ৰাষ্ট্ৰীয় নাগৰিক পঞ্জীৰ চূড়ান্ত তালিকা প্ৰকাশ সময়সীমা চমু চাপি অহাৰ লগে লগে বৃহৎ সংখ্যক অবৈধ বিদেশীৰ বন্দী কৰি ৰখাৰ বাবে আৰু ১০টা ডিটেনশ্যন কেম্প নিৰ্মাণৰ বাবে ৰাজ্য চৰকাৰে যাৱতীয় প্ৰস্তুতি চলাইছে।
এই সমগ্ৰ বিষয়টোৰ চোৱা চিতা কৰি থকা ৰাজ্য চৰকাৰৰ এক শীৰ্ষ বিষয়াৰ সূত্ৰই জানিব দিয়া মতে ১০টা ডিটেনশ্যন কেম্প স্থাপনৰ বাবে এক বিতং প্ৰকল্প প্ৰতিবেদন কেন্দ্ৰৰ অনুমোদন বিচাৰি ৰাজ্য চৰকাৰে শীঘ্ৰই প্ৰেৰণ কৰিব।
বৰ্তমান ৰাজ্যখনত ৬টা ডিটেনশ্যন কেম্প চলি আছে আৰু এইকেইটা জিলা কাৰাগাৰৰ সৈতে সংলগ্ন হৈ আছে। আনহাতে, ৩০০০ বন্দী ৰাখিব পৰা বৃহৎ ডিটেনশ্যন কেম্প এটা গোৱাৰপাৰাত নিৰ্মাণ কৰি থকা হৈছে।
সূত্ৰসমূহে জানিবলৈ দিয়া মতে নতুন ডিটেনশ্যন কেম্পসমূহ ৰাজ্যখনৰ ক’ত ক’ত স্থাপন কৰা হ’ব সেয়া চিনাক্ত কৰা হৈছে যদিও চূড়ান্ত অনুমোদনৰ বাবে অপেক্ষা কৰা হৈছে। এন আৰ চিৰ প্ৰকাশ পাছতে ঘোষিত বিদেশীৰ সংখ্যা বৃদ্ধি পাব বুলি অনুমান কৰিয়েই এই ডিটেনশ্যন কেম্প স্থাপনৰ বিষয়টোত গুৰুত্ব আৰোপ কৰা হৈছে।
উচ্চতম ন্যায়ালয়ে বান্ধি দিয়া সময়সীমা অনুসৰি এন আৰ চিৰ তালিকা অহা ৩১ জুলাইত প্ৰকাশ পাব। তালিকাত যিসকলৰ নাম অন্তৰ্ভুক্ত নহয় তেওঁলোকে বিদেশী ন্যায়াধিকৰণত ভাৰতীয় নাগৰিকত্ব প্ৰমান কৰাৰ সুযোগ পাব অন্যথা ন্যায়াধিকৰণে তেওঁলোকক বিদেশী বুলি ঘোষণা কৰিব।
আনহাতে, ৰাজ্য চৰকাৰে অহা ১ ছেপ্টেম্বৰৰ ভিতৰত ২০০ খন বিদেশী ন্যায়াধিকৰণ স্থাপনৰ প্ৰক্ৰিয়া আৰম্ভ কৰিছে আৰু ইয়াৰ পাছত আন ২০০ খন বিদেশী ন্যায়াধিকৰণ পৰৱৰ্তী তিনি মাহৰ ভিতৰত স্থাপন কৰিব।
