অসমৰ এটা শিল্পীৰ দল পুনৰ ছয়গাঁও-কাণ্ডৰ নিচিনা ঘটনাৰ সন্মুখীন হৈছে।
ছয়গাঁৱৰ বকোত যোৱা ৭ জুনত ঈদৰ সাংস্কৃতিক অনুষ্ঠানত নৃত্য পৰিৱেশন কৰিবলৈ যোৱা শিল্পীৰ এটা দলক উদণ্ড যুৱকৰ দলে আবদ্ধ কৰি অশালীন নৃত্য প্ৰদৰ্শনৰ বাবে হেঁচা দিয়া ঘটনাটোৰ দৰেই পৰিস্থিতিৰ সন্মুখীন হৈছে অসমৰ পৰা শিলিগুৰিলৈ যোৱা ৯জনীয়া এটা শিল্পীৰ দলে।
নৃত্যশিল্পীৰ দলটোত ৭ গৰাকী ছোৱালী আৰু দুজন ল’ৰা আছে। তেওঁলোক নাৰেংগী আঞ্চলিক মহাবিদ্যালয়ৰ ছাত্ৰ-ছাত্ৰী।
আবদ্ধ হৈ থকা নৃত্যশিল্পীৰ দলটোৰ এগৰাকী ছাত্ৰীয়ে মহাবিদ্যালয়খনৰ এগৰাকী অধ্যাপিকালৈ বিপদৰ পৰিস্থিতিটো জনাই মেছেজ কৰাৰ পিছতে মহাবিদ্যালয়খনে আৰক্ষীক খবৰ দিয়ে আৰু গুৱাহাটী মহানগৰ আৰক্ষীৰ আয়ুক্ত দীপক কুমাৰ দাসৰ তৎপৰতাত নৃত্যশিল্পীৰ দলটোক উদ্ধাৰ কৰিছে বিহাৰৰ মচৰখ থানাৰ আৰক্ষীয়ে।
জানিব পৰা মতে, বকোৰ ঈদৰ ঘটনাটোৰ দৰেই, অসমৰ পৰা ১ আগষ্টতে শিলিগুৰিলৈ যোৱা শিল্পীৰ দলটোৱে শিলিগুৰিত উপস্থিত হৈ জানিব পাৰে যে তাত কোনো সাংস্কৃতিক অনুষ্ঠান নহয়।
তাৰ পিছতে তেওঁলোকক প্ৰায় ৭-৮ ঘণ্টাৰ বাট বাছেৰে লৈ যোৱা হয় বিহাৰৰ ছাৰণ জিলাৰ অধীনৰ মাচৰাখ থানাৰ অন্তৰ্গত এখন ভিতৰুৱা গাঁও বানচুহীলৈ। গন্তব্য স্থান সম্পৰ্কে তেওঁলোকে একো উৱাদিহ পোৱা নাছিল।
শিল্পীৰ দলটো গৈ তাত উপস্থিত হোৱাৰ পিছতে তেওঁলোকক বিল্ডিং এটাৰ ওপৰ মহলাত আবদ্ধ কৰি ৰখা হয়, য’ত তলৰ মহলাত প্ৰায় পঞ্চাচজনমান যুৱক আছিল।
তেওঁলোকক তললৈ নামিবলৈ বা ফোনত কাৰো সৈতে যোগাযোগ কৰিবলৈ দিয়া হোৱা নাছিল। ছাত্ৰীগৰাকীয়ে গোপনে তেওঁলোকৰ মহাবিদ্যালয়ৰ অধ্যাপিকাগৰাকীক মেছেজত এই কথাখিনি জনায়।
ইয়াৰ পিছতে মহানগৰ আৰক্ষীক খবৰ দিয়ে মহাবিদ্যালয়খনৰ কৰ্তৃপক্ষই। আৰু মহানগৰ আৰক্ষী আয়ুক্ত দীপক কুমাৰে বিহাৰ আৰক্ষীৰ সৈতে যোগাযোগ কৰি তৎপৰতাৰে শিল্পীৰ দলটোক উদ্ধাৰ কৰায়।
শিল্পীৰ দলটোক নৃত্য পৰিৱেশনৰ বাবে লৈ যোৱা বিহাৰৰ অনুষ্ঠানটোৰ মুখ্য আয়োজক হিচাপে ৰাজু পেটেল আৰু সহায়িকা খুচী পেটেলৰ নাম আছিল বুলি জনা গৈছে।
শিল্পীৰ দলটোক বিহাৰ আৰক্ষীৰ পৰা সুৰক্ষিতভাৱে অসমলৈ আনিবলৈ ইতিমধ্যে অসম আৰক্ষীৰ এটা দল বিহাৰলৈ গৈছে।
