কলিয়াবৰত বিজ্ঞানক জনপ্ৰিয় কৰাৰ এক অভিলাষী আঁচনিৰ অন্তৰ্গত তাৰকা গৃহ, বিজ্ঞান যাদুঘৰ, বিজ্ঞান উদ্যান প্ৰতিষ্ঠাৰ এক প্ৰকল্পৰ আধাৰশিলা স্থাপনৰ প্ৰস্তুতি।
এই অভিলাষী আঁচনিৰ অন্তৰ্গত তাৰকা গৃহ, বিজ্ঞান যাদুঘৰ, বিজ্ঞান উদ্যান প্ৰতিষ্ঠাৰ এক প্ৰকল্পৰ আধাৰশিলা স্থাপন কৰিব বিজ্ঞান প্ৰযুক্তি, তথ্য প্ৰযুক্তি বিভাগৰ মন্ত্ৰী কেশৱ মহন্তই।
কলিয়াবৰৰ হাটবৰৰ সমীপৰ শ্ৰৱণী সত্ৰত ১৭ জানুৱাৰী দেওবাৰে শিল্পী দিৱসৰ দিনাই বিজ্ঞান প্ৰকল্পটোৰ আধাৰশিলা স্থাপন কৰিব মন্ত্ৰীগৰাকীয়ে।
কলিয়াবৰৰ বিজ্ঞান শিক্ষাৰ বাবে এক উল্লেখযোগ্য দিনটো অধিক আকৰ্ষণীয় কৰি তুলিবলৈ বিজ্ঞান অনুৰাগী অনুষ্ঠান-ব্যক্তিয়ে স্থানীয় বিদ্যালয়ৰ সহযোগত ইতিমধ্যে ব্যৱস্থা গ্ৰহণ কৰিছে।
অসম বিজ্ঞান সমিতি, কলিয়াবৰ শাখা, আৰ্য্যভট্ট বিজ্ঞান কেন্দ্ৰই ছাত্ৰ-ছাত্ৰীসকলৰ মাজত বিজ্ঞান প্ৰদৰ্শনী তথা প্ৰতিযোগিতা, চিত্ৰাঙ্কন প্ৰতিযোগিতা, ভ্ৰাম্যমান তাৰকাগৃহ প্ৰদৰ্শন লগতে আঞ্চলিক বিজ্ঞান কেন্দ্ৰৰ তৰফৰ পৰাও এক বিজ্ঞান প্ৰদৰ্শনীৰ ব্যৱস্থা কৰা হৈছে।
অসম ৰাজ্যিক বিজ্ঞান প্ৰযুক্তিবিদ্যা আৰু পৰিৱেশ পৰিষদৰ সক্ৰিয় সহযোগত সাধাৰণ ৰাইজক সুফল প্ৰদান কৰিব পৰাকৈ বিজ্ঞান আৰু প্ৰযুক্তিবিদ্যা বিভাগে ইতিমধ্যেই বিজ্ঞানৰ সঠিক ব্যৱহাৰৰ ওপৰত গুৰুত্ব প্ৰদান কৰা পৰিলক্ষিত হৈছে।
গুৱাহাটী আৰু যোৰহাটৰ তাৰকাগৃহৰ উপৰিও অসমৰ বহু স্থানত বৰ্তমান নতুন নতুন তাৰকাগৃহ নিৰ্মাণৰ পদক্ষেপ গ্ৰহণ কৰিছে। তাৰ ফলস্বৰূপে কলিয়াবৰত এই বিজ্ঞান প্ৰকল্পৰ আধাৰশিলা স্থাপন কৰা হৈছে।
তদুপৰি, কলিয়াবৰৰ এটা অংশতে চৰকাৰী অনুষ্ঠান-প্ৰতিষ্ঠান প্ৰতিষ্ঠাৰ এক পৰম্পৰা চলি আহিছিল বুলি এক অভিযোগ প্ৰায়ে শুনা গৈছিল।
এতিয়া হাটবৰ অঞ্চলৰ কেইবাগৰাকী ব্যক্তি তথা অনুষ্ঠানৰ প্ৰচেষ্টাত মন্ত্ৰী কেশৱ মহন্তৰ তৎপৰতাত হাটবৰ অঞ্চলত পোণ-প্ৰথমবাৰৰ বাবে এক চৰকাৰী প্ৰকল্পৰ আধাৰশিলা স্থাপন হ’ব। যাক লৈ সুখী এতিয়া হাতবৰ বাসীৰ লগতে কলিয়াবৰীয়া ৰাইজ।
