গোচৰ নিষ্পত্তিৰ বাবে ৩০ লাখ টকা দাবী কৰি নিলম্বিত হোৱা তথা বৰ্তমান পলাতক অৱস্থাত থকা ধুবুৰী জিলাৰ উপ-আৰক্ষী অধীক্ষক ভাস্কৰ ওজাক বিচাৰি আৰক্ষীয়ে তেওঁৰ বৰপেটাৰ ঘৰত অভিযান চলায়।
ধুবুৰীৰ অতিৰিক্ত আৰক্ষী অধীক্ষক গুণেন্দ্ৰ ডেকাৰ নেতৃত্বত এটা দলে যোৱানিশা নিলম্বিত বিষয়াজনৰ ঘৰত তেওঁক বিচাৰি এই অভিযানটো চলাইছিল।
অৱশ্যে ভাস্কৰ ওজাক বিচাৰি নাপাই অভিযানকাৰী দলটো শুদা হাতে ঘূৰি যাব লগীয়া হয়। আৰক্ষীয়ে সন্দেহ কৰামতে ভাস্কৰ ওজাই নিজৰ ঘৰৰ পৰা আঁতৰত ক’ৰবাত আত্মগোপন কৰিব পাৰে।
উল্লেখযোগ্য যে এটা গোচৰত অভিযুক্তৰ অনুকূলে কেছ ডায়েৰি প্ৰস্তুত কৰা, তদন্তত অভিযুক্তক ৰেহাই দিয়াৰ নামত অভিযুক্ত পক্ষৰ পৰা ৩০ লাখ টকা দাবী কৰিছিল ডি এছ পি ভাস্কৰ ওজাই। ইয়াৰ কল ৰেকৰ্ডিং ফাদিল হৈ পৰাৰ লগতে আৰক্ষী হাততো পৰিছিল।
পিছত আৰক্ষীয়ে এই কেলেংকাৰিটো গাপ দিয়াৰ চেষ্টা কৰিছিল যদিও কৃষক মুক্তিকে ধৰি বিভিন্ন পক্ষৰ হেঁচাত ডি এছ পি ভাস্কৰ ওজাৰ বিৰুদ্ধে ধুবুৰী থানাত ১০৪৩/১৮ নম্বৰৰ গোচৰ ৰুজু কৰা হয়। লগতে যোৱা ২০ জুলাইত ভাস্কৰ ওজাক নিলম্বিতও কৰা হয়। কিন্তু তাৰ পিছতো ভাস্কৰ ওজাক গ্ৰেপ্তাৰ নকৰাত আকৌ গ্ৰেপ্তাৰৰ বাবে দাবী তোলে কৃষক মুক্তি আৰু অন্যান্য পক্ষই।
আনহাতে আদালতত আগতীয়া জামিন বিচাৰি বিমুখ হৈছিল অভিযুক্ত আৰক্ষী বিষয়াজন। অভিযুক্ত এ পি এছ বিষয়াজনৰ বিৰুদ্ধে ধুবুৰী থানাত ৰুজু হোৱা ১০৪৩/২০১৮ (দুৰ্নীতি প্ৰতিৰোধ আইনৰ ৭ নং ধাৰাৰ অধীনত) নম্বৰৰ গোচৰৰ কেছ ডায়েৰিত থকা তথ্য আৰু সমলৰ ভিত্তিত আদালতে আগতীয়া জামিন আবেদন নামঞ্জুৰ কৰিছিল।