হোটেলৰ পৰা মোবাইল চুৰ কৰি এজন আৰক্ষী উপ-পৰিদৰ্শক গ্ৰেপ্তাৰ হ’ব লগীয়া ঘটনা এটাই লজ্জিত কৰিছে অসম আৰক্ষীক। বিষয়াজনৰ নাম দেৱেশ্বৰ শৰ্মা আৰু তেওঁ গুৱাহাটীৰ পুলিচ ৰিজাৰ্ভত কৰ্মৰত।
৭ আগষ্টৰ এই বিৰল ঘটনাটো ঘটিছে যোৰাবাটৰ টিট বিট নামৰ হোটেলখনত, য’ত দেৱেশ্বৰ শৰ্মা আৰু আন এজন সতীৰ্থই আহাৰ গ্ৰহণ কৰিছিল।
হোটেলখনৰ কৰ্মচাৰী মফিজ আলীয়ে জানিবলৈ দিয়া মতে আৰক্ষীৰ লোককেইজনে আহাৰ গ্ৰহণ কৰি গুচি যোৱাৰ পিছতে তেওঁ নিজৰ মোবাইলটো আনিবলৈ গৈ দেখে যে সেয়া থোৱা ঠাইত নাই।
ভালকৈ বিচাৰ-খোচাৰ কৰাৰ পিছত হোটেলত সংলগ্ন চি চি টি ভিৰ ফুটেইজ পৰীক্ষা কৰা হয়। ফুটেইজ চাওঁতেই ওলাই পৰে খোদ আৰক্ষী বিষয়াই মনে মনে মোবাইল লৈ উধাও হোৱাৰ কথা।
মফিজ আলীয়ে যোৰাবাট আৰক্ষী চকীত এই সন্দৰ্ভত বশিষ্ট থানাত এখন এজাহাৰ দিয়ে আৰু তাৰ ভিত্তিত এটা গোচৰ ৰুজু হয়।
বশিষ্ট আৰক্ষীয়ে প্ৰাথমিক অনুসন্ধানৰ পিছত ৮ আগষ্টত উপ-পৰিদৰ্শক দেৱেশ্বৰ শৰ্মাক আটক কৰে আৰু তেওঁৰ জিম্মাৰ পৰা চুৰি হোৱা মোবাইলটো উদ্ধাৰ কৰে।
অধিক জেৰাৰ পিছত আজি দেৱেশ্বৰ শৰ্মাক গ্ৰেপ্তাৰ কৰা হয়, জনালে বশিষ্ট আৰক্ষীয়ে।