দেশজুৰি চলি আছে চতুৰ্থ পৰ্যায়ৰ ল’কডাউন।
ক’ৰ’না সংক্ৰমণ প্ৰতিৰোধৰ বাবে লকডাউনৰ ফলত দেশৰ অৰ্থনৈতিক অৱস্থা বেয়াৰ ফালে ঢাল খোৱা বুলি সচেতন মহলত চৰ্চা চলিছিল।
ইয়াৰোপৰি, দেশৰ বিভিন্ন ৰাজ্য চৰকাৰ সমূহে ১০ শতাংশৰ পৰা আৰম্ভ কৰি ৫০ শতাংশ পৰ্যন্ত দৰমহা কৰ্তন কৰিছে।
তেনে সময়তে অসমৰো ৰাজ্যিক কৰ্মচাৰী সকলৰ মনত চিন্তা হৈছিল যে ৰাজ্য চৰকাৰে তেওঁলোকৰ দৰমহাৰ অংশ কৰ্তন কৰিব নেকি?
সেই চিন্তা দূৰ কৰি বিত্ত মন্ত্ৰী ডঃ হিমন্ত বিশ্ব শৰ্মাই টুইটাৰ যোগে জনাইছে যে ৰাজ্যিক কৰ্মচাৰীৰ মে’ মাহৰ দৰমহা কৰ্তন কৰা নহয়।
টুইটাৰত এই কথা প্ৰকাশ কৰি মন্ত্ৰীগৰাকীয়ে লিখিছে –
“অসম চৰকাৰে মে’ মাহৰ দৰমহা আৰু পেঞ্চন সম্পূৰ্ণৰূপে আদায় দিয়াৰ সিদ্ধান্ত লৈছে৷ কেন্দ্ৰীয় চৰকাৰে বিকেন্দ্ৰীকৃত অনুদান দিয়াৰ বাবেই এয়া সম্ভৱ হৈ উঠিছে৷”
Assam Govt has decided to disburse full salaries & pensions for the month of May. This is possible due to the release of devolution grant by union https://t.co/dHsupudhy8 deep gratitude to PM Sri @narendramodi FM @nsitharaman.Our own revenue has also shown gradual improvement
— Himanta Biswa Sarma (@himantabiswa) May 28, 2020
এনে সহায়ৰ বাবে প্ৰধানমন্ত্ৰী নৰেন্দ্ৰ মোদী আৰু বিত্ত মন্ত্ৰী নিৰ্মলা সীতাৰমণক মন্ত্ৰীগৰাকীয়ে কৃতজ্ঞতা জ্ঞাপন কৰে৷
মন্ত্ৰীগৰাকীৰ দাবী “ৰাজ্যৰ নিজস্ব ৰাজহো ক্ৰমাৎ বৃদ্ধি হ’ব ধৰিছে৷”
মন্ত্ৰীগৰাকীৰ এই ঘোষণাৰ পাছতে কিছু পৰিমাণে হ’লেও সকাহ লাভ কৰিব ৰাজ্য চৰকাৰৰ কৰ্মচাৰীসকলে।