হত্যাৰ ভাবুকি, তাৰ পাছতেই নিৰুদ্দেশ প্ৰৱক্তা পাপৰি বেনাৰ্জী

হঠাৎ নিখোজ হ’ল ভাৰতীয় সেনাক উদ্দেশ্যি ছ’চিয়েল মিডিয়াত মন্তব্য কৰি বিতৰ্কৰ আৱৰ্তত সোমাই পৰা গুৱাহাটীৰ আইকন কমাৰ্চ কলেজৰ নিলম্বিত প্ৰৱক্তা পাপৰি বেনাৰ্জী। দেওবাৰে পুৱাৰে পৰা সন্ধানহীন হৈ আছে প্ৰৱক্তাগৰাকী।

কাশ্মীৰৰ পুলৱামাত চি আৰ পি এফৰ ওপৰত সন্ত্ৰাসবাদীয়ে কৰা বৰ্বৰোচিত আক্ৰমণৰ ঘটনাৰ পাছত ছ’চিয়েল মিডিয়াত মন্তব্য কৰিছিল পাপৰি বেনাৰ্জী নামৰ মহিলা প্ৰৱক্তা গৰাকীয়ে। তেওঁৰ এই মন্তব্যক লৈ সৰ্বত্ৰে চৰ্চা হৈছিল।

সোমবাৰে পাপৰি বেনাৰ্জীৰ গুৱাহাটীৰ গান্ধীবস্তিত থকা বাসগৃহত নৰ্থ-ইষ্ট নাওৰ সাংবাদিক উপস্থিত হয়। কিন্তু ঘৰৰ বনকৰা মহিলাগৰাকীৰ বাহিৰে বাসগৃহত বেনাৰ্জীৰ ঘৰৰ কোনো লোকেই উপস্থিত নাছিল।

বনকৰা মহিলাগৰাকীয়ে ঘৰৰ মালিক (অৰ্থাৎ পাপৰি বেনাৰ্জীৰ পিতৃ আৰু ভাতৃ) ঘৰত নাই বুলি জানিবলৈ দিয়ে। লগতে পাপৰি কালিৰ পৰাই ঘৰত নথকাৰ কথাটোও প্ৰকাশ কৰে।

‘মই এওঁলোকৰ ঘৰত কাম কৰিবলৈ আহো। আজিও দিনৰ ২ মান বজাত আহিছো। মই অহাৰ আগতেই পাপৰিৰ দেউতাক আৰু ভায়েক কৰবালৈ গৈছে। জীয়েকক বিচাৰিয়ে গৈছে নে আন কিবা কামত গৈছে সেয়া নাজানো’, বনকৰা মহিলাগৰাকীয়ে কয়।

ইপিনে, আজি পাপৰি বেনাৰ্জীক আৰক্ষীয়ে চানমাৰি থানাত হাজিৰ হ’বলৈ নিৰ্দেশ দিছিল। কিন্তু বাতৰি লিখা সময়লৈকে তেওঁ থানাত হাজিৰ হোৱা নাই।

চানমাৰি থানাৰ ভাৰপ্ৰাপ্ত আৰক্ষী বিষয়াগৰাকীয়ে বেনাৰ্জীক বিচাৰি আৰক্ষীৰ এটা দল তেওঁৰ ঘৰলৈ পঠিয়াইছিল বুলিও আমাক জানিবলৈ দিয়ে।

‘আমি তেওঁৰ ঘৰলৈ এটা দল পঠিয়াইছিলো। কিন্তু দেউতাকে তেওঁ কালিৰে পৰা ঘৰত নাই বুলি কয়’, ভাৰপ্ৰাপ্ত আৰক্ষী বিষয়াৰ ভাষ্য।

উল্লেখ্য যে, ফেচবুকত তেওঁ দিয়া পোষ্টটোৰ পাছত কেইবাজনেও তেওঁক মৃত্যু আৰু ধৰ্ষণৰ ভাবুকি দিছিল বুলি আন পোষ্টত তেওঁ উল্লেখ কৰিছিল।

তেওঁৰ বিৰূদ্ধে চানমাৰি থানাত ১৩২/১৯ নম্বৰত ভাৰতীয় দণ্ড বিধিৰ ৫০৫ আৰু তথ্য আৰু প্ৰযুক্তি আইনৰ ৬৬ নম্বৰ ধাৰাত গোচৰ ৰুজু হৈছিল। সেই অনুসৰি কালি তেওঁক সোধাপোছাৰ বাবে চানমাৰি আৰক্ষীয়ে মাতি নিছিল। সোধা-পোছাৰ অন্তত তেওঁক আৰক্ষীয়ে ঘৰলৈ যাবলৈ দিছিল।

কালি চানমাৰি থানাত এই পোষ্ট সন্দৰ্ভত সাংবাদিকৰ প্ৰশ্নৰ উত্তৰত তেওঁ ‘মোৰ বাক-স্বাধীনতা আৰু মত প্ৰকাশৰ অধিকাৰ আছে’ বুলি মন্তব্য কৰিছিল। কিন্তু আজি হঠাৎ মহিলাগৰাকী সন্ধানহীন হোৱা ঘটনাই ৰহস্যৰ সৃষ্টি কৰিছে।

ইপিনে, তেওঁ সন্ধানহীন হোৱা সন্দৰ্ভত আৰক্ষীক পৰিয়ালৰ লোকে এতিয়ালৈ অৱগত কৰোৱা নাই বুলিও চানমাৰি থানাৰ ভাৰপ্ৰাপ্ত আৰক্ষী বিষয়াগৰাকীয়ে জানিবলৈ দিয়ে।

উল্লেখযোগ্য যে ১৪ ফেব্ৰুৱাৰিৰ পুলৱামাৰ ঘটনাৰ পাছতে ফেচবুক পোষ্ট দিয়া আইকন কমাৰ্ছ কলেজৰ ইংৰাজী বিভাগৰ প্ৰৱক্তাগৰাকীক কলেজ কৰ্তৃপক্ষই নিলম্বিত কৰিছিল।