ৰাজ্য প্ৰশাসনৰ প্ৰাণকেন্দ্ৰ স্বৰূপ জনতা ভৱনত কৰ্ম সংস্কৃতি গঢ়াৰ বাবে সচিবালয় প্ৰশাসনে বিভিন্ন সময়ত দি অহা নিৰ্দেশনাক বৃদ্ধাগুষ্ঠ প্ৰদৰ্শন কৰি একাংশ কৰ্মচাৰীয়ে নিজৰ খেয়াল খুচি মতে কামকাজ চলাই অহা পৰিলক্ষিত হয়।
একাংশ কৰ্মচাৰীয়ে সময়মতে কাৰ্যালয়ত উপস্থিত নোহোৱাৰ লগতে যিকোনো সময়তে কাৰ্যালয় ত্যাগ কৰি ওলাই যোৱা, নিজৰ দায়িত্বপ্ৰাপ্ত কাম নিয়াৰিকৈ সম্পন্ন নকৰা আদি বিভিন্ন কাৰণত সচিবালয় প্ৰশাসনে বিভিন্ন সময়ত জাৰি কৰা নিৰ্দশনাৰ পাছতো একাংশ কৰ্মচাৰীৰ গাৰ নোম লৰা নাই।
এনে পৰিস্থিতিত এনে শৃংখলাহীন কৰ্মচাৰীক নিয়ন্ত্ৰণৰ বাবে সচিবালয় প্ৰশাসনে আগন্তুক দুই তিনি মাহৰ ভিতৰত কঠোৰ ব্যৱস্থা কাৰ্যকৰী কৰাৰ প্ৰস্তুতি চলাইছে।
বিভাগীয় সূত্ৰৰ পৰা জানিব পৰা মতে, পুৱা ৯-৩০ বজাত কৰ্মচাৰীসকলৰ উপস্থিতি নিশ্চিত কৰিবলৈ বায়’মেট্ৰিক ব্যৱস্থা প্ৰৱৰ্তন কৰা হ’ব। এবাৰ এই বায়’মেট্ৰিক ব্যৱস্থা আৰম্ভ হোৱাৰ পাছত পুৱা ৯-৩০ বজাৰ লগে লগে সচিবালয়ৰমূল গেইট বন্ধ কৰি দিয়া হ’ব।
আনহাতে, উৰ্দ্ধতন কৰ্তৃপক্ষৰ অনুমতি সাপেক্ষে কিছু পলমকৈ উপস্থিত হোৱা কৰ্মচাৰীসকলৰ তিনিদিন পলমৰ বাবে এদিনৰ নৈমিত্তিক ছুটী কৰ্তন কৰাৰ ব্যৱস্থা লোৱা হ’ব। তদুপৰি, অনুমতি অবিহনে কোনোৱে কাৰ্যালয় চলি থকা সময়ত মাজতে কাৰ্যালয় ত্যাগ কৰিব নোৱাৰিব।
অৱশ্যে, কোনোৱে অনুমতি সাপেক্ষে কাৰ্যালয়ৰ পৰা ওলাই গ’লেও সেয়া বায়’মেট্ৰিক ব্যৱস্থাত ৰেকৰ্ড থাকিব।
আনহাতে, এবাৰ উপস্থিতিৰ বিষয়টো নিশ্চিত হোৱাৰ পাছতে কৰ্মচাৰীসকলৰ দায়িত্বপ্ৰাপ্ত ফাইলৰ কাম সম্পাদনৰ বিষয়কে ধৰি আন বিষয়সমূহৰ ক্ষেত্ৰতো উপযুক্ত ব্যৱস্থা গ্ৰহণ কৰা হ’ব।
তদুপৰি, সচিবালয়ৰ বিষয়া-কৰ্মচাৰীসকলে আনুষ্ঠানিক পোছাক পৰিধান কৰাৰ লগতে তেওঁলোকৰ পৰিচয় পত্ৰ আঁৰি লোৱাটো বাধ্যতামূলক কৰিব বিচৰা হৈছে। অহা ছেপ্টেম্বৰৰ ভিতৰত এই নতুন ব্যৱস্থাসমূহ কাৰ্যকৰী কৰাৰ লক্ষ্য নিৰ্দ্ধাৰম কৰি লৈছে সচিবালয় প্ৰশাসন বিভাগে।