টেক্সটাইল মন্ত্ৰী স্মৃতি জুবিন ইৰাণীয়ে শুকুৰবাৰে টেক্সটাইল আয়ুক্তৰ কাৰ্য্যালয়ে সংশোধিত প্ৰযুক্তি উন্নয়ণ কোষ আঁচনিৰ অধীনত অসমকে ধৰি বিনিয়োগকাৰীসকলক প্ৰয়োজনীয় ৰেহাই প্ৰদান কৰি আহিছে বুলি কোৱাৰ লগতে বিনিয়োগকাৰীসকলৰ ওচৰত থকা যন্ত্ৰসমূহৰ আধুনিকীকৰণৰ ক্ষেত্ৰত নতুন প্ৰস্তাৱৰ বাবে কাম কৰি আছে বুলি উল্লেখ কৰে।
কেন্দ্ৰীয় মন্ত্ৰীগৰাকীয়ে লোকসভাত শিৱসাগৰৰ মেগা হেণ্ডলোম ক্লাষ্টাৰৰ অধীনত ব্যক্তিগত বিনিয়োগকাৰীসকলক উৎসাহিত কৰাৰ ব্যৱস্থা গ্ৰহণ কৰা হৈছে বুলিও কয়। এই প্ৰকল্পটোত চৰকাৰে ৮০ শতাংশ বিনিয়োগ কৰাৰ বিপৰীতে ব্যক্তিগত বিনিয়োগকাৰীসকলে ২০ শতাংশ বিনিয়োগ কৰে।
২০১৭ চনৰ পৰা কেন্দ্ৰীয় চৰকাৰে অসমৰ কাৰণে এনেধৰণৰ প্ৰকল্পৰ ক্ষেত্ৰত ৬.৯১ কোটি টকা মোকলাই দিছে য’ত অংশগ্ৰহণকাৰী বিনিয়োগকাৰীয়ে বিনিয়োগ কৰিছে ১.৯১ কোটি। অসমৰ হস্তশিল্পী সকলৰ সৰ্বাঙ্গীন বিকাশৰ বাবে হস্তশিল্প বিকাশ আয়ুক্তৰ কাৰ্য্যালয়ে আম্বেদকাৰ হস্তশিল্প বিকাশ যোজনাৰ অধীনত ৩৯ টা অঞ্চল চিনাক্ত কৰি কাম কৰিছে যাৰ ফলত বিগত দুবছৰত ৪৯৭০ গৰাকী শিপিনী উপকৃত হৈছে।
উত্তৰ-পূৰ্বাঞ্চল টেক্সটাইল প্ৰসাৰ আঁচনিৰ অধীনত চৰকাৰে ২০১৮-১৯ চনত অসম আৰু বড়োলেণ্ড স্বায়ত্ত শাসিত পৰিষদত দুটা এৰি মুগা মিল স্থাপন কৰাৰ বাবে প্ৰস্তাৱ গ্ৰহণ কৰে। কেন্দ্ৰীয় চৰকাৰে ৰোগগ্ৰস্ত ঔদ্যোগিক প্ৰতিষ্ঠান (বিশেষ ক্ষমতা) আইনৰ অধীনত নিৰ্দিষ্ট সময়ৰ ভিতৰত দুৰ্বল প্ৰতিষ্ঠানসমূহ চিনাক্ত কৰি পুনৰ নিৰ্মাণৰ বাবে এখন বিত্তীয় আৰু ঔদ্যোগিক পুনৰ উন্নয়ন বোৰ্ডো গঠন কৰে বুলি ইৰাণীয়ে কয়।
কেন্দ্ৰীয় চৰকাৰৰ উত্তৰ-পূব টেক্সটাইল প্ৰসাৰ আঁচনিৰ অধীনত কেন্দ্ৰীয় ৰেচম বোৰ্ডে চাৰিটা বিভাগত ৰেচম প্ৰকল্পৰ প্ৰয়োগৰ দ্বাৰা ৰেচম উৎপাদন বৃদ্ধিৰ বাবে ব্যৱস্থা হাতত লৈছে। এই চাৰিটা বিভাগ হ’ল ক্ৰমে- সামূহিক ৰেচম শিল্প বিকাশ প্ৰকল্প, ইনটেনচিভ বিভোলটাইন ৰেচম শিল্প বিকাশ প্ৰকল্প, এৰি কাটা ৰেচম মিল আৰু আকাংশিত জিলা।
উত্তৰ-পূবৰ বিভিন্ন ৰাজ্যত ৰেচম শিল্পৰ বিকাশৰ বাবে কেন্দ্ৰীয় চৰকাৰৰ আঁচনিৰ অধীনত কাম-কাজৰ অগ্ৰগতি পৰ্যবেক্ষণ কৰাৰ বাবে গুৱাহাটীত এটা আঞ্চলিক কাৰ্য্যালয় স্থাপন কৰা হৈছে।
বৰ্তমান নগাঁও আৰু শিলঘাটত থকা অসম কো-অপাৰেটিভ কাগজ কলৰ বাবে কোনোধৰণৰ বিশেষ পেকেজৰ কথা বিচাৰাধীন হৈ থকা নাই। আনহাতে, কাগজ কল দুটাক ভৌগলিক অৱস্থান আৰু স্থানীয় বজাৰৰ সীমিত উপলব্ধতাৰ প্ৰতি লক্ষ্য ৰাখি উৎপাদন ক্ষমতাৰ ক্ষেত্ৰত প্ৰয়োজনীয় ব্যৱস্থা গ্ৰহণ কৰা হ’ব বুলি ইৰাণীয়ে মন্তব্য কৰে।