৩ এপ্ৰিল অৰ্থাৎ বুধবাৰে ভাৰতৰ কমিউনিষ্ট পাৰ্টী চমুকৈ চি পি আইৰ ৰাজ্যিক কাৰ্য্যালয়ত মুকলি কৰা হয় নিৰ্বাচনী ইস্তাহাৰ। দলটোৱে সমগ্ৰ দেশৰ বাবে অসম ৰাজ্য পৰিষদৰ তৰফৰ পৰা অসমৰ কেইটামান জ্বলন্ত সমস্যা দাঙি ধৰাৰ বাবে ইস্তাহাৰখন প্ৰকাশ কৰে।
অসমক বিশেষ ৰাজ্যৰ মৰ্যাদা দিয়া, বিদ্ৰোহী সমস্যাৰ ৰাজনৈতিক সমাধান, ৰাষ্ট্ৰীয় নাগৰিক পঞ্জী উন্নীতকৰণ, অসমৰ সীমা সুৰক্ষা, নিবনুৱা সমস্যা সমাধান, গুৱাহাটী চহৰৰ প্ৰদূষণ, বানপানী সমস্যাৰ স্থায়ী সমাধান আদিৰ দৰে জ্বলন্ত সমস্যা সমূহৰ বিষয়ে ইস্তাহাৰত উল্লেখ কৰে।
সংবাদমেলত দলটোৰ অসম ৰাজ্য পৰিষদে ভাৰতীয় জনতা পাৰ্টী চমুকৈ বিজেপিক তীব্ৰ ভাষাৰে সমালোচনা কৰাৰ লগতে বিজেপিৰ ২০১৪ চনৰ জয়ে ভাৰতবৰ্ষৰ ৰাজনীতি চৰম পন্থাৰ ফালে ঢাল খুৱাই লৈ গ’ল বুলি মন্তব্য কৰে। আৰ এছ এছ আৰু সমগ্ৰ সংঘ পৰিবাৰে দেশৰ ৰাষ্ট্ৰ ক্ষমতাৰ অপব্যৱহাৰ কৰিলে।
ইয়াৰ উপৰি বিমুদ্ৰাকৰণ, জি এছ টি আদিৰ জৰিয়তে কৰা অৰ্থনৈতিক বিপৰ্য্যৰ ফলত দেশত কৰ্মসংস্থাপন নোহোৱা হ’ল। মোদী চৰকাৰে পাঁচ বছৰীয়া শাসনকালত দিয়া বিকাশৰ প্ৰতিশ্ৰুতি সকলো ধোৱাচাঙত উঠিল বুলিও বিজেপক কটাক্ষ কৰে।
সেয়ে এই নিৰ্বাচনত মোদী চৰকাৰক পৰাস্ত কৰি জনসাধাৰণৰ হৈ কাম কৰা এখন গণতান্ত্ৰিক ধর্ম নিৰপেক্ষ চৰকাৰ কেন্দ্ৰত গঠন কৰিব লাগিব। এই নিৰ্বাচনৰ ৰায় জনসাধাৰণৰ ৰায় হ’ব লাগিব বুলি মন্তব্য কৰে ভাৰতীয় কমিউনিষ্ট পাৰ্টিৰ অসম ৰাজ্যিক পৰিষদে।
উল্লেখ্য যে এইবাৰৰ লোকসভা নিৰ্বাচনত দলটোৱে অসমৰ দুটা সমষ্টিত প্ৰাৰ্থী আগবঢ়াইছে। যোৰহাটত কনক গগৈ আৰু লখিমপুৰত অৰূপ কলিতাক প্ৰাৰ্থিত্ব প্ৰদান কৰা হৈছে।
