বিভাগীয় ৱেবছাইটৰ পৰা ৰহস্যজনকভাৱে অন্তৰ্ধান হোৱা ১০ দিনৰ পিছত এন আৰ চিৰ তথ্যবোৰ পুনৰ ঘূৰি আহিছে ইয়াৰ ৱেবছাইটলৈ। তথ্যবোৰ আৰু তাৰ লিংক পুনৰ অনলাইনত উপলব্ধ আৰু সচল হৈ পৰাত পুনৰ এ আৰ এন নম্বৰ পৰীক্ষা কৰিব পৰা হৈছে।
অসমৰ সৰ্বসাধাৰণ লোকক মহা হাৰাশাস্তিৰ মাজেৰে দেশৰ স্বাৰ্থত প্ৰস্তুত কৰা এন আৰ চিৰ তথ্য অনলাইনত উপলব্ধ নোহোৱাটো যোৱা ১১ ফেব্ৰুৱাৰিত ধৰা পৰিছিল।
বৰ্তমানৰ এন আৰ চি কৰ্তৃপক্ষই বোকা ছটিওৱাৰ খেল খেলি থাকোতে এই গুৰুত্বপূৰ্ণ তথ্যবোৰ পুনৰ অনলাইনত উপলব্ধ কৰোতে প্ৰায় ১০ দিন সময় উকলি যায়।
বৰ্তমানৰ কৰ্তৃপক্ষই প্ৰাক্তন ৰাজ্যিক সমন্বয়ক প্ৰতীক হাজেলাক দোষ জাপি দি কৈছিল যে উইপ্ৰ’ৰ সৈতে থকা ক্লাউড সেৱাৰ চুক্তি পুনৰ নৱীকৰণ নকৰা বাবে এই তথ্য অনলাইন উপলব্ধতা নোহোৱা কৰিছে ইনফৰ্মেশ্যন টেকন’লজিৰ কোম্পানিটোৱে।
ৰাষ্ট্ৰীয় পৰ্য্যায়ৰ বাৰ্তালোচনী আউটলুকৰ এটা বাতৰিত কোৱা হৈছিল যে তেওঁলোকক উইপ্ৰ’ৱে জানিবলৈ দিছে যে ২০১৯ৰ অক্টোবৰত ম্যাদ উকলা তথ্য প্ৰযুক্তি সেৱাৰ .চুক্তি নৱীকৰণ কৰা হোৱা নাছিল।
প্ৰতীক হাজেলাই ৰাজ্যিক সমন্বয়ক হিচাপে ২০১৯ চনৰ ১১ নৱেম্বৰত বিদায় লয়।
তাৰ পিছত ইয়াক নৱীকৰণৰ বাবে নতুন সমন্বয়ক তথা কৰ্তৃপক্ষই যথেষ্ট সময় পায় যদিও সেয়া ২০২০ চনৰ ১২ ফেব্ৰুৱাৰি পৰ্য্যন্ত নকৰাকৈ থাকে।
ইয়াক লৈ যথেষ্ট সমালোচনা হোৱাৰ পিছত অৱশেষত এই ক্লাউড সেৱাৰ চুক্তি নৱীকৰণ কৰা হয় আৰু গুৰুত্বপূৰ্ণ তথ্যবোৰ অনলাইনত পুনৰ উপলব্ধ হৈছে।
অসমৰ প্ৰায়বোৰ জাতীয় সংগঠনৰ দাবীত আৰু উচ্চতম ন্যায়ালয়ৰ তত্ত্বাৱধানত এটা ৬ বছৰীয়া জটিল প্ৰক্ৰিয়াৰ মাজেৰে যোৱা বছৰৰ ৩১ আগষ্টত অসমৰ এন আৰ চিৰ চূড়ান্ত তালিকা প্ৰকাশ পাইছিল।
চূড়ান্ত এন আৰ চিত ৩,১১,২১,০০৪গৰাকী লোকৰ নাম অন্তৰ্ভুক্ত হোৱাৰ বিপৰীতে ১৯,০৬,৬৭৭গৰাকী লোকৰ নাম বাদ পৰিছিল।
