড়িত থকাৰ বাবে চৰকাৰী বিষয়াকে ধৰি পূৰ্বতে কেইবাজনো লোকক গ্ৰেপ্তাৰ কৰা হৈছে।
উদ্যোগ মন্ত্ৰী গৰাকীয়ে লগতে লোকসভাৰ সাংসদ তথা কংগ্ৰেছ নেতৃত্বাধীন চৰকাৰখনৰ প্ৰাক্তন মন্ত্ৰীগৰাকীক কংগ্ৰেছ চৰকাৰৰ শাসনকালত সমাজ কল্যাম বিভাগৰ অধীনৰ আঁচনিত সাত লাখ অস্তিত্বহীন শিশুক হিতাধিকাৰী সজোৱা বিষয়ত উত্তৰ দিয়াৰ বাবে আহ্বান জনায়।
‘’বৰদলৈ কংগ্ৰেছৰ শাসনত ক্ষমতাশালী মন্ত্ৰী আছিল আৰু উদ্যোগ, বন আৰু আনকি গৃহ বিভাগৰ দৰে গুৰুত্বপূৰ্ণ বিভাগৰ দায়িত্ব লাভ কৰিছিল। মই তেওঁক সুধিব খোজো তেওঁ কংগ্ৰেছৰ কাৰ্যকালত ৩.৫ লাখ দৰিদ্ৰ লোকক ৰেছন কাৰ্ডৰ সুবিধাৰ পৰা বঞ্চিত কৰি অৱস্থাপন্ন লোকক আৱন্টন দিয়াৰ দায়িত্ব ল’বনে?’’-পাটোৱাৰীয়ে প্ৰশ্ন কৰে।
পাটোৱাৰীয়ে লগতে কংগ্ৰেছৰ কাৰ্যকালত ভাল অৱস্থাসম্পন্ন লোকক ৪.৫ লাখ ভুৱা জবকাৰ্ড দিয়াৰ ক্ষেত্ৰত হোৱা অনিয়মৰ দায়িত্ব বৰদলৈয়ে ল’বনে বুলিও প্ৰশ্ন কৰে।