পঞ্চায়ত নিৰ্বাচনৰ প্ৰথম পৰ্যায়ৰ ভোট গ্ৰহণত ৰাজ্যজুৰি হোৱা বিসংগতিৰ কথা স্বীকাৰ কৰি কেইবাটাও স্থানত ৭ ডিচেম্বৰত পুনৰ নিৰ্বাচন অনুষ্ঠিত কৰাৰ কথা বুধবাৰে ঘোষণা কৰিছে ৰাজ্যিক নিৰ্বাচন আয়ুক্তই।
“বেলট পেপাৰ আৰু ভোটগ্ৰহণৰ বিসংগতিৰ বাবে বিশ্বনাথ, লখিমপুৰ, শিৱসাগৰ, গহপুৰ, তিতাবৰৰ কোনো কোনো স্থানত ৭ ডিচেম্বৰত পুনৰ ভোটগ্ৰহণ হ’ব,” ক’ত ক’ত পুনৰ ভোট গ্ৰহণ হ’ব সেয়া এতিয়াও চূড়ান্ত হোৱা নাই বুলি সদৰী কৰি মন্তব্য আয়ুক্ত হৰেন্দ্ৰ নাথ বৰাৰ।
তালিকাত নাম নথকা ভোটাৰৰ নিজৰো “দায়িত্ব” আছিল বুলিও তাৎপৰ্য্যপূৰ্ণভাৱে বৰাই মন্তব্য কৰে।
“এন আৰ চিকে ধৰি বিভিন্ন কাৰণত আমি বহুত সালসলনি আৰু অসুবিধাৰ মাজেৰে নিৰ্বাচন পাতিবলগীয়া হৈছে। কিন্তু ভোটাৰৰো এটা দায়িত্ব থাকিব লাগে। নিজৰ নামটো তালিকাত নথকাটো বহুতে আজিহে ভোট দিবলৈ গৈ গম পাইছে। এতিয়া কৰিব পৰা উপায় নাথাকে, দুদিনমানৰ আগত ক’লেও আমি শুধৰাব পাৰিলোহেঁতেন,’’ সন্ধিয়া ৰাজ্যিক নিৰ্বাচন আয়োগৰ কাৰ্য্যালয়ত এক সংবাদমেলত বৰাৰ মন্তব্য।
লগতে পঢ়ক– পঞ্চায়ত নিৰ্বাচনৰ ১ম পৰ্য্যায়ত ৰাজ্যজুৰি বিসংগতি; ঠায়ে ঠায়ে বঞ্চিতৰ প্ৰতিবাদ, বাতিল ভোটগ্ৰহণ
বিভিন্ন স্থানত ভোটাৰৰ নাম তালিকাত সন্নিবিষ্ট নোহোৱাৰ লগতে কিছুমান ঠাইত বেলত পেপাৰত প্ৰাৰ্থীৰ নামৰ বিপৰীতে চিহ্ন ভুলকৈ ছপা হোৱাৰ কথাও স্বীকাৰ কৰে।
ইপিনে বিয়লি তিনি বজালৈকে প্ৰথম পৰ্য্যায়ত ভোটদানৰ হাৰ ৬৫.৫ শতাংশ হোৱা বুলি সদৰী কৰে নিৰ্বাচন আয়ুক্তজনে।
কিন্তু সন্ধিয়া ৫.৩০ বজাত সংবাদমেল অনুষ্ঠিত কৰালৈকে বহু ভোটকেন্দ্ৰত ভোটগ্ৰহণ চলি থকা বাবে তেওঁ এই হাৰ আৰু বৃদ্ধি পাব বুলি আশা কৰে।
২০১৩ চনৰ পঞ্চায়ত নিৰ্বাচনত মুঠ ভোট দান হৈছিল ৭৬.৭৬ শতাংশ। প্ৰথম পৰ্যায়ত ভোটদানৰ হাৰ আছিল ৭৪.২৮%, দ্বিতীয় পৰ্যায়ত ৭৭.৭১% আৰু তৃতীয় পৰ্যায়ত ৭৮.২৮%।
