নিঃচৰ্ত বেতন সুৰক্ষাৰ দাবীৰে অসমৰ বিভিন্ন প্ৰান্তৰ পৰা অহা প্ৰায় ২০হাজাৰ টেট উত্তীৰ্ণ ঠিকাভিত্তিক প্ৰাথমিক শিক্ষক খানাপাৰা পশু চিকিৎসা মহাবিদ্যালয় খেলপথাৰৰ পৰা দিচপুৰ সচিবালয়লৈকে প্ৰতিবাদী সমদল বাহিৰ কৰাৰ উদ্দেশ্যে সমবেত হৈছিল। কিন্তু প্ৰশাসনৰ বাধাৰ বাবে এই উদ্দেশ্য সিদ্ধি কৰাত বিফল হ’ল তেওঁলোক।
দিচপুৰ চল’ কাৰ্য্যসূচী বাধা দিয়াৰ বাবে পুৱা ১০ বজাৰে পৰা খেলপথাৰৰ মূল দ্বাৰৰ লগতে তাৰ সমীপত থকা এ পি এচ ছি কাৰ্য্যালয়ৰ সন্মুখত প্ৰশাসনে মজুত কৰিছিল তিনি শতাধিক আৰক্ষী ও অৰ্ধ সামৰিক বাহিনীৰ জোৱান। আনকি শিক্ষকসকলক ৰুধিবলৈ দুখনকৈ বৰুণ বাহন আৰু কন্দুৱা গেছ নিক্ষেপকাৰী বাহনো প্ৰশাসনে সাজু কৰি এক যুদ্ধংদেহি পৰিৱেশৰ সূচনা কৰা হৈছিল।
টেট উত্তীৰ্ণ শিক্ষক-শিক্ষয়িত্ৰীসকল খেলপথাৰত প্ৰৱেশ কৰাৰ পাছতে মূল দ্বাৰত আৰক্ষীয়ে এটা তলা ওলমাই দিছিল যাৰ বাবে খেলপথাৰতে আবদ্ধ থাকি প্ৰতিবাদী সভা অনুষ্ঠিত কৰিবলগীয়া হ’ল টেট উত্তীৰ্ণ শিক্ষক সমাজে।
“আমাক এইদৰে তলা মাৰি আবদ্ধ কৰি ৰখাত বেয়া লাগিছে। আমি যি উদ্দেশ্য লৈ পঢ়াশালিত পাঠদান এৰি আহিছিলো, ……কিন্তু আমাক দিচপুৰলৈ যাব দিয়া হোৱা নাই। এটা সম্পূৰ্ণ ৰাজনৈতিক চক্ৰান্তৰ মাজত আমি সোমাই পৰিছো। প্ৰতিবাদ মষিমূৰ কৰাৰ বাবে এয়া ষড়যন্ত্ৰ।” প্ৰাথমিক টেট উত্তীৰ্ণ শিক্ষক সমাজৰ কেন্দ্ৰীয় সমিতিৰ বিষয়ববীয়াই ক্ষুব্ধ হৈ এইদৰে আমাৰ আগত কয়।
বঙাইগাঁৱৰ এগৰাকী টেট শিক্ষকে আমাৰ আগত কয় ‘এনেদৰে গে’ট বন্ধ কৰি দিয়াটো আমাৰ বাবে দুখৰ কথা। শদিয়াৰ পৰা ধুবুৰীলৈকে যিমান টেট উত্তীৰ্ণ শিক্ষক আছে, সকলোবোৰ আহিছে। আমি শিক্ষক, আমাৰ সমাজত এটা মৰ্য্যাদা আছে, এই মৰ্য্যাদা ৰক্ষা কৰি আমি গণতান্ত্ৰিকভাৱে প্ৰতিবাদ কৰিবলৈ ওলাই আহিছিলো। এই আন্দোলনত চৰকাৰী পক্ষই বাধা দিব বিচাৰিছে। এয়া আমি সাধাৰণ জনতাৰ বাবে এৰি দিছো, চৰকাৰখনে আমাক লৈ কি কৰি আছে।’
তদুপৰি, পানী খাবৰ বাবেও প্ৰতিবাদকাৰী টেট শিক্ষক-শিক্ষয়িত্ৰীসকলক ওলাই আহিব নিদিয়াত সংবাদ মাধ্যমৰ জৰিয়তে ক্ষোভ উজাৰে টেট উত্তীৰ্ণ শিক্ষক সমাজে।
‘আমাক তিনিটা লে’য়াৰত আটক কৰি ৰখাৰ দৰে হৈছে। আমি পানী খাবৰ বাবেও ওলাই আহিবলৈ দিয়া হোৱা নাই।’ কামৰূপ মহানগৰ জিলাৰ এজন টেট শিক্ষকে সংবাদ মাধ্যমৰ আগত এই অভিযোগ কৰে।
ইয়াৰোপৰি, প্ৰচণ্ড গৰমৰ ফলত দুগৰাকীকৈ টেট শিক্ষয়িত্ৰী মূৰ ঘূৰাই বাগৰি পৰে। তাৰে এগৰাকীক গে’টৰ পৰা উলিয়াই অনাৰ সময়ত আন দুগৰাকী টেট শিক্ষয়িত্ৰীক আৰক্ষীয়ে বাধা প্ৰদান কৰাৰো অভিযোগ উত্থাপন হৈছে।
‘আমাৰ লগৰ যোৰহাটৰ এগৰাকী মূৰ ঘূৰাই বাগৰি পৰিছিল, তাইক দাঙি উলিয়াই আনিবলৈয়ো আমাক ওলাই যাবলৈ নিদিয়ে। পুলিছে আমাক কৈছে যে আমাৰ কোনো অনুমতি নাই, আপোনালোক ওলাবও নোৱাৰে, সোমাবও নোৱাৰে। মানৱতাৰ কিছুমান কথা থাকে, ভিতৰত চিকিৎসাৰ কোনো ব্যৱস্থা নথকাত আমি শিক্ষয়িত্ৰীগৰাকীক বাহিৰলৈ দাঙি আনিবই লাগিব।’ এগৰাকী টেট শিক্ষয়িত্ৰীয়ে এইদৰে কয়।
আনহাতে, প্ৰতিবাদী সভাৰ অন্তত মহানগৰ আৰক্ষী আয়ুক্ত দীপক কুমাৰে টেট শিক্ষক সমাজে মুখ্য মন্ত্ৰীলৈ প্ৰেৰণ কৰা স্মাৰক পত্ৰ গ্ৰহণ কৰাৰ লগতে আইন-শৃংখলা বজাই ৰাখি প্ৰতিবাদ কৰাৰ বাবে ধন্যবাদ জ্ঞাপন কৰে।
‘শিক্ষক সমাজৰ প্ৰতিবাদ অতি শান্তিপূৰ্ণভাৱে হৈছে, জনসাধাৰণে কোনো হাৰাশাস্তি পোৱা নাই, কোনো যান-জঁটৰ সমস্যা হোৱা নাই। এজন আয়ুক্ত হিচাপে মই তেওঁলোকৰ স্মাৰক পত্ৰ লৈছো।’ সংবাদ মাধ্যমৰ আগত এইদৰে কয় আৰক্ষী আয়ুক্তগৰাকীয়ে।
ইপিনে, নিৰ্বাচনৰ পূৰ্বে গুৱাহাটী মহানগৰীতে ভিন্ন ৰাজনৈতিক দলক ৰ’ড শ্ব’ কৰাৰ বাবে অনুমতি দিয়া হৈছিল। এই কথা এজন সাংবাদিকে সোঁৱৰাই দিয়াত তেওঁ কয় ‘যেতিয়া আইন-শৃংখলাৰ বাবে কোনো বিষয় ভাল বুলি ভাবো, ট্ৰেফিকৰ বাবে ভাল, তেতিয়া আমি অনুমতি দিওঁ। নিৰ্বাচনৰ সময়ত বেলেগ কথা থাকে, কিছুমান গাইডলাইনো থাকে।’
