অসমীয়া শিশু সাহিত্যৰ জগতত এক ঐতিহাসিক মাইলৰ খুঁটি হিচাপে পৰিগণিত হোৱা দুখন জনপ্ৰিয় আলোচনী ‘মৌচাক’ আৰু ‘নতুন আৱিষ্কাৰ’ শেহতীয়াকৈ এক গোলকীয় শৈক্ষিক মঞ্চত স্থান লাভ কৰিবলৈ সক্ষম হৈছে। কেলিফৰ্ণিয়া বিশ্ববিদ্যালয় আৰু তেজপুৰ বিশ্ববিদ্যালয়ৰ এক যুটীয়া প্ৰকল্পৰ অধীনত এই দুয়োখন আলোচনীৰ প্ৰতিটো প্ৰকাশিত সংখ্যা এতিয়া কেলিফৰ্ণিয়া বিশ্ববিদ্যালয়ত ডিজিটেল ৰূপত সংৰক্ষণ কৰা হৈছে, যিয়ে সমগ্ৰ বিশ্বৰ গৱেষকসকলৰ বাবে অসমীয়া শিশু সাহিত্য অধ্যয়নৰ এক নতুন দুৱাৰ মুকলি কৰিছে।
যোৱা বছৰৰ পৰা আৰম্ভ হোৱা এই ডিজিটেলাইজেচন প্ৰক্ৰিয়াৰ জৰিয়তে আলোচনী দুখনৰ আৰম্ভণিৰ পৰা বৰ্তমানলৈকে প্ৰকাশিত সকলো সংখ্যা সুৰক্ষিত কৰা হৈছে। উল্লেখযোগ্য যে ১৯৮৪ চনৰ এপ্ৰিল মাহত প্ৰথমবাৰৰ বাবে প্ৰকাশ পোৱা ‘মৌচাক’ আলোচনীখনে ইতিমধ্যে ৪২ সংখ্যক বছৰত ভৰি দিছে আৰু প্ৰায় চাৰি দশক ধৰি ই অসমৰ শিশুসকলৰ মাজত কল্পনা, বিজ্ঞান মনস্কতা আৰু বৌদ্ধিক বিকাশৰ এক নিৰ্ভৰযোগ্য মাধ্যম হৈ আহিছে। একেদৰে, ‘নতুন আৱিষ্কাৰ’ আলোচনীখনেও দীৰ্ঘদিন ধৰি নৱপ্ৰজন্মৰ মাজত বৈজ্ঞানিক চিন্তাধাৰা আৰু সৃজনীশীলতাৰ প্ৰসাৰত গুৰুত্বপূৰ্ণ ভূমিকা পালন কৰি আহিছে।
আলোচনী দুখনৰ এই আন্তঃৰাষ্ট্ৰীয় স্বীকৃতি সন্দৰ্ভত বিশিষ্ট শিশু সাহিত্যিক তথা আলোচনী দুখনৰ সম্পাদক শান্তনু তামূলীয়ে গভীৰ সন্তোষ প্ৰকাশ কৰিছে। শিশুসকলৰ মাজত “মৌচাক মামা” হিচাপে পৰিচিত তামূলীয়ে জানিবলৈ দিয়ে যে আলোচনী দুখনৰ সমৃদ্ধ সমল আৰু চাৰি দশকজোৰা নিৰৱচ্ছিন্ন যাত্ৰাই সমগ্ৰ বিশ্বৰ শিশু আলোচনীৰ তুলনাত্মক অধ্যয়নৰ ক্ষেত্ৰখনত শৈক্ষিক মহলক বাৰুকৈয়ে আকৰ্ষিত কৰিছে। তেওঁ লগতে উল্লেখ কৰে যে ইতিমধ্যে ভাৰতবৰ্ষৰ কেইবাগৰাকীও গৱেষক ছাত্ৰ-ছাত্ৰীয়ে এই আলোচনী দুখনৰ ওপৰত ডক্টৰেট ডিগ্ৰীৰ বাবে গৱেষণা অব্যাহত ৰাখিছে আৰু এই বৰ্ধিত শৈক্ষিক আগ্ৰহৰ ফলশ্ৰুতিতেই কেলিফৰ্ণিয়া বিশ্ববিদ্যালয় আৰু তেজপুৰ বিশ্ববিদ্যালয়ৰ মাজত এই ঐতিহাসিক বুজাবুজি সম্ভৱ হৈ উঠিছে।
বিগত কেইবা দশক ধৰি ‘মৌচাক’ আৰু ‘নতুন আৱিষ্কাৰ’ কেৱল দুখন আলোচনী হৈ থকা নাই, বৰঞ্চ ই অসমীয়া নৱপ্ৰজন্মৰ বৌদ্ধিক যাত্ৰাৰ এক জীৱন্ত দলিল হিচাপে পৰিগণিত হৈছে। সাহিত্য অকাডেমিৰ বাল সাহিত্য পুৰস্কাৰ আৰু বিজ্ঞান জনপ্ৰিয়কৰণৰ ৰাষ্ট্ৰীয় বঁটাৰে সন্মানিত শান্তনু তামূলীৰ বলিষ্ঠ সম্পাদনাই এই যাত্ৰাক এক অনন্য মাত্ৰা প্ৰদান কৰিছে।
