ৰাজ্যত CAA বিৰোধী প্ৰতিবাদৰ সময়ত আৰক্ষীৰ গুলীত মাত্ৰ তিনিজন লোক নিহত হোৱা বুলি অসম চৰকাৰে জনোৱাৰ পিছত শিৱসাগৰৰ বিধায়ক অখিল গগৈয়ে চৰকাৰক সমগ্ৰ আন্দোলনৰ তথ্য লুকুৱাই ৰখাৰ অভিযোগ উত্থাপন কৰিছে।
সংবাদ মাধ্যমৰ সৈতে বাৰ্তালাপ কৰি অখিল গগৈয়ে কয় যে তেওঁ CAA বিৰোধী প্ৰতিবাদৰ সময়ত হোৱা মৃত্যুৰ তথ্য বিচাৰিছিল কিন্তু চৰকাৰে ইয়াৰ সঠিক তথ্য প্ৰদান কৰা নাছিল।
তেওঁ অভিযোগ কৰিছিল যে চৰকাৰে মাত্ৰ তিনিজন শ্বহীদৰ তালিকা দিছে। কিন্তু আন্দোলনত প্ৰকৃততে পাঁচগৰাকী লোক শ্বহীদ হৈছিল।
গগৈয়ে দাবী কৰিছে যে চৰকাৰে হয় দুজনৰ মৃত্যু অস্বীকাৰ কৰিছে বা প্ৰকৃত পৰিসংখ্যা লুকুৱাবলৈ চেষ্টা কৰি আছে।
তেওঁ লগতে কয়, “মুখ্যমন্ত্ৰীয়ে দিয়া উত্তৰবোৰে প্ৰতিবাদৰ সময়ত আহত হোৱা লোকৰ সংখ্যাও লুকুৱাই ৰাখিছে।”
শ্বহীদসকলকো ক্ষতিপূৰণৰ পৰা বঞ্চিত কৰা হৈছে বুলি উল্লেখ কৰি অখিল গগৈয়ে প্ৰতিবাদৰ সময়ত নিহত লোকসকলৰ বাবে ক্ষতিপূৰণৰ কোনো ব্যৱস্থা নাই বুলি চৰকাৰে দিয়া উত্তৰৰ বিৰোধ কৰে।
উল্লখ্য যে গৃহ বিভাগে সোমবাৰে বিধানসভাৰ অধিৱেশনত কৈছিল যে অসমত কা আন্দোলনৰ সময়ত আৰক্ষীৰ গুলীত তিনিজন লোক নিহত হৈছিল।
আনহাতে আৰক্ষীৰ গুলীত নিহত লোকসকলৰ নাম উল্লেখ কৰা নাছিল গৃহ বিভাগে। গুলীৰ আঘাতৰ বাবে আন এজনৰ মৃত্যুৰ কথা গৃহ বিভাগে উল্লেখ কৰিছিল কিন্তু দাবী কৰিছিল যে ব্যক্তিজন আৰক্ষীৰ গুলীত নিহত হৈছিল নে নাই সেইয়া জনা নাযায়।
