অসমৰ ডিটেনশ্যন কেম্পবোৰত বন্দী হৈ থকা বাংলাদেশ আৰু পাকিস্তানৰ পৰা অহা সকলো অমুছলমান বিদেশীক মুকলি কৰি দিবলৈ পৰামৰ্শ দিছে কেন্দ্ৰীয় গৃহ মন্ত্ৰ্যালয়ে। মন্ত্ৰ্যালয়টোৰ ৰাজ্যিক মন্ত্ৰী নিত্যানন্দ ৰায়ৰ উদ্ধৃতিৰ সৈতে এই বাতৰি প্ৰকাশ পাইছে টাইমছ অব ইণ্ডিয়াত।
অসমৰ কংগ্ৰেছী সাংসদ আব্দুল খালেকৰ এটা প্ৰশ্নৰ উত্তৰত লোকসভাৰ মজিয়াত নিত্যানন্দ ৰায়ে এই কথা প্ৰকাশ কৰিছে। অৱশ্যে তেওঁ এই সন্দৰ্ভত কোনো নিৰ্দিষ্ট নিৰ্দেশনা দিয়া হোৱা নাই বুলি জানিবলৈ দিয়ে।
ৰায়ে কয়, যিসকল ২০১৪ চনৰ ৩১ ডিচেম্বৰৰ পূৰ্বে ৰাজ্যখনত আশ্ৰয় ল’বলৈ বাধ্য হৈছিল, বৈধ নথিৰ অবিহনেই বা ম্যাদ ওকলা নথিৰ থকা সকলো অমুছলমানক মুকলি কৰি দিবলৈ পৰামৰ্শ দিয়া হৈছে।
তেওঁ ডিটেনশ্যন চেণ্টাৰৰ নাম সলনি কৰি হ’ল্ডিং চেণ্টাৰ (holding centre) কৰা হৈছে বুলিও লোকসভাক জনায়।
যোৱা তিনি বছৰত এই কেন্দ্ৰবোৰৰ পৰা ৭৫১জন লোকক মুকলি কৰি দিয়া হৈছে বুলিও তথ্য দাঙি ধৰে ৰায়ে।
CAA- বা নাগৰিকত্ব (সংশোধন) আইনৰ নিয়মাৱলী প্ৰস্তুত হৈ উঠিলে এই আইনখনে সামৰি লোৱা সকলো লোকে নাগৰিকত্বৰ বাবে আবেদন কৰিব পাৰিব।
উল্লেখ কৰিব পাৰি যে কেন্দ্ৰীয় চৰকাৰে শেহতীয়াকৈ অনা বিতৰ্কিত নাগৰিকত্ব (সংশোধন) আইনখনৰ জৰিয়তে বাংলাদেশ, পাকিস্তান আৰু আফগানিস্তানৰ পৰা ভাৰতলৈ অবৈধভাৱে অহা হিন্দু, বৌদ্ধ, জৈন, খ্ৰীষ্টান আৰু পাৰ্চীসকলক নাগৰিকত্ব দিয়াৰ ব্যৱস্থা কৰা হৈছে। ২০১৪ চনৰ ৩১ ডিচেম্বৰলৈকে ভাৰতত এইদৰে প্ৰৱেশ কৰা এই সম্প্ৰদায়কেইটাৰ লোকে নাগৰিকত্ব লাভ কৰিব।
আনহাতে, অসমৰ আন এজন কংগ্ৰেছী সাংসদ প্ৰদ্যুৎ বৰদলৈৰ আন এটা প্ৰশ্নৰ উত্তৰত ৰায়ে কয় যে অসম চৰকাৰৰ তথ্য মতে এন আৰ চিত নাম অন্তৰ্ভুক্ত কৰিবলৈ সক্ষম নোহোৱা কোনো লোকক বন্দী কৰি ৰাখিবৰ বাবে ৰাজ্যখনত কোনো ডিটেনশ্যন কেম্প নিৰ্মাণ কৰি থকা হোৱা নাই।