অসমৰ খিলঞ্জীয়া মাতৃভাষাৰ জ্ঞান নথকা কোনো প্ৰাৰ্থীক প্ৰশাসনীয় সেৱাৰ চাকৰিত যাতে নিযুক্তি দিয়া নহয় তাৰ বাবে বিহিত ব্যৱস্থা গ্ৰহণ কৰিবলৈ অসম সাহিত্য সভাই আহ্বান জনাইছে। আজি বিয়লি সভাৰ সভাপতি ড০ পৰমানন্দ ৰাজবংশীৰ নেতৃত্বত এটা সঁজাতি দলে অসম লোকসেৱা আয়োগৰ কাৰ্য্যালয়ত অধ্যক্ষ দীপক কুমাৰ শৰ্মাক সাক্ষাৎ কৰি এখন স্মাৰক পত্ৰ প্ৰদান কৰি এই ক্ষেত্ৰত কাৰ্য্যব্যৱস্থা গ্ৰহণ কৰাৰ বাবে দাবী জনায়।
সভাই স্মাৰক পত্ৰখনত লোকসেৱা আয়োগৰ সকলোধৰণৰ পৰীক্ষাত অসমীয়া বিষয়ৰ বাধ্যতামূলক প্ৰশ্নকাকতৰ বাবে প্ৰায় পাঁচ বছৰ আগতে গুৱাহাটী বিশ্ববিদ্যালয়ৰ অসমীয়া বিভাগৰ জৰিয়তে পাঠ্যক্ৰম প্ৰস্তুত কৰি দিছিল বুলি উল্লেখ কৰে। এই সুদীৰ্ঘ পৰিক্ৰমাত লোকসেৱা আয়োগে সেই পাঠ্যক্ৰম প্ৰয়োগ কৰিছেনে নাই সেই কথা নূন্যতম সৌজন্যতা ৰক্ষা কৰিও সাহিত্য সভাক অৱগত নকৰিলে।
আনহাতে, যদিহে সেই পাঠ্যক্ৰম কাৰ্য্যকৰী হোৱা নাই তেন্তে আগন্তুক তিনিমাহৰ ভিতৰত গুৰুত্বপূৰ্ণ কামখিনি কাৰ্য্যকৰী কৰাৰ বাবে সভাই আয়োগৰ অধ্যক্ষক আহ্বান জনায়।
অসম সাহিত্য সভাই অসমৰ বিভিন্ন জাতীয় অনুষ্ঠান আৰু জনজাতীয় সাহিত্য সভাৰ লগত আলোচনা কৰি অসম চৰকাৰৰ ভাষা-নীতিৰ লগতে অসমীয়া তথা খিলঞ্জীয়া ভাষাৰ সংৰক্ষণ আৰু সংবৰ্ধনৰ বাবে এলানি প্ৰস্তাৱ আৰু পৰামৰ্শ লোকসেৱা আয়োগক প্ৰদান কৰি লোকসেৱা আয়োগৰ দৰে এটা গুৰুত্বপূৰ্ণ বিভাগে অসম চৰকাৰৰ ১৯৬০ চনৰ ভাষা আইন যথাযথ ভাবে প্ৰয়োগ কৰাটো অত্যন্ত জৰুৰী বুলি মন্তব্য কৰে।
অসম লোকসেৱা আয়োগক আজি সভাই আয়োগৰ বাছনি পৰীক্ষাত অসমৰ খিলঞ্জীয়া মাতৃভাষাৰ প্ৰশ্নোত্তৰ ৫০ শতাংশ আৰু অসম চৰকাৰৰ ভাষা-নীতি অনুসৰি ৫০ শতাংশ নম্বৰৰ প্ৰশ্নোত্তৰ বাধ্যতামূলক কৰিবলৈও দাবী জনায়। সভাৰ মতে লোকলেৱা আয়োগৰ পৰীক্ষাত যিহেতু ইংৰাজী ভাষাজ্ঞান থকাটো বাধ্যতামূলক, ঠিক সেইদৰে শতাংশ হিচাপ কৰি হলেও অসমীয়া ভাষা আৰু অন্যান্য খিলঞ্জীয়া ভাষাজ্ঞান বাধ্যতামূলক কৰিব লাগিব।
আজিৰ সঁজাতি দলটোত সভাৰ সভাপতিৰ লগতে কামৰূপ জিলা সাহিত্য সভাৰ সভাপতি মৃণালিনী দেৱী, গুৱাহাটী প্ৰশাসনিক কাৰ্য্যালয়ৰ সম্পাদক ড০ সঞ্জীৱ কুমাৰ শৰ্মা, প্ৰকাশন আহ্বায়ক মানিক আহমেদ, ৰাজ্যভাষা প্ৰয়োগ উপ-সমিতিৰ উপ-সভাপতি অনঙ্গ কুমাৰ নাথ, আহ্বায়ক হৃদয়ানন্দ গগৈ, কাৰ্যনিৰ্বাহক সদস্য ক্ৰমে অৰুণ মহন্ত আৰু ৰাণা বশিষ্ঠই অংশগ্ৰহণ কৰে।
